Hebreu ag mỹ carta 10:1-39
10 Ẽg tỹ Judeu ag jykre ve kỹ ẽg tóg ve sĩ han tĩ, Topẽ tỹ ẽg mỹ nén han sór mũ ti. Prỹg kar ki ag tóg Topẽ mỹ tãnh kỹ pũnꞌ, tãnh kỹ pũnꞌ he tĩ. Hã ra tóg ag mẽg tỹ ag jagfy ter mũ ra ag jykre tỹ háꞌ he ki kagtĩg ja nĩgtĩ.
2 Ag tỹ Topẽ mỹ nén ũ pũn mũ ra ag tóg Topẽ vĩ mranh mãnꞌ, mranh mãnꞌ he tĩ. Ag tỹ mranh tũ nĩ ra ag tóg, ti mỹ pũn mãn ke tũ nĩ vẽ. Hã ra ag tóg ti vĩ mranh tĩ. Hã kỹ ag tóg, ti mỹ nén pũn tovãnh tũ pẽ nĩgtĩ, ti tỹ ag mỹ vẽnh pãte fón tovãnh tũ nĩ jé gé.
3 Prỹg kar ki ag tóg, Topẽ mỹ pũn tugrĩn, ag tỹ ti vĩ mranh ja ẽn mĩ ẽkrég tĩ.
4 Hỹ, monh kyvénh vỹ, ẽg tỹ Topẽ vĩ mranh tỹ tũꞌ henh ke tũ pẽ nĩ, cabrito tỹ ẽg jagfy ter mũ ẽn ti ke gé.
5 Hã kỹ Cristo tóg, ti tỹ ga kri mur ken kỹ Topẽ mỹ: “ag tỹ ag mẽg tãnh kỹ pũn mũ ra tóg tỹ nén ũ tũ nĩ ã mỹ,” he ja nĩ, “ag tỹ ã mỹ nén ũ ũ pũn mũ ra ke gé. Hã ra ã tóg inh mỹ inh fár ti nĩm, isỹ ag jagfy ter jé.
6 Ag tỹ ã mỹ ag mẽg pũn mũ ra tóg, ã mỹ sér tũ nĩ, ag tỹ ã mỹ nén ũ ũ pũn mũ ra. Ag tỹ ã vĩ mranh tag tỹ tũꞌ he ki kagtĩg tóg nĩ, ag tỹ ã mỹ nén pũn mũ tag.
7 Hã kỹ sóg ã mỹ: “ha vé, sỹ ã mỹ vẽnh fẽg ke vẽ,” he mũ, “isỹ ã tỹ inh ki nén ve sór mũ ẽn tỹ ã mỹ han jé,” he sóg mũ. Hã kỹ tóg rán kỹ nĩ, iso, ã vĩ rá ki,” he tóg, Cristo ti, Topẽ mỹ.
8 Ti mỹ tó vén kỹ tóg: “ag tỹ ã mỹ ag mẽg tãnh kỹ pũn mũ ra tóg ã mỹ sér tũ nĩ, ag tỹ ã mỹ nén ũ ũ pũn mũ ra,” he mũ. “Ag tỹ ã vĩ mranh tag tỹ tũꞌ he ki kagtĩg tóg nĩ,” he vén tóg. Hã ra tóg rán kỹ nĩ, Judeu ag tỹ Topẽ mỹ tag pũn jé. Ge ra Jesus tóg tag to: “nén ũ tũ vẽ,” he ja nĩ.
9 Tag tó kar kỹ tóg Topẽ mỹ: “ha vé, sỹ ã mỹ vẽnh fẽg ke vẽ, isỹ ã tỹ inh ki nén ve sór mũ ẽn tỹ ã mỹ han jé,” he mũ gé. Ti tỹ tag tó kỹ tóg Moisés jykre si ẽn tỹ tũꞌ he mũ, ũn tãg han jé, hã vỹ: Jesus jykre, he mũ.
