Ve, ntoto ta fwa ve ata fioti, yo ta zika ve ata fioti na tiya mpi bo ta yingisa yo ve ata fioti na ntoto ya nkaka. Biblia ke tubaka nde Nzambi salaka ntoto sambu bantu kuzinga mvula na mvula na zulu na yo.

•   “Bantu ya lunungu ta baka ntoto, mpi bo ta zinga kimakulu na zulu na yo.”—Nkunga 37:29.

•   “[Nzambi] me tedimisaka ntoto na bafondasio na yo; yo ta katuka ve na kisika na yo mvula na mvula.”—Nkunga 104:5.

•   “Ntoto ke bikalaka kimakulu.”—Longi 1:4.

•   “Muntu yina yidikaka ntoto, Muntu yina salaka yo, yina tulaka yo ngolo, . . . gangaka yo ve kaka sambu na mpamba, kansi yina salaka yo sambu bantu kuzinga.”—Yezaya 45:18.

 Nzambi ta bika ve nde kubeba ya mupepe, bitumba mpi mambu ya nkaka ya bantu ke salaka kufwa kibeni ntoto. Kansi, yandi ta “[fwa] bantu yina ke bebisaka ntoto.” (Kusonga 11:18) Inki mutindu yandi ta sala yo?

 Nzambi ta katula bimfumu yai ya bantu ya ke kukaka ve kutanina ntoto mpi yandi ta tula Kimfumu mosi ya mbote kibeni yina kele na zulu. (Daniele 2:44; Matayo 6:9, 10) Yezu Kristu, Mwana ya Nzambi, muntu kele Ntotila ya Kimfumu yango. (Yezaya 9:6, 7) Ntangu Yezu vandaka na ntoto, yandi