“Angĩkorũo biũ nĩ ũrenda kwĩruta ũhoro wĩgiĩ Ngai, thiĩ na mbere kũnyitanĩra na Aira a Jehova.” Nĩ ndagegire ndaigua ciugo icio. Hĩndĩ ĩyo, ndakoretwo ngĩĩruta na Aira a Jehova gwa kahinda kanini. No nĩguo ũtaũkĩrũo kĩrĩa gĩatũmire ngegio nĩ ciugo icio, reke ndaarĩrie hanini ũhoro wĩgiĩ mũtũũrĩre wakwa.

 Ndaciarĩirũo taũni-inĩ ya Quezaltepeque, bũrũri-inĩ wa El Salvador. Ndarĩ wa 6 harĩ ciana 15. Aciari akwa nĩ meerutanĩirie kũndera nduĩke mũndũ mwĩhokeku na ũrathĩkĩra watho. Makĩria ma ũguo, Leonardo o hamwe na Aira a Jehova angĩ nĩ mookaga rĩmwe na rĩmwe gũtũruta ũhoro wĩgiĩ Bibilia. No ndiatindanagĩra na maũndũ marĩa ndarutagwo na nĩ ndatuire matua maingĩ moru. Ndĩ na mĩaka 14, nĩ ndambĩrĩirie kũnyua njohi na kũhũthĩra ndawa cia kũrebia tũrĩ hamwe na arata arĩa twathomaga nao. Makĩambĩrĩria gũtiga cukuru ũmwe thutha wa ũrĩa ũngĩ makĩingĩra gĩkundi-inĩ kĩa eki-naĩ, na niĩ ngĩrũmĩrĩra kĩonereria kĩao kĩũru. Twatindaga barabara-inĩ tũgĩtia andũ mbeca na tũkĩiyaga nĩguo tũhote kũgũra indo icio njũru twahũthagĩra.

 Gĩkundi kĩu gĩgĩtuĩka famĩlĩ yakwa. Ndetĩkĩtie atĩ nĩ ndagĩrĩirũo gũkorũo ndĩ mwĩhokeku harĩ o. Kwa ngerekano, mũrata ũmwe wakwa wa gĩkundi kĩu warĩĩtwo nĩ ndawa cia kũrebia nĩ aatharĩkĩire mũndũ twariganĩtie nake mũciĩ. Hĩndĩ ĩyo maarũaga, mũndũ ũcio twariganĩtie nake nĩ aatooririe mũrata wakwa na agĩta thigari. Nĩ ndarakarire mũno, na ngĩambĩrĩria gũthũkia ngaari yake na thimbũ nene nĩguo arekererie mũrata wakwa. Mũndũ ũcio agĩthaitha ndige kũũraga icicio cia ngaari yake na kũmĩthũkia, no ndiamũthikĩrĩirie.

 Rĩrĩa ndarĩ na mĩaka 18, gĩkundi gitũ nĩ kĩarũire na thigari. Ndĩ hakuhĩ gũikia mbomu twethondekeire, ndiamenyire ũrĩa gwathiire ĩgĩtuthũkĩra guoko-inĩ gwakwa. Ũndũ ũrĩa ndirikanaga nĩ kuona guoko gwakwa kuunĩkangĩte, ngĩcoka ngĩringĩka. Rĩrĩa ndokĩrire ndĩ thibitarĩ, nĩ ndamenyire atĩ ndiarĩ na guoko kwa ũrĩo, gũtũ gwakwa kwa ũrĩo gũtiaiguaga, na riitho rĩakwa rĩa ũrĩo rĩarĩ hakuhĩ gũtumumara.

 O na thutha wa gũtihangio ũguo, rĩrĩa ndoimire thibitarĩ ndacokire gĩkundi-inĩ gitũ kĩa eki-naĩ. No kahinda kanini thutha ũcio, nĩ ndanyitirũo nĩ thigari na ngĩikio njera. Ndĩ kũu, ũrata wakwa hamwe na andũ arĩa twarĩ gĩkundi-inĩ kĩmwe nĩ warũmire. Twatindaga tũgĩka maũndũ hamwe mũthenya mũgima—kuuma rũcinĩ rĩrĩa twaambagĩrĩria kũgucia bangi, o nginya rĩrĩa tũrĩthiĩ gũkoma.

 Leonardo nĩ aanjeereire ndĩ njera. Rĩrĩa twaaragia, nĩ oorotire tattoo yarĩ guoko-inĩ gwakwa kwa ũrĩo. Akĩnjũria ũũ: “Hihi nĩ ũĩ kĩrĩa tũturumo tũtũ tũtatũ tũrũgamĩrĩire?” Na niĩ ngĩmwĩra, “Ĩĩ nĩ njũĩ, tũrũgamĩrĩire ngomanio, ndawa cia kũrebia, na nyĩmbo cia rock and roll.” No Leonardo akĩnjĩra ũũ: “Niĩ ingiuga tũrũgamĩrĩire thibitarĩ, njera, na gĩkuũ. Ũrarĩ thibitarĩ na rĩu ũrĩ njera. Na nĩ ũĩ ũndũ ũrĩa ũkũrũmĩrĩra.”