10 Jesus tỹ Topẽ vĩ ki króm ja tugrĩn ẽg tóg ũri tỹ, Topẽ krẽ nỹtĩ ha. Jesus Cristo vỹ ẽg jagfy ter ja nĩ. Kỹ tóg ti ter pir ki ẽg név kajãm kãn. Kỹ Topẽ tóg, ẽg mỹ vẽnh pãte fón kãn mũ sir.
11 Ẽprã ke tỹ Topẽ tũ ki rĩr tĩ ag vỹ, kurã kar ki ag rãnhrãj han tĩ, Topẽ tũ ki rĩr jé. Kurã kar ki ag tóg, Topẽ mỹ ag mẽg tãnh kỹ pũn tĩ. Hã ra ag tỹ Topẽ mỹ nén pũn mũ ẽn pijé, ag tỹ Topẽ vĩ mranh tỹ tũꞌ he ja nĩgtĩ.
12 Ag jãvo Jesus Cristo vỹ vẽnh fẽg pir han. Ti ter tugrĩn tóg, ẽg tỹ Topẽ vĩ mranh ẽn tỹ tũꞌ he kãn. Kar kỹ tóg Topẽ pẽgja tá nĩ nĩ.
13 Tá tóg nĩ nĩ. Topẽ vỹ, ti kato vãsãnsãn mũ ag tỹ ti pẽn krẽm vin ke mũ. Ag sigse kỹ nỹtĩ to ken hã vẽ. Tag hã jãvãnh tóg nĩ nĩ, Jesus ti.
14 Ti tỹ vẽnh fẽg pir ẽn tugrĩn tóg, Topẽ krẽ kar ag krenkren han kãn huri, kỹ ẽg Topẽ mỹ sĩnvĩ nỹtĩ.
15 Topẽ kuprĩg vỹ, ẽg mỹ tag tó tĩ gé, ha mẽ:
16 “tag pãte sóg, ag mỹ vẽjykre tãg han ke mũ,” he tóg, ẽg jóg mág ti. “Vẽjykre tãg hã vẽ, ha mẽ. Isỹ nén to ag jyvẽn mũ ẽn tỹ sóg ag fe kã kã nĩm ke mũ. Kỹ tóg, sỹ ag krĩ ki rán ri ke nĩnh mũ sir. Kỹ ag tóg han sór ke mũ,” he tóg.
17 Tag tó kar kỹ tóg: “ag tỹ inh vĩ mranh ja ẽn mĩ ẽkrén mãn ke tũ inh nĩ ha. Ag jykre pãno ẽn mĩ ẽkrén mãn ke tũ pẽ inh nĩ ha,” he mũ gé.
18 Ha vé, Topẽ tỹ ẽg mỹ vẽnh pãte fón kỹ ẽg tóg ti mỹ, nén ũ pũn mãn ke tũ nĩ ha, ti tỹ ẽg mỹ vẽnh pãte fón kãn kỹ nĩn kỹ, ẽg tỹ ti vĩ mranh ja kar ẽn ti.
Ẽg tỹ Topẽ to krónh kenh ke tũ
19 Inh kanhkã, Jesus tỹ ẽg jagfy ter tugrĩn ẽg tóg, jatun mỹ Topẽ nĩg jafã tá jun ke mũ.
20 Jesus tỹ ẽg jagfy ter ẽn tóg, ti tỹ kur tỹ jãnkã ẽn fĩn rãm ri ke nĩ, ẽg tỹ ti nón fĩn rãm ri ke han jé, ẽg rĩnrĩr nỹtĩ jé. Topẽ ĩn krẽm kur tỹ jãnkã nĩfe ẽn vỹ, jaran ke kỹ sa nĩ, Jesus ter kỹ. Kỹ ẽg tóg ra ge há nỹtĩnh mũ ha.
21 Ẽg jagfy Topẽ tũ to pãꞌi mág vỹ, nĩ nĩ, hã vỹ: Jesus, he mũ. Topẽ jamã tá ke ẽn ag kar kri ke vỹ tỹ ti nĩ.
