Kĩonereria Kĩega​—Asafu

Asafu nĩ aageragĩra ũndũ mũritũ ũtũũro-inĩ wake. Oonaga andũ arĩa maamũrigicĩirie makiuna mawatho ma Ngai na moonekaga ta mataacemanagia na maumĩrĩra moru. Nĩ ũndũ ũcio nĩ aarigagwo kana nĩ harĩ bata wa kwĩrutanĩria gũkenia Ngai. Aaugire ũũ: “Ti itherũ ndũũrĩtie ngoro yakwa ĩrĩ theru o tũhũ na ngathambia moko makwa kuonania ndirĩ ũcuke o tũhũ.” No thutha wa gwĩciria ũndũ ũcio na njĩra ndikĩru, nĩ aagĩire na muonere ngũrani. Nĩ aamenyire atĩ gĩkeno kĩrĩa andũ aganu magĩaga nakĩo no kĩa ihinda inini. Aatuire itua rĩrĩkũ? Aainĩire Jehova ũũ: “Ndĩ nawe-rĩ, gũtirĩ kĩndũ ingĩĩrirĩria gũkũ thĩ.”​—Thaburi 73:3, 13, 16, 25, 27.

No gũkorũo rĩmwe waneyũria kana nĩ harĩ ũguni wa kũrũmĩrĩra motaaro ma Ngai. No o ta Asafu, roraga maũndũ na njĩra ndikĩru. Wĩcirie ũhoro wa andũ arĩa magaga kũrũmĩrĩra mawatho ma Jehova. Hihi nĩ makoragwo na thayũ wa ma? Hihi nĩ kũrĩ hitho magĩĩte nayo ya kũgĩa na gĩkeno ĩrĩa andũ arĩa ehokeku harĩ Ngai matoĩ? Thutha wa gwĩciria ũndũ ũcio na njĩra ndikĩru, no ũkinyĩrĩre kuuga ciugo ta ici ciaugirũo nĩ Asafu: “Gũkuhĩrĩria Ngai nĩkuo kwega na niĩ.”​—Thaburi 73:28.