Maũndũ Marĩa Meekirũo nĩ Atũmwo 21:1-40
21 Thutha wa gwĩtigithũkania nao, tũkĩhaica meri tũgĩthiĩ ĩmwe kwa ĩmwe nginya Kosi, na mũthenya ũrĩa warũmĩrĩire tũgĩthiĩ Rodo, na kuuma hau tũgĩthiĩ Patara.
2 Rĩrĩa tuoonire meri ĩraringa yerekeire Foenicia, tũkĩhaica tũgĩthiĩ.
3 Na thutha wa kuona gĩcigĩrĩra gĩa Kuporo, tũgĩkĩhĩtũka kĩrĩ mwena wa ũmotho* tũgĩthiĩ Siria na tũgĩkinya Turo kũrĩa meri ĩyo yarutagĩrũo mĩrigo.
4 Tũgĩcaria arutwo na tũkĩmona, na tũgĩikara kuo thikũ mũgwanja. No arutwo acio, nĩ ũndũ wa kũguũrĩrio nĩ roho, nĩ meeraga Paulo kaingĩ atĩ ndagathiĩ Jerusalemu.+
5 Ihinda ritũ rĩa gũikara kũu rĩathira, tũkiuma tũgĩthiĩ, nao magĩtuumagaria marĩ othe, hamwe na atumia na ciana nginya tũkiuma nja ya itũũra rĩu. Tũgĩturia maru rũteere-inĩ rwa iria, tũkĩhoya
6 na tũkiuganĩra ũhoro. Tũgĩcoka tũkĩhaica meri, nao makĩinũka kwao mĩciĩ.
7 Tũkiuma Turo na meri tũgĩkinya Petolemai, na tũkĩgeithia ariũ a Ithe witũ kũu na tũgĩikara nao mũthenya ũmwe.
8 Mũthenya ũrĩa warũmĩrĩire tũgĩthiĩ tũgĩkinya Kaisarea, tũgĩtonya nyũmba ya Filipu ũrĩa warĩ mũhunjia, na aarĩ ũmwe wa arũme arĩa mũgwanja,+ tũgĩikara nake.
9 Mũndũ ũcio nĩ aarĩ na airĩtu ana mataarĩ ahiku,* na nĩ maarathaga mohoro.+
10 No thutha wa gũikara kũu thikũ nyingĩ, mũnabii wetagwo Agabo+ agĩũka kuuma Judea.
11 Agĩũka harĩ ithuĩ, akĩoya mũcibi wa Paulo akĩĩyoha magũrũ na moko, agĩcoka akiuga: “Roho mũtheru ũroiga atĩrĩ, ‘Ũguo noguo mwene mũcibi ũyũ akoohwo nĩ Ayahudi thĩinĩ wa Jerusalemu,+ na nĩ makaamũneana moko-inĩ ma andũ a ndũrĩrĩ.’”+
12 Twaigua ũguo, tũrĩ hamwe na arĩa maarĩ hau tũkĩambĩrĩria kũmũthaitha ndakambate Jerusalemu.
13 Nake Paulo agĩcokia atĩrĩ: “Nĩ kĩĩ kĩratũma mũrĩre na mũgerie kũnjũraga ngoro?* Gĩai na ma atĩ nĩ ndĩhaarĩirie, to kuohwo tu, no nĩ nginya gũkua ndĩ kũu Jerusalemu, nĩ ũndũ wa rĩĩtwa rĩa Mwathani Jesu.”+
14 Rĩrĩa aaregire gũtũigua, tũgĩtigana nake* na tũkiuga: “Reke wendi wa Jehova* wĩkĩke.”
15 Thutha wa matukũ macio, tũkĩĩhaarĩria nĩ ũndũ wa rũgendo rwa gũthiĩ Jerusalemu na tũkiumagara.
16 Arutwo amwe a Kaisarea o nao magĩthiĩ hamwe na ithuĩ, magĩtũtwara kũrĩa twanyitĩtwo ũgeni kwa mũndũ wetagwo Munasoni wa Kuporo, ũrĩa warĩ ũmwe wa arutwo arĩa a mbere.