22 Kỹ jatun mỹ Topẽ mré vẽmén nĩ. Ti ki rã há han nĩ. Ãjag fe tỹ ti ki gem nĩ, ãjag tỹ ti nĩgja tá junjun jé. Ón kỹ ti ki ge sór tũg nĩ. Ẽg jykre pãno kar tỹ tóg tũꞌ hé, ẽg tỹ to jykrén mãn tũ nĩ jé. Ẽg jãnhkri han tóg, ẽg tỹ goj jãpri tỹ vẽnh kype ẽn ri ke. Kỹ ẽg há nỹtĩ.
23 Ti tỹ ẽg mỹ nén tó mũ ẽn mĩ ẽkrén nĩ. To krónh ke tũg nĩ, sỹ ãjag mỹ nén tó mũ ẽn to. Ve jé ẽg tóg ke mũ, ti tỹ ẽg mỹ nén tó mũ ẽn ti. Ũ tỹ ẽg mỹ tó ja ẽn vỹ, ón vãnh nĩgtĩ. Hã kỹ to krónh ke tũg nĩ.
24 Jagnẽ mĩ ẽkrén nĩ, ãjag tỹ jagnẽ jyvẽn jé. “Vẽnh kar to há nĩm nĩ,” hem nĩ jagnẽ mỹ. “Nén ũ há kar han nĩ,” hem nĩ gé jagnẽ mỹ.
25 Ũ ag tóg culto venh kãmũ vãnh nỹtĩgtĩ. Tag han tũg nĩ. Culto venh kãmũm nĩ. Kỹ jagnẽ jyvẽn nĩ, ãjag tar nỹtĩ jé. Ti kãtĩg mãn ke kurã vỹ kakó nĩ. Ve há ti tĩ ha, tag.
26 Ha vé, Topẽ vĩ mẽ kãn ẽg huri. Ẽg tỹ ti ki rã kar kỹ culto venh kãtĩ tũ nĩꞌ he kar Topẽ vĩ mranh sór kỹ mranh kỹ ũ tỹ ẽg jagfy kajãm mãn ke tóg tũ tĩ.
27 Hỹ, ẽg tỹ mranh sór kỹ mranh kỹ Topẽ vỹ, ẽg vóg kónãn pẽ han ke mũ. Pĩ tỹ tóg ag tỹ tũꞌ henh ke mũ, ũ tỹ ti kato vãsãnsãn mũ ag.
28 Ũ tỹ Moisés tỹ ẽg jyvẽn mũ mẽ jãvãnh ẽn tén ja ag tóg nĩgtĩ, Israel ag, ũn régre ag tỹ ti jykre pãno ve ja tugrĩn, ke tũ nĩ kỹ ũn tãgtũ ag. Ti jagãgtãn ja tũ ja ag nĩgtĩ, ũn jykre pãno ẽn.
29 Hã ki ẽg tóg vég mũ, Topẽ tỹ ẽg vóg kónãn pẽ han ke mũ ti, ẽg tỹ Topẽ kósin to é he kỹ. Ẽg tỹ ti vĩ mranh sór kỹ ẽg tóg ti kyvénh to é he tĩ, ti jykre to. Ẽg mỹ tóg tỹ nén ũ tũ nĩ sir, Topẽ kuprĩg tỹ ẽg jagãgtãn ja ẽn ti. Ũ tỹ tag han mũ vóg kónãn jé tóg ke mũ, ha vem nĩ.
30 Hã kỹ tóg: “ũn jykre pãno ag vóg kónãn jé sóg ke mũ, ag tỹ ag tỹ nén ũ kórég han mũ kajãm kãn jé,” he mũ. Ũ tỹ tag tó mũ ki kanhró ẽg tóg nỹtĩ mỹr. Hã ra tóg: “ti mré ke ag jykre tugnỹm jé tóg ke mũ,“ he ja nĩ gé.
