Thutha wa Zarina kũbatithio agĩtuĩka Mũira wa Jehova, nĩ ooimire Russia agĩcoka bũrũri wao gĩcigo-inĩ gĩa Central Asia, arĩ na wendi mũnene wa kũruta airĩtu ake wĩtĩkio wake. Tondũ ndaarĩ na mbeca nyingĩ, aaikaraga nyũmba ya rumu ĩmwe hamwe na aciari ake na mũrũ wa nyina na mũtumia wake. Aciari ake maamwĩrire ndakarute ciana ciake ma cia Bibilia. Ningĩ nĩ meerire airĩtu ake matikarĩrĩrie ũhoro wa Bibilia hamwe na mami wao.

 Zarina nĩ eeciririe mũno ũrĩa angĩekire nĩguo ateithie airĩtu ake kũmenya ũhoro wĩgiĩ Jehova. (Thimo 1:8) Nĩ ũndũ ũcio akĩhoya Jehova mũno, akĩmwĩra amũhe ũtongoria na ũũgĩ. Zarina agĩcoka agĩka kũringana na mahoya make na njĩra ya gũthiaga kũnogora magũrũ hamwe na airĩtu ake na akameera ũhoro wĩgiĩ magegania ma ũũmbi. Ũndũ ũcio nĩ wateithirie airĩtu acio magĩe na wendi wa kũmenya Mũũmbi.

 Zarina agĩcoka agĩciria njĩra ĩrĩa angĩahũthĩrire gũkũria wendi ũcio makĩria akĩhũthĩra ibuku rĩa Bibilia Ĩrutanaga Atĩa Kũna? * Ooyaga tũratathi akandĩka ibungo na ciũria o ũrĩa irĩ kuuma ibuku-inĩ rĩu. Ningĩ nĩ oongagĩrĩra ciugo cigana ũna nĩguo ateithie airĩtu ake gũtaũkĩrũo wega makĩria nĩ ũhoro ũcio. Aacokaga akahitha tũratathi tũu hamwe na karamu rungu rwa macini ya kũhũũra nguo ĩrĩa yarĩ mbabu. Airĩtu acio mathiĩ mbabu, maathomaga ibungo icio na makandĩka macokio mao.

 Kũgerera njĩra ĩyo, Zarina nĩ aahotire gũthoma icunjĩ igĩrĩ cia ibuku rĩa Bibilia Ĩrutanaga hamwe na airĩtu ake matanathamĩra kũndũ kũngĩ kũrĩa maaikaraga marĩ o atatũ. Marĩ kũu, nĩ aahotaga kũrera airĩtu ake wega atekũingĩrĩrũo nĩ mũndũ. Mweri wa Oktomba 2016, airĩtu acio eerĩ nĩ maabatithirio, na magĩkena mũno tondũ nyina nĩ aahũthĩrĩte ũũgĩ na ũtaũku nĩguo amahe irio cia kĩĩroho.