17 Rĩrĩa twakinyire Jerusalemu, ariũ a Ithe witũ magĩtũnyita ũgeni makenete.
18 No mũthenya ũrĩa warũmĩrĩire, tũgĩthiĩ hamwe na Paulo kũrĩ Jakubu,+ na athuri a kĩũngano othe maarĩ kuo.
19 Akĩmageithia na akĩambĩrĩria kũmataarĩria maũndũ marĩa mothe Ngai eekĩire andũ a ndũrĩrĩ kũgerera ũtungata wake.
20 Maigua ũguo, makĩambĩrĩria kũgooca Ngai, no makĩra Paulo atĩrĩ: “Mũrũ wa Ithe witũ, nĩ wona ũrĩa kũrĩ na Ayahudi ngiri nyingĩ matuĩkĩte etĩkia, na othe makoragwo na kĩyo harĩ kũrũmĩrĩra Watho.+
21 No nĩ maiguĩte mũhuhu atĩ ũkoretwo ũkĩruta Ayahudi othe arĩa marĩ gatagatĩ-inĩ ka ndũrĩrĩ atĩ maregane na Watho wa Musa, ũkameera matikaruithagie ciana ciao na matikarũmagĩrĩre mĩtugo ĩrĩa ĩtũire ĩrũmagĩrĩrũo.+
22 Tũgũgĩka atĩa igũrũ rĩa ũndũ ũcio? Hatarĩ nganja nĩ mekũigua atĩ ũrĩ gũkũ.
23 Nĩ ũndũ ũcio-rĩ, ĩka ũrĩa tũgũkwĩra: Tũrĩ na arũme ana mehĩtĩte mwĩhĩtwa.
24 Thiĩ na arũme acio, wĩtherie mũrĩ hamwe nao kũringana na watho, na ũmarĩhĩre mahũthĩro mao nĩguo menjwo mĩtwe yao. Hĩndĩ ĩyo andũ othe nĩ mekuona atĩ maũndũ macio mareeragwo makwĩgiĩ no mũhuhu, no atĩ mĩthiĩre yaku nĩ mĩega na nĩ wathĩkagĩra Watho.+
25 Andũ arĩa metĩkĩtie kuuma ndũrĩrĩ-inĩ nĩ tũmandĩkĩire na tũkamatũmĩra itua ritũ, atĩ methemage indo iria irutĩtwo magongona kũrĩ mĩhianano,+ thakame,+ nyamũ cia gũitwo,*+ na methemage ngomanio itagĩrĩire.”*+
26 Mũthenya ũrĩa warũmĩrĩire Paulo akĩoya arũme acio na agĩĩtheria kũringana na watho marĩ hamwe nao,+ agĩcoka agĩthiĩ thĩinĩ wa hekarũ kũmenyithania rĩrĩa matukũ ma gwĩtheria kũringana na watho mangĩathirire, nĩguo igongona rĩrutwo nĩ ũndũ wa o ũmwe wao.
27 Na rĩrĩa thikũ icio mũgwanja ciarĩ hakuhĩ gũthira, Ayahudi a kuuma Asia makĩmuona thĩinĩ wa hekarũ, magĩcogera kĩrĩndĩ gĩothe na makĩmũnyita,
28 makĩanagĩrĩra makoiga: “Athuri aya a Isiraeli, tũteithiei! Ũyũ nĩwe mũndũ ũrĩa ũrutaga andũ othe kũndũ guothe maregane na andũ aitũ na Watho witũ na handũ haha. Na gũthũkia mũno, arehete nginya Angiriki thĩinĩ wa hekarũ na nĩ athahĩtie handũ haha hatheru.”+
29 Nĩ gũkorũo mbere ĩyo nĩ moonete Terofimo+ ũrĩa Mũefeso marĩ nake itũũra-inĩ rĩu, na magĩĩcirĩria atĩ Paulo aamũtwarĩte thĩinĩ wa hekarũ.
