Aca. Handũ ha gũcenjia Bibilia nĩguo ĩtwarane na morutani maitũ, ithuĩ nĩ ithuĩ tũcenjagia morutani maitũ rĩrĩa tuona matiratwarana biũ na ũrĩa Bibilia yugĩte.

 Nĩ twathuthurĩtie Bibilia kwa ihinda iraihu mbere kũruta Bibilia ya New World Translation of the Holy Scriptures mwaka-inĩ wa 1950. Twahũthagĩra Bibilia iria ciarĩ kuo hĩndĩ ĩyo na tũgĩcihũthĩra gũthondeka maũndũ marĩa twĩtĩkĩtie. Ta reke tuone maũndũ mamwe Aira a Jehova makoretwo metĩkĩtie kwa ihinda iraihu, nĩguo wĩyonere we mwene kana nĩ maratwarana na Bibilia.

1.   Ũrĩa twĩtĩkĩtie: Ũrutani wa Ũtatũ ndũrĩ thĩinĩ wa Bibilia. Ngathĩti ya Julaĩ 1882 ya Zion’s Watch Tower yaugĩte ũũ: “O na gũtuĩka athomi aitũ nĩ moĩ atĩ nĩ twĩtĩkĩtie Jehova, Jesu, na roho Mũtheru, nĩ tũreganaga biũ na ũrutani ũtarĩ wa kĩĩmaandĩko wa atĩ gũkoragwo na Ngai atatũ harĩ mũndũ ũmwe, kana ta ũrĩa andũ amwe maugaga, Ngai ũmwe harĩ andũ atatũ.”

     Ũrĩa Bibilia yugaga: “Jehova Ngai witũ, we wiki nowe Jehova.” (Gũcokerithia Maathani 6:4, The Bible in Gikũyũ) “Ithuĩ tũrĩ na Ngai o ũmwe, na nĩ we Ithe witũ ũrĩa wombire indo ciothe, na tũtũũraga muoyo nĩ ũndũ wake; o na kũrĩ Mwathani o ũmwe tu, nĩ we Jesũ Kristũ, ũrĩa wahũthĩrirwo nĩ Ngai indo ciothe ikĩũmbwo, na nĩ we ũtũhotithagia gũtũũra muoyo.” (1 Akorintho 8:6, The Holy Bible in Gĩkũyũ Language) O na Jesu we mwene aaugire ũũ: “Nĩgũkorwo Baba nĩ mũnene kũrĩ niĩ.”—Johana 14:28, Holy Bible in Gĩkũyũ.

2.   Ũrĩa twĩtĩkĩtie: Gũtirĩ mwaki wa gũcina andũ tene na tene. Ngathĩti ya Zion’s Watch Tower ya Juni 1882 yagwetete rĩandĩko rĩa Aroma 6:23 kuuma Bibilia-inĩ ya King James Version rĩrĩa riugaga “Mũcara wa Mehia nĩ Gĩkuũ,” ĩgĩcoka ĩkiuga ũũ: “Ciugo icio nĩ hũthũ na nĩ irataũkĩka wega. Nĩ ũndũ wa kũmakania kuona atĩ andũ aingĩ arĩa maugaga nĩ metĩkĩtie atĩ Bibilia nĩ Kiugo kĩa Ngai nĩ makararagia ũhoro ũcio wa ma, na magathiĩ na mbere kũrutana atĩ Bibilia yugaga mũcara wa mehia nĩ muoyo wa tene na tene kũndũ andũ maranyamarĩka.”

     Ũrĩa Bibilia yugaga: “Roho ũrĩa wĩhagia nĩguo ũgakua.” (Ezekieli 18:4, 20, The Bible in Gikũyũ) Kwoguo Bibilia ĩrutanaga atĩ maumĩrĩra ma andũ arĩa mareganaga na Ngai nĩ “kwanangwo kũrĩa gwa tene na tene,” no ti kũherithio tene na tene.—2 Athesalonike 1:9, The Holy Bible in Gĩkũyũ Language.

3.   Ũrĩa twĩtĩkĩtie: Ũthamaki wa Ngai nĩ thirikari ya biũ, ti ũndũ ũkoragwo ngoro-inĩ. Ngathĩti ya Zion’s Watch Tower ya Dicemba 1881 ĩkĩaria ũhoro wĩgiĩ Ũthamaki wa Ngai yaugĩte ũũ: “Hatarĩ nganja, rĩrĩa ũthamaki ũcio ũgakorũo ũkĩhandwo nĩ ũkeeheria mothamaki mothe ma thĩ.”

     Ũrĩa Bibilia yugaga: “Hĩndĩ ya athamaki acio-rĩ, nĩguo Ngai-wa-Igũrũ akahanda ũthamaki ũrĩa ũtagacoka gũthario o rĩ, o rĩ, o na kana wathani waguo ũneanwo moko-inĩ ma andũ angĩ, no nĩ kũmemenda ũkamemenda mothamaki macio mangĩ, ũmanine biũ, naguo ũtũũre wĩhandĩte tene na tene.”—Danieli 2:44, The Bible in Gikũyũ.

 Aca, tondũ no tũhũthagĩra Bibilia ingĩ nyingĩ rĩrĩa tũraruta wĩra witũ wa kũhunjia. Kwa ngerekano, o na gũtuĩka nĩ tũheanaga Bibilia ya New World Translation hatarĩ marĩhi rĩrĩa tũraruta andũ Bibilia, nĩ tũkenaga kwĩruta Bibilia nginya na andũ arĩa mendaga kũhũthĩra Bibilia ingĩ.