Kũrĩ Aroma 6:1-23
6 Gũkĩrĩ ũguo-rĩ, tũkiuge atĩa? Hihi twagĩrĩirũo gũthiĩ na mbere thĩinĩ wa mehia nĩguo ũtugi mũnene ũingĩhe?
2 Aca o na hanini! Kuona atĩ nĩ twakuire ũhoro-inĩ wĩgiĩ mehia-rĩ,+ tũngĩgĩthiĩ na mbere gũtũũra thĩinĩ wamo atĩa?+
3 Kana hihi mũtiũĩ atĩ ithuothe arĩa twabatithirio thĩinĩ wa Kristo Jesu+ twabatithirio thĩinĩ wa gĩkuũ gĩake?+
4 Kwoguo twathikirũo hamwe nake gĩkuũ-inĩ gĩake kũgerera kũbatithio gwitũ,+ nĩguo o ta ũrĩa Kristo aariũkirio kuuma kũrĩ arĩa akuũ kũgerera riri wa Ithe, o na ithuĩ tũthiage kũringana na muoyo mwerũ.+
5 Angĩkorũo nĩ tũgĩĩte na ũrũmwe hamwe nake nĩ ũndũ wa gĩkuũ ta gĩake,+ hatarĩ nganja nĩ tũkaagĩa na ũrũmwe hamwe nake nĩ ũndũ wa kũriũka ta gwake.+
6 Nĩ gũkorũo nĩ tũĩ atĩ ũmũndũ witũ wa tene nĩ wahũũrĩrĩirũo na mĩcumarĩ mũtĩ-inĩ hamwe nake+ nĩgetha mwĩrĩ witũ wa mehia wagithio hinya,+ nĩguo tũtigathiĩ na mbere gũkorũo tũrĩ ngombo cia mehia.+
7 Tondũ mũndũ ũrĩa ũkuĩte nĩ ehereirio* mehia make.
8 Makĩria ma ũguo, angĩkorũo nĩ tũkuĩte hamwe na Kristo, nĩ twĩtĩkĩtie atĩ ningĩ nĩ tũgaatũũra hamwe nake.
9 Nĩ gũkorũo nĩ tũĩ atĩ, tondũ rĩu Kristo nĩ ariũkĩtio kuuma kũrĩ arĩa akuũ,+ ndagaakua rĩngĩ;+ gĩkuũ gĩtirĩ na hinya wa kũmwatha rĩngĩ.
10 Tondũ gĩkuũ kĩrĩa aakuire, aakuire ũhoro-inĩ wĩgiĩ mehia* o riita rĩmwe rĩa kũigana,+ no muoyo ũrĩa atũũraga, atũũraga nĩ ũndũ wa Ngai.
11 O ta ũguo na inyuĩ, mwĩyonagei ta mũrĩ akuũ ũhoro-inĩ wĩgiĩ mehia no mwĩyonage mũrĩ muoyo nĩ ũndũ wa Ngai kũgerera Kristo Jesu.+
12 Nĩ ũndũ ũcio, mũtikareke mehia mathiĩ na mbere gwathana ta mũthamaki mĩĩrĩ-inĩ yanyu ĩyo ĩkuaga,+ atĩ nĩguo mwathĩkagĩre merirĩria mayo.
13 Ningĩ mũtigathiĩ na mbere kũneana mĩĩrĩ yanyu* harĩ mehia ĩtuĩke matharaita ma maũndũ matarĩ ma ũthingu, no mwĩneanei kũrĩ Ngai ta andũ marĩ muoyo kuuma gĩkuũ-inĩ, ningĩ mũneane mĩĩrĩ yanyu* kũrĩ Ngai ĩtuĩke matharaita ma maũndũ ma ũthingu.+
14 Nĩ gũkorũo no mũhaka mehia matige kũmwathaga, kuona atĩ mũtirĩ rungu rwa watho+ no mũrĩ rungu rwa ũtugi mũnene.+
15 Tũkiuge atĩa? Hihi twagĩrĩirũo kwĩhia tondũ tũtirĩ rungu rwa watho no tũrĩ rungu rwa ũtugi mũnene?+ Aca o na hanini!
16 Kaĩ mũtoĩ atĩ mũngĩĩneana kũrĩ mũndũ o na ũrĩkũ mũrĩ ngombo njathĩki, mũtuĩkaga ngombo cia ũcio mũrathĩkĩra,+ mũgatuĩka ngombo cia mehia+ ũndũ ũrĩa werekagĩria gĩkuũ-inĩ+ kana cia wathĩki ũndũ ũrĩa ũrehaga ũthingu?
17 No Ngai arocokerio ngatho tondũ o na gũtuĩka harĩ hĩndĩ mwarĩ ngombo cia mehia, mwatuĩkire athĩki kuuma ngoro-inĩ harĩ kĩonereria kĩa ũrutani kĩrĩa mwaheirũo.
18 Nĩ ma, tondũ nĩ mwakũũrirũo kuuma mehia-inĩ,+ mwatuĩkire ngombo cia ũthingu.+
19 Ndĩraria na ciugo andũ megũtaũkĩrũo tondũ wa mĩĩrĩ yanyu kwaga hinya; nĩ gũkorũo o ta ũrĩa mwaneanaga ciĩga cianyu irĩ ngombo cia maũndũ matarĩ matheru na ma uuni-watho nĩguo mwĩkage ciĩko cia uuni-watho-rĩ, rĩu kĩneanei ciĩga cianyu irĩ ngombo cia ũthingu nĩguo mwĩkage maũndũ marĩa matheru.+
20 Tondũ hĩndĩ ĩrĩa mwarĩ ngombo cia mehia, mwarĩ na wĩyathi ũhoro-inĩ wĩgiĩ ũthingu.
21 Hĩndĩ ĩyo-rĩ, nĩ maciaro marĩkũ mwagĩaga namo? Nĩ maũndũ marĩa rĩu matũmaga mũconoke. Nĩ gũkorũo marigĩrĩrio ma maũndũ macio nĩ gĩkuũ.+
22 No rĩrĩ, tondũ rĩu nĩ mwakũũrirũo kuuma mehia-inĩ na mũgĩtuĩka ngombo cia Ngai, mũrutaga maciaro ũhoro-inĩ wĩgiĩ ũtheru,+ na marigĩrĩrio mamo nĩ muoyo wa tene na tene.+
23 Nĩ gũkorũo mũcara wa mehia nĩ gĩkuũ,+ no kĩheo kĩrĩa Ngai aheanaga nĩ muoyo wa tene na tene+ kũgerera Kristo Jesu Mwathani witũ.+
Tũũhoro twa magũrũ-inĩ
^ Kana “arekereirio kuuma harĩ; oheirũo.”
^ Ũguo nĩ kuuga, nĩguo eherie mehia.
^ Ũkk., “ciĩga cianyu.”
^ Ũkk., “ciĩga cianyu.”
