Kũguũrĩrio kwa Johana 18:1-24
18 Thutha ũcio ngĩona mũraika ũngĩ agĩikũrũka kuuma igũrũ arĩ na wathani mũnene, nayo thĩ ĩkĩarĩrũo nĩ riri wake.
2 Na akĩanĩrĩra na mũgambo mũnene akiuga atĩrĩ: “Nĩ agwĩte! Babuloni Ũrĩa Mũnene nĩ agwĩte,+ na nĩ atuĩkĩte gĩikaro kĩa ndaimono na kũrĩa roho o wothe mũũru* na nyoni yothe ĩthũirũo na ĩtarĩ theru ciĩhithaga!+
3 Nĩ ũndũ kũgerera ndibei ya merirĩria* ma ngomanio ciake itagĩrĩire* ndũrĩrĩ ciothe nĩ inyitĩtwo,+ na athamaki a thĩ nĩ meekire nake ciĩko cia ngomanio itagĩrĩire,+ na ahũũri biacara* a thĩ nĩ maatongire kuumana na hinya wa mũtũũrĩre wake ũtarĩ thoni wa mĩago.”
4 Na ngĩigua mũgambo ũngĩ woima igũrũ ũkiuga atĩrĩ: “Umai thĩinĩ wake, inyuĩ andũ akwa,+ angĩkorũo mũtikwenda kũnyitanĩra nake mehia-inĩ make, na angĩkorũo mũtikwenda kwamũkĩra mahũũra mamwe make.+
5 Tondũ mehia make nĩ meiganĩrĩire magakinya o nginya igũrũ,+ nake Ngai nĩ aririkanĩte ciĩko ciake cia wagi wa kĩhooto.*+
6 Mwĩkei o ta ũrĩa arekaga andũ arĩa angĩ,+ mũrĩhei maita merĩ maũndũ marĩa aaneka;+ gĩkombe kĩrĩa+ aratukanagia mũtukanĩriei maita merĩ.+
7 Kũringana na gĩkĩro kĩrĩa aretũũgagĩria na agaikara mũtũũrĩre ũtarĩ na thoni wa mĩago, mũhei mĩnyamaro na macakaya kũringana na gĩkĩro o kĩu. Tondũ aikaraga akĩĩraga na ngoro atĩrĩ: ‘Niĩ ngoragwo ndĩ mũthamaki, na ndirĩ mũtumia wa ndigwa, na ndirĩ hĩndĩ ngaacakaya.’+
8 Nĩkĩo mahũũra make, gĩkuũ na macakaya na ng’aragu igooka mũthenya o ro ũmwe, na acinwo biũ na mwaki,+ tondũ Jehova* Ngai, o we ũmũtuĩrĩire, nĩ arĩ hinya.+
9 “Nao athamaki a thĩ arĩa meekaga nake ciĩko cia ngomanio itagĩrĩire* na magaikarania nake mũtũũrĩre-inĩ wake ũtarĩ thoni wa mĩago nĩ makaarĩra na mehũũrahũũre marĩ na kĩeha nĩ ũndũ wake rĩrĩa makoona ndogo yake akĩhĩa.
10 Makaarũgama haraya tondũ wa gwĩtigĩra mĩnyamaro yake na moige atĩrĩ: ‘Kaĩ nĩ ũũru-ĩ, kaĩ nĩ ũũru-ĩ, wee itũũra inene,+ Babuloni wee itũũra rĩrĩ hinya, tondũ ituĩro rĩaku rĩoka thĩinĩ wa ithaa rĩmwe!’
11 “O nao ahũũri biacara a thĩ nĩ mararĩra na magacakaya nĩ ũndũ wake, tondũ gũtirĩ mũndũ wa kũgũra indo ciao ciothe rĩngĩ,
12 indo ciothe cia thahabu, betha, mahiga ma goro, ruru, gatani ĩrĩa njega, itambaya cia rangi wa papũ, hariri, itambaya cia rangi mũtune; na indo ciothe iria ciakĩtwo na mĩtĩ mĩnungi wega; na iria ciothe ithondeketwo na mĩguongo, na mbaũ cia goro, gĩcango, kĩgera, na mahiga mathaka;
13 hamwe na mũndarathini, mahuti manungi wega ma Kĩĩhĩndĩ, ũbumba, maguta manungi wega, ũbani, ndibei, maguta ma ndamaiyũ, mũtu mũhinyu, ngano, ng’ombe, ng’ondu, mbarathi, tũkaari, ngombo, na mĩoyo ya andũ.
