Yezu gulusaka bantu ya ntima-mbote ntangu yandi tambikaka luzingu na yandi sambu na bantu. (Matayo 20:28) Yo yina, Biblia ke bingaka Yezu “Ngulusi ya nsi-ntoto.” (1 Yoane 4:14) Biblia ke tuba mpi nde: “Luguluku kele ve na muntu ya nkaka, sambu kele ve ti zina ya nkaka na ntoto yina bo me pesaka na kati ya bantu, yina beto fwete guluka na nzila na yo.”—Bisalu 4:12.

 Yezu ‘mekaka lufwa sambu na bantu yonso’ yina ke monisa lukwikilu na yandi. (Baebreo 2:9; Yoane 3:16) Na nima, “Nzambi tedimisaka yandi na bafwa,” mpi Yezu vutukaka na zulu na nitu ya kimpeve. (Bisalu 3:15) Na zulu, Yezu lenda “gulusa mpi kibeni bantu yina ke pusana pene-pene na Nzambi na nzila na yandi, sambu yandi kele ntangu yonso na luzingu sambu na kubondila sambu na bo.”—Baebreo 7:25.

Sambu na nki Yezu fwete bondila sambu na beto?

 Beto yonso kele bantu ya masumu. (Baroma 3:23) Disumu ke kangaka bantu nzila ya kuwakana ti Nzambi, mpi yo ke nataka na lufwa. (Baroma 6:23) Kansi Yezu kele “nsadisi” ya bantu yina ke monisaka lukwikilu na kimenga na yandi. (1 Yaone 2:1) Yandi ke bondilaka sambu na bo sambu Nzambi kuwa bisambu na bo mpi kulolula masumu na bo na nsadisa ya kimenga ya lufwa na yandi. (Matayo 1:21; Baroma 8:34) Nzambi ke ndimaka mambu yina Yezu ke lombaka yandi sambu yo ke wakana ti luzolo na yandi. Nzambi tindaka Yezu sambu “nsi-ntoto kuguluka na nzila na yandi.”—Yoane 3:17.

Keti kukwikila na Yezu mpamba me fwana sambu na kuguluka?

 Ve. Beto fwete kwikila na Yezu sambu na kuguluka, kansi kele ti mambu ya nkaka yina beto fwete sala. (Bisalu 16:30, 31) Biblia ke tuba nde: “Mutindu nitu ya me konda mpeve kele ya kufwa, mutindu mosi mpi lukwikilu yina me konda bisalu kele ya kufwa.” (Yakobo 2:26) Sambu na kuguluka beto fwete:

•   Longuka mambu ya me tala Yezu mpi Yehowa, Tata na yandi.—Yoane 17:3.

•   Kukwikila na bo.—Yoane 12:44; 14:1.

•   Kuzitisa bansiku na bo sambu na kumonisa lukwikilu na beto. (Luka 6:46; 1 Yoane 2:17) Yezu tubaka nde bantu yonso ve ya ke bingaka yandi “Mfumu” ta guluka, bantu ya ta guluka kele kaka bayina “ke salaka luzolo ya Tata na [yandi] yina kele na zulu.”—Matayo 7:21.

•   Landa kumonisa lukwikilu ata beto ke kutana ti bampasi. Yezu monisaka yo pwelele ntangu yandi tubaka nde: “Muntu yina ta kanga ntima tii na nsuka ta guluka.”—Matayo 24:13.