Inh sῖ kã, isỹ ka kar, nén tánh kar, kar misu ag to há tῖ vã. Inh ẽmã tỹ Jyväskylä nῖ, Finlândia central tá. Ẽmã ẽn ki, nãn ag kar goj nig ag vỹ sῖnvῖ tãvῖ nῖ. Inh família tỹ pygsa mũ vã, ẽmã ẽn tá. Isỹ mẽg ag to há tãvῖ gé. Inh sῖ kã, isỹ mῖg sῖ kar jo kasor kar ve kỹ, isỹ ag nhun ke sór tῖ vã. Isỹ mog nῖ kỹ, isỹ ũn ag tỹ mẽg vóg kónãn tῖ ve kỹ, isỹ ag to jũ jagy tῖ vã. Kar kỹ, isóg organização tỹ misu ag ki rῖr tῖ ki kanhrãn mũ. Kỹ, isóg ag mré vẽnhmãn mũ.

Ẽg tỹ campanha ag hyn han tῖ vã, mẽg ag jy nῖgãn tῖ jé. Ẽg tóg ũn ag tỹ nén fár tỹ kur ag vẽne ke tῖ, ag kato vãsãnsãn mũ vã, kar laboratório ag ke gé, ag tỹ misu ag vóg kónãn tugnῖn. Kar ẽg tóg organização han mũ, ẽg tỹ misu ag jy nῖgãn nῖ jé. Ẽg tỹ jũ jagy nỹtῖ vã, hã tugnῖn, porisa tỹ ẽg mỹ kórég tῖ vã. Inh se e han ag.

Isóg to vãsãn mũ, ũn ag tỹ mẽg ag kir tῖ jé, isóg nén ũꞌũ to kanẽ jur tῖ gé. Hã tũgnῖn, kar kỹ isóg Anistia internacional ti kar Greenpeace ti mré vẽnhmãn mũ. Tag vỹ inh mỹ há nῖ vã. Kỹ, isóg ũn ag tỹ jãnkamy tũ nỹtῖ, ũn ag pi vãjãn nỹtῖ kar ũn ag tỹ jagtar nỹtĩ ajũna sõr mũ.

Hã ra, pipir tỹ pipir, isóg ki kanhró mũ, inh pi nén ũ jagy ag tỹ tũꞌ ke mũ. Jérῖn mỹ, ag tỹ vãsãnsãn tῖ vã, nén ũ jagy ag tỹ tũꞌ ke jé, nén ũ jagy ag hã ki mũ tῖ. Inh mỹ, ũn ag pi jagnẽ to kanẽ jur tῖ. Kar inh pi vẽnh kar ajũna ke tῖ vã. Isóg fe krój tag tũgnῖn.

Inh mỹ kórég sỹ tῖ tῖ. Kỹ isỹ Topẽ kar Topẽ Vῖ Rá to jykrén tῖ vã. Jeová Kãmén Fã ag tóg inh mỹ Topẽ Vῖ Rá to kanhrãn huri. Jérῖn mỹ, isỹ ki kanhró nῖ vã, ag tỹ tỹ ũn fe há nỹtῖ vã, kar ũn ag to kanẽ jur tῖ vã, inh pi Topẽ vῖ ki króm ver.

Kỹ isóg Topẽ Vῖ Rá to ke pẽnjẽg mũ. Tag vỹ inh mỹ há han mũ. Ti kã ki, isóg to ke mũ, ẽg tỹ misu ag ki rῖr ke nỹtῖ. Provérbios 12:10 ki, vỹ ẽg mỹ ke tῖ: “Ũn jykre há han mũ ag vỹ ag mẽg ki rῖr há han ke mũ”. Isóg ki kanhró mũ gé, Topẽ pi nén ũ kórég han tῖ, ũn ag mỹ. Ũn e ag tỹ Topẽ vĩ jẽmẽ sór tũ nỹtĩ, hã tugnĩn ẽg tỹ vẽsỹrinhrénh gy tĩ. Isỹ to kanhrãn kỹ, Jeová to há ti kar Jeová krĩ kusa ti to, tag vỹ inh mỹ há han nĩ vã.— Salmo 103:8-14.

Tag pãte, isóg Jeová Kãmén Fã ag mỹ livro tỹ O Que a Bíblia Realmente Ensina? to vĩ mũ. Vẽsỹmér ke tĩ, Jeová kãmén fã régre tóg inh ĩn ra mũ, inh mỹ Topẽ Vĩ Rá to kanhrãn jé. Kar kỹ, isóg Vẽnhmãn han fã tá ra tĩg nĩgtĩ. Kỹ isỹ nén ũ ag ki kanhrãn ẽn vỹ inh mỹ há han mũ.

Topẽ Vĩ Rá tỹ inh ajũna ké, isỹ kron kamã han tũ nĩ jé, kar sĩgar vóg tũ nĩ gé. Isóg vĩ há vãmén mũ, ũn ag mỹ, kar porisa ag jẽmẽ há han ke gé. (Roma 13:1) Isỹ ũn tỹtá e fag mré nỹ tĩ ra isỹ tovãnh mỹ.

Organização tỹ ũn ag jagtar ki rĩr tĩ kar organização tỹ misu ag ki rĩr tĩ ag, isỹ ag tovãnh, tag vỹ inh mỹ jagy nĩ vã. Hã ra isóg ki kanhrãn mũ, Topẽ pãꞌi tãvĩn vỹ nén ũ jagy ag tỹ tũ’ kenh ke mũ. Kỹ, isỹ ũn ag mỹ Topẽ vĩ to kãmén nĩ vã, ag tỹ Topẽ pãꞌi to kanhrãn nỹtĩ jé. — Mateus 6:33.

Tỹ sỹ militante nĩ kỹ, isỹ to jykrén tĩ vã, ũn ag tỹ tỹ jykre há nỹtĩ, ke tũ nĩn kỹ ũn ag tỹ tỹ jykre kórég nỹtĩ. Isỹ ũn ag jykre kórég kato vãsãn sór nĩ vã. Hã ra Topẽ Vĩ Rá tỹ inh ajũna ké, isỹ tag han tũ nĩ jé, inh pi ũn ag to kry tĩ. Ũri, isỹ vãsãn nĩ, vẽnh kar to há nĩ jé. (Mateus 5:44) Hã tugnĩn, isỹ ũn ag mỹ Topẽ vĩ to kãmén tĩ, isỹ ag to há ven nĩ jé. Tag vỹ ũn ag mỹ há han tĩ, ag tỹ jatun mỹ nỹtĩ kar ag tỹ nén ũ há ag vigvenh ke mũ tugnĩn.

Isỹ Jeová mré vĩ nĩ kỹ, nén ũ ag tỹ inh mỹ krĩ kufy han mũ to, isỹ krĩ tỹ kãnhvy nĩ. Isỹ ki kanhró pẽ nĩ, misu ag kar ẽprã ke ag vẽsỹrinhrénh tỹ tũꞌ kenh ke mũ, kar ga pi hã re kã tũꞌ kenh ke mũ. Jãvo Jeová tỹ ga há han ke mũ, ti pãꞌi tỹ. (Isaías 11:1- 9) Isỹ mỹ sér nĩ, isỹ tag ki kanhró tũgnĩn, kar isỹ ũn ag mỹ tag to kãmén tĩ gé. Ũri, isỹ ki kanhró nĩ, Topẽ vỹ ti Pãꞌi tỹ nén ũ kar ki han ke mũ.