Thimo 29:1-27
29 Mũndũ ũrĩa ũmagia ngingo yake* thutha wa kũrũngwo mũno+Akooinwo o rĩmwe ũndũ atangĩhona.+
2 Rĩrĩa andũ athingu maingĩha, andũ nĩ gũkena makenaga,No rĩrĩa mũndũ mwaganu atuĩka mũtongoria, andũ nĩ gũcaya macayaga.+
3 Mũndũ ũrĩa wendete ũũgĩ nĩ atũmaga ithe akene,+No ũrĩa ũthiaga thiritũ na arĩa mahũũraga ũmaraya nĩ aitangaga ũtonga wake.+
4 Mũthamaki ũrĩa ũhũthagĩra kĩhooto nĩ atũmaga bũrũri wĩhande,+No mũndũ ũrĩa wendete mahaki atũmaga wanangĩke.
5 Mũndũ ũrĩa ũgaathagĩrĩria mũndũ ũngĩ gũkĩria njanoAkoragwo akĩambĩra magũrũ make neti.+
6 Mũndũ mũũru ategagwo nĩ mehia make,+No ũrĩa mũthingu anagĩrĩra akenete na agacanjamũka.+
7 Mũndũ mũthingu nĩ arũmbũyagia ihooto cia arĩa athĩni,+No mũndũ mwaganu ndatindanagĩra na ũndũ ta ũcio.+
8 Andũ egani matũmaga taũni yakane mwaki,+No arĩa ogĩ nĩ maniinaga marakara.+
9 Mũndũ mũũgĩ angĩkararania na kĩrimũ,Gũkoragwo na inegene na kĩnyũrũri, no gũtirĩ moimĩrĩro mega monekaga.+
10 Andũ arĩa mendete gũita thakame nĩ mathũire mũndũ wothe ũtarĩ ũcuke,+Na nĩ macaragia ũrĩa mangĩruta andũ arĩa arũngĩrĩru muoyo.*
11 Mũndũ mũkĩgu aitũrũraga marakara make mothe,*+No mũndũ ũrĩa mũũgĩ nĩ amagiragĩrĩria ahooreire.+
12 Mũtongoria angĩthikĩrĩria maheeni,Ndungata ciake ciothe ituĩkaga andũ aganu.+
13 Mũndũ mũthĩni na ũrĩa ũhinyanagĩrĩria makoragwo na ũndũ ũyũ ũhaanaine:*
Jehova nĩwe ũheaga maitho mao eerĩ ũtheri.*
14 Mũthamaki angĩtuĩra arĩa athĩni ciira na kĩhooto,+Gĩtĩ gĩake kĩa ũnene gĩikaraga kĩĩhandĩte hĩndĩ ciothe.+
15 Rũthanju* na kũrũngwo nĩ itũmaga mũndũ agĩe na ũũgĩ,+No mwana wa kũrekererio nĩ aconorithagia nyina.
16 Rĩrĩa andũ aganu mongerereka, mehia nĩ mongererekaga,No arĩa athingu nĩ makerorera andũ acio makĩgwa.+
17 Rũngaga mũrũguo, nake nĩ arĩtũmaga ũgĩe na ũhurũko;Na nĩ arĩtũmaga ũgĩe na gĩkeno kĩnene.+
18 Kũndũ gũtakoragwo na kĩoneki,* andũ mekaga maũndũ matekwĩgirĩrĩria,+No gũkena nĩ arĩa marũmagĩrĩra watho.+
19 Ndungata ndĩrekaga ciugo theri imĩrũnge,Nĩ gũkorũo o na gũtuĩka nĩ ĩtaũkagĩrũo, ndĩathĩkaga.+
20 Hihi nĩ wonete mũndũ ũhiũhaga kwaria?+
Kwĩ na kĩĩrĩgĩrĩro kĩnene harĩ kĩrimũ gũkĩra mũndũ ũcio.+
21 Ndungata ĩngĩtũnio kuuma ũnyinyi wayo,Thutha-inĩ ĩgaatuĩka mũndũ ũtarĩ ngatho.
22 Mũndũ ũhiũhaga kũrakara atũmaga kũgĩe na ngũĩ;+Mũndũ wothe ũkoragwo na mwerekera wa kũrakara nĩ ehagia maita maingĩ.+
23 Mwĩtĩo wa mũndũ nĩ ũrĩmũnyihagia,+No mũndũ wothe mwĩnyihia roho-inĩ nĩ arĩamũkagĩra riri.+
24 Mũrata wa mũici nĩ kwĩmena emenete.*
Ahota kũigua rĩĩtana rĩa kũruta ũira,* no gũtirĩ ũndũ oigaga.+
25 Gwĩtigĩra andũ nĩ* mũtego,+No mũndũ ũrĩa wĩhokaga Jehova nĩ arĩgitagĩrũo.+
26 Andũ aingĩ nĩ mendaga gũthikĩrĩrio nĩ* mũtongoria,No mũndũ onaga kĩhooto kuuma kũrĩ Jehova.+
27 Mũndũ ũtahũthagĩra kĩhooto nĩ kĩndũ kĩrĩ magigi harĩ andũ arĩa athingu,+No mũndũ ũrĩa njĩra yake ĩrĩ nũngĩrĩru nĩ kĩndũ kĩrĩ magigi harĩ mũndũ ũrĩa mwaganu.+
Tũũhoro twa magũrũ-inĩ
^ Kana “ũregaga kũgarũrĩra.”
^ Kana hihi, “No ũrĩa mũrũngĩrĩru nĩ acaragia ũrĩa ekũgitĩra muoyo wake.”
^ Kana “ũrĩa wothe araigua na thĩinĩ.” Ũkk., “roho wake wothe.”
^ Ũkk., “macemanagia hamwe.”
^ Ũguo nĩ kuuga, nĩ amaheaga muoyo.
^ Kana “Ũtaaro; Iherithia.”
^ Kana “kĩoneki kĩa ũrathi; ũguũrio.”
^ Kana “nĩ amenete muoyo wake.”
^ Kana “mwĩhĩtwa wĩgiĩ kĩrumi.”
^ Kana “kũrehagĩra mũndũ.”
^ Kana hihi, “meyendithagĩrĩria harĩ.” Ũkk., “macaragia ũthiũ wa.”