 Ciugo icio cia Leonardo nĩ ciamakirie mũno. Ooigĩte ũrĩa kũrĩ. Kũgerera mũtũũrĩre wakwa, ndeyenjagĩra mbĩrĩra yakwa mwene. Leonardo akĩnjũria kana no nyende kwĩruta Bibilia hamwe nake na ngĩtĩkĩra. Maũndũ marĩa nderutire kuuma Bibilia-inĩ nĩ maatũmire ngarũrĩre mũtũũrĩre wakwa. Kwa ngerekano, Bibilia yugaga atĩ “thiritũ njũru nĩ ithũkagia mĩtugo mĩega.” (1 Akorintho 15:33) Kwoguo ũndũ wa mbere ndabatarire gwĩka nĩ gũcaria arata angĩ. Nĩ ũndũ ũcio, ngĩtiga gũthiaga mĩcemanio ya gĩkundi kĩu, na ithenya rĩa ũguo ngĩambĩrĩria gũthiaga mĩcemanio ya Aira a Jehova ĩrĩa yekagĩrũo njera thĩinĩ. Ndĩ mĩcemanio-inĩ ĩyo ya Aira a Jehova, nĩ ndacemanirie na mũndũ wohetwo wetagwo Andrés, ũrĩa wabatithĩtio agatuĩka Mũira wa Jehova arĩ o njera. Akĩnyita ũgeni tũrĩanĩre irio cia rũcinĩ hamwe nake. Kuuma hĩndĩ ĩyo, mũthenya wakwa ndwambagĩrĩria na kũgucia bangi. Ithenya rĩa ũguo, tũrĩ na Andrés, twaaragĩrĩria mũhari wa Bibilia o rũcinĩ.

 O na ihenya, andũ a gĩkundi kĩu makĩona atĩ nĩ ndekaga mogarũrũku. Nĩ ũndũ ũcio, mũtongoria ũmwe wa gĩkundi kĩu akĩnjĩra atĩ nĩ eendaga kwaria na niĩ. Ngĩĩtigĩra mũno. Ndiamenyaga ũrĩa angĩanjĩkire amenya ũrĩa ndendaga gwĩka, tondũ ũkoragwo ũrĩ ũndũ mũritũ mũno kuuma gĩkundi-inĩ kĩa eki-naĩ. Akĩnjĩra ũũ: “Nĩ tuonete atĩ rĩu ndũkaga mĩcemanio-inĩ itũ no ũthiaga mĩcemanio-inĩ ya Aira a Jehova. Kaĩ ũrabanga gwĩka atĩa?” Ngĩmwĩra atĩ ndendaga gũthiĩ na mbere kwĩruta Bibilia na kũgarũrĩra ũtũũro wakwa. Nĩ ndagegire mũno tondũ aanjĩrire atĩ gĩkundi kĩu nĩ kĩngĩatĩire itua rĩakwa ingĩonanirie biũ atĩ nĩ ndĩrenda gũtuĩka Mũira wa Jehova. Agĩcoka akĩnjĩra ũũ: “Angĩkorũo biũ nĩ ũrenda kwĩruta ũhoro wĩgiĩ Ngai, thiĩ na mbere kũnyitanĩra na Aira a Jehova. Tũrerĩgĩrĩra atĩ nĩ ũgũtiga gwĩka maũndũ moru. Nĩ wĩkĩte wega. Ũrĩ njĩra-inĩ ĩrĩa yagĩrĩire. Aira a Jehova no magũteithie mũno. Nĩ nderutaga hamwe nao ndĩ Amerika (US) na andũ amwe a famĩlĩ itũ nĩ Aira a Jehova. Ndũgetigĩre, thiĩ na mbere.” Ndarĩ o na guoya, no nĩ ndakenire mũno. Ngĩcokeria Jehova Ngai ngatho ngoro-inĩ yakwa. Ndaiguaga ndariĩ ta kanyoni karekereirio thutha wa kũhingĩrũo, na ngĩtaũkĩrũo nĩ ciugo ici cia Jesu: “Nĩ mũkũmenya ũhoro ũrĩa wa ma, naguo ũhoro ũrĩa wa ma ũmũkũũre ũkombo-inĩ.”—Johana 8:32.

 O na kũrĩ ũguo, arata amwe arĩa ndarĩ nao tene nĩ maangeragia na njĩra ya kũhe ndawa cia kũrebia. Kwaria ma, rĩmwe na rĩmwe nĩ ndatooragio ngacokerera. No nĩ ũndũ wa kũhoya mũno, thutha wa ihinda nĩ ndahotire gũtooria mĩtugo ĩyo mĩũru.—Thaburi 51:10, 11.