31 Rĩr ti nĩ, Topẽ ti. Ti tỹ ẽg to jũ nĩn kỹ tóg jagy tãvĩ nĩ. Nén ũ jagy kar kãfór ti nĩ.
Ẽg tỹ to tar nỹtĩnh ke
32 Ãjag tỹ vãsỹ ti mỹ vẽnh fẽg vén ja ẽn mĩ ẽkrén nĩ. Ẽn kã ag tóg ãjag kato vãsãnsãn mág. Kỹ ãjag tóg ag to vẽsỹrénh, kysã tỹ hẽn ri ke ki, ãjag tỹ Topẽ vĩ mẽ vén ẽn kã. Hã ra ãjag tóg to krónh krónh ke ja tũ nĩgtĩ.
33 Ãjag kã ũ to ag tóg vĩ kónãn mágꞌ he ja nĩgtĩ, ẽn kã, Topẽ kato vãsãnsãn mũ ag. Kỹ ag tóg ãjag vóg kónãn gé. Kỹ vẽnh kar vỹ vé. Ãjag kã ũ vóg kónãn ja ag tóg nĩgtĩ. Kỹ tóg ãjag kar mỹ jagy tĩ ja nĩgtĩ, ãjag tỹ ag mré Jesus ki ge nỹtĩn kỹ.
34 Kỹ ag tóg ãjag kã ũ sigse ja nĩ gé. Kỹ ãjag tóg ũn sigse kỹ nỹtĩ ẽn ag jagãgtãn ja nĩgtĩ, ag tỹ ãjag mré Jesus ki ge kỹ nỹtĩn kỹ. Pãꞌi ag tỹ ãjag tỹ nén gég mũ ra tóg ãjag mỹ sér ja nĩgtĩ. Ãjag tỹ kanhkã tá nén ũ há tãvĩ ẽn venh ke hã mĩ ãjag tóg, ẽkrén ja nĩgtĩ. Ãjag tỹ kanhkã tá nén venh ke mũ ẽn vỹ tũꞌ henh ke tũ pẽ nĩ.
35 Kỹ ũri to krónh ke tũg nĩ gé. Ãjag tỹ ti to tar nỹtĩn kỹ ãjag tóg nén ũ há tãvĩ venh ke mũ, ha mẽ. Ãjag vẽsỹrénh ja ẽn kaja ri ke ve jé ãjag tóg ke mũ.
36 Ẽg tỹ ti tũ han to tar nỹtĩnh ke vẽ. Ẽg tỹ ti tovãnh sór ke tũ pẽ vẽ. Tag hã vỹ há nĩ. Kỹ ãjag tỹ Topẽ tỹ ẽg mỹ nén tó mũ ẽn han kãn kỹ nỹtĩn kỹ ãjag tóg venh ke mũ, ti tỹ ẽg mỹ nén ũ ven ke mũ ẽn ti.
37 Hã kỹ tag vỹ rán kỹ nĩ: “kãnhmar pẽ ti jun ke mũ, ũn kãtĩg ke mũ ẽn ti. Kãtĩg mé han jé tóg ke mũ, ha vem nĩ.
38 Kỹ ũ tỹ inh ki ge kỹ nỹtĩ ẽn ag hã vỹ, krenkren ke mũ, inh mré ke ẽn ag, isỹ ũn mỹ vẽnh pãte fón mũ ẽn ag. Jãvo ũ tỹ isovãnh mũ ẽn vỹ inh mỹ kórég nĩnh mũ,” he tóg, Topẽ ti.
39 Ẽg pijé ti tovãnh ke mũꞌ. Kỹ ẽg tóg, ũ tỹ ti tovãnh mũ ẽn ag vãgfor ẽn ri ke han ke tũ nĩ gé. Ti ki ge kỹ ẽg tóg nỹtĩ, hã kỹ ẽg krenkren ke mũ.