30 Itũũra rĩu rĩothe rĩkĩgĩa ngũĩ, na andũ magĩũka mateng’erete marĩ hamwe, makĩnyita Paulo makĩmũkururia makĩmuumia nja ya hekarũ, na o hĩndĩ ĩyo mĩrango ĩkĩhingwo.
31 Hĩndĩ ĩrĩa maageragia kũmũũraga-rĩ, ũhoro ũgĩkinyĩra mũtongoria wa gĩkundi kĩa mbũtũ atĩ Jerusalemu guothe kwarĩ na ngũĩ;
32 na o hĩndĩ ĩyo akĩoya thigari na anene a mbũtũ, magĩteng’era kũrĩ o. Nao mona mũtongoria ũcio wa mbũtũ na thigari, magĩtiga kũhũũra Paulo.
33 Mũtongoria ũcio wa mbũtũ agĩkuhĩrĩria, akĩmũnyita na agĩathana ohwo na mĩnyororo ĩĩrĩ;+ agĩcoka akĩũrĩrĩria ũcio nũũ na nĩ atĩa eekĩte.
34 No andũ amwe thĩinĩ wa kĩrĩndĩ makĩambĩrĩria kwanĩrĩra makiugaga ũndũ ũmwe, na angĩ makoiga ũndũ ũngĩ. Na tondũ ndangĩahotire kũmenya wega ũrĩa gwathiaga na mbere nĩ ũndũ wa ngũĩ ĩyo, agĩathana Paulo atwarũo nyũmba-inĩ cia thigari.
35 No rĩrĩa aakinyirio ngathĩ-inĩ cia nyũmba, agĩkuuo nĩ thigari tondũ kĩrĩndĩ kĩarĩ na ũũru mũingĩ mũno,
36 nĩ gũkorũo maarũmĩrĩirũo nĩ kĩrĩndĩ gĩathiaga gĩkĩanagĩrĩra gĩkiugaga: “Mũũragei!”
37 Na rĩrĩa aarĩ hakuhĩ gũtonyio nyũmba-inĩ cia thigari, Paulo akĩũria mũtongoria ũcio wa mbũtũ atĩrĩ: “No njĩtĩkĩrio ngwĩre ũndũ?” Nake akĩmũũria: “Kaĩ ũĩ Kĩngiriki?
38 Kwoguo wee nĩwe Mũmisiri ũrĩa kahinda kahĩtũku wacogerire andũ maregane na thirikari na ũgĩtongoria oragani arĩa 4,000 mũgĩthiĩ werũ-inĩ?”
39 Nake Paulo akĩmwĩra: “Niĩ ndĩ Mũyahudi+ wa kuuma Tariso+ ya Kilikia, raiya wa itũũra rĩrĩ igweta. Kwoguo-rĩ, ndagũthaitha njĩtĩkĩria njarĩrie andũ.”
40 Thutha wa kũheo rũtha, Paulo akĩrũgama ngathĩ-inĩ, akĩonia andũ na guoko makire. Na rĩrĩa maakirire biũ, akĩmaarĩria na rũthiomi rwa Kĩhibirania,+ akĩmeera atĩrĩ:
Tũũhoro twa magũrũ-inĩ
^ Kana “mwena wa gĩcukĩro.”
^ Ũkk., “maarĩ gathirange.”
^ Kana “gũtũma ngoro yakwa yũrũo nĩ hinya?”
^ Ũkk., “tũgĩkira.”
^ Rora Ũhoro Muongerere A5.
^ Kana “iria ciũragĩtwo hatarĩ gũita thakame.”
^ Kĩngiriki, por·neiʹa. Rora Ũthathaũri wa Ciugo.