 Thutha wa kũrekererio kuuma njera, andũ aingĩ meeciragia atĩ nĩ ingĩacokereire mũtũũrĩre wakwa wa hau kabere, no ndiekire ũguo. Handũ ha ũguo, nĩ ndacokaga njera kaingĩ kũhunjĩria andũ arĩa moohetwo maũndũ marĩa nderutĩte kuumana na Bibilia. Mũthia-inĩ, arata arĩa ndarĩ nao tene nĩ meetĩkirie atĩ nĩ ndagarũrũkĩte. No ũndũ wa kĩeha nĩ atĩ, ũguo tiguo kwarĩ harĩ andũ arĩa maarĩ thũ ciakwa tene.

 Mũthenya ũmwe thiĩte kũhunjia, tũrĩ na mũrũ wa Ithe witũ ũrĩa twahunjagia nake nĩ twathiũrũrũkĩirio o rĩmwe nĩ andũ maarĩ na matharaita a gĩkundi kĩmwe kĩa eki-naĩ twarĩ ũthũ nao tene, na meendaga kũnjũraga. Mũrũ wa Ithe witũ ũcio akĩmataarĩria na njĩra ya gĩtĩo no arĩ na ũcamba atĩ nĩ ndatigĩte kũnyitanĩra na gĩkundi kĩu kĩa eki-naĩ. Hĩndĩ ĩyo na niĩ nderutanagĩria gũikara hooreire. Thutha wa kũhũũra na kũhe mũkaana ndikanacoke gĩcigo-inĩ kĩu rĩngĩ, arũme acio makĩiga matharaita mao thĩ na makĩreka tũthiĩ. Bibilia nĩ yandeithĩtie biũ kũgarũrĩra ũtũũro wakwa. Korũo nĩ tene nĩ ingĩageretie kwĩrĩhĩria. No rĩu nĩ njathĩkagĩra ũtaaro ũyũ ũrĩ thĩinĩ wa 1 Athesalonike 5:15: “Tigagĩrĩrai atĩ gũtirĩ mũndũ ũrarĩha ũũru na ũũru kũrĩ mũndũ o wothe, no hingo ciothe thingatagai maũndũ mega gatagatĩ-inĩ kanyu na harĩ andũ arĩa angĩ othe.”

 Kuuma rĩrĩa ndatuĩkire Mũira wa Jehova nĩ ndĩrutanagĩria gũkorũo ndĩ mwĩhokeku. No ũndũ ũcio ndũkoretwo ũrĩ mũhũthũ. O na kũrĩ ũguo, nĩ ũndũ wa gũteithio nĩ Jehova Ngai, ũtaaro wa Bibilia, na arata arĩa ngĩte nao, nĩ hotete gwĩka ũguo. Ndingĩenda gũcokerera ciĩko ciakwa cia hau kabere.—2 Petero 2:22.

 Tene nĩ ndahũthagĩra ũhinya na nĩ ndarakaraga mũno. Ndĩ na ma atĩ ndingĩrĩ muoyo korũo nĩ ndathiire na mbere na mũtũũrĩre ũcio mũũru. Maũndũ marĩa ndĩrutĩte kuuma Bibilia-inĩ nĩ mandeithĩtie kũgarũrũka. Nĩ ndatiganire na maũndũ moru marĩa ndekaga. Nĩ ndĩrutĩte gũikara na thayũ hamwe na andũ arĩa maarĩ thũ ciakwa tene. (Luka 6:27) Na rĩu nĩ ngoragwo na arata mandeithagia gũkũria ngumo njega. (Thimo 13:20) Nĩ ngenagĩra ũtũũro ũrĩ na muoroto, ngĩtungatĩra Ngai ũkoragwo ehaarĩirie kũnjohera maũndũ mothe moru ndaneka.—Isaia 1:18.

 Mwaka wa 2006, nĩ ndathiire cukuru ya kũmenyeria Akristiano arĩa mataingĩrĩte thĩinĩ wa kĩhiko. Mĩaka ĩigana ũna thutha ũcio, nĩ ndahikirie mũtumia wakwa nyendete, na tũrĩ hamwe, nĩ tũrarera mũirĩtu witũ. Rĩu hũthagĩra mahinda maingĩ ngĩruta andũ arĩa angĩ motaaro ma Bibilia marĩa maandeithirie. Ningĩ nĩ ndungataga ndĩ mũthuri wa kĩũngano thĩinĩ wa kĩũngano gitũ, na nĩ ndĩrutanagĩria gũteithia andũ ethĩ metheme gwĩka mahĩtia ta marĩa ndekire rĩrĩa ndaiganaga tao. Handũ ha kwĩyenjera mbĩrĩra yakwa mwene, rĩu ndĩĩhaaragĩria nĩ ũndũ wa ũtũũro wa tene na tene ũrĩa Ngai eranĩire thĩinĩ wa Bibilia.