14 Ĩĩ, maciaro mega marĩa ũreriragĩria nĩ magũtiga, na irio ciothe iria njega na indo iria thaka nĩ ciagũtiga, na itigaacoka kuoneka rĩngĩ.
15 “Ahũũri biacara arĩa meendagia indo icio, o acio maatongetio nĩwe, nĩ makaarũgama haraya tondũ wa gwĩtigĩra mĩnyamaro yake marĩre na macakae,
16 makiugaga ũũ: ‘Kaĩ nĩ ũũru-ĩ, kaĩ nĩ ũũru-ĩ, wee itũũra inene, rĩhumbĩtwo gatani ĩrĩa njega, na rangi wa papũ, na mũtune, na rĩkagemio mũno na mathaga ma thahabu, mahiga ma goro, na ruru,+
17 nĩ gũkorũo thĩinĩ wa ithaa rĩmwe ũtonga mũnene ũguo nĩ wanangĩtwo!’
“Na mũnene o wothe wa meri na mũndũ wothe ũthiagĩra iria-inĩ na aruti wĩra othe a meri na arĩa othe mathũkũmaga kuumana na iria makĩrũgama haraya
18 na makĩanĩrĩra meroreire ndogo yake akĩhĩa makiuga: ‘Nĩ itũũra rĩrĩkũ rĩtariĩ ta itũũra rĩrĩa inene?’
19 Makĩĩhurĩria rũkũngũ mĩtwe na makĩanĩrĩra, makĩrĩraga na magĩcakayaga makiuga atĩrĩ: ‘Kaĩ nĩ ũũru-ĩ, kaĩ nĩ ũũru-ĩ, itũũra rĩrĩa inene, o rĩo rĩratũmaga arĩa othe marĩ na meri iria-inĩ matonge kuumana na ũtonga warĩo, tondũ thĩinĩ wa ithaa rĩmwe nĩ rĩanangwo!’+
20 “Gĩkene nĩ ũndũ wake, wee igũrũ rĩrĩ,+ o na inyuĩ arĩa aamũre+ na atũmwo na anabii, tondũ Ngai nĩ amenyithanĩtie ituĩro rĩake harĩ itũũra rĩu nĩ ũndũ wanyu!”+
21 Na mũraika ũrĩ na hinya akĩoya ihiga rĩatariĩ ta ihiga inene rĩa gĩthĩi na akĩrĩikia iria-inĩ akiuga: “Ũguo nĩguo Babuloni itũũra rĩrĩa inene rĩkaaharũrũkio na ihenya, na ndagaacoka kuoneka rĩngĩ.+
22 Na mũgambo wa aini arĩa mainaga makĩhũũraga inanda cia mũgeeto, na wa aini angĩ, na ahuuhi mĩtũrirũ, na ahuuhi tũrumbeta ndũgaacoka kũiguĩka thĩinĩ waku rĩngĩ. Na gũtirĩ bundi ũrutaga wĩra o wothe ũgaacoka kuoneka thĩinĩ waku rĩngĩ, na gũtirĩ mũgambo wa ihiga rĩa gĩthĩi ũgaacoka kũiguĩka thĩinĩ waku rĩngĩ.
23 Gũtirĩ ũtheri wa tawa ũgaacoka gwakana thĩinĩ waku rĩngĩ, na gũtirĩ mũgambo wa mũhikania na wa mũhiki ũgaacoka kũiguĩka thĩinĩ waku rĩngĩ; nĩ gũkorũo ahũũri biacara aku nĩo maarĩ andũ marĩ igweta thĩinĩ wa thĩ, na kũgerera mĩtugo yaku ya ũragũri-rĩ,+ ndũrĩrĩ ciothe nĩ ciahĩtithirio.
24 Ti itheru, thĩinĩ wake nĩ kuoonekire thakame ya anabii na ya arĩa aamũre+ na ya arĩa othe manathĩnjwo thĩinĩ wa thĩ.”+
Tũũhoro twa magũrũ-inĩ
^ Kana hihi, “mĩhũmũ o yothe mĩũru; kiugo o gĩothe kĩũru gĩtongoretio nĩ roho.”
^ Kana “marakara.”
^ Rora Ũthathaũri wa Ciugo.
^ Kana “ahũũri biacara arĩa magendaga.”
^ Kana “mahĩtia make.”
^ Rora Ũhoro Muongerere A5.
^ Rora Ũthathaũri wa Ciugo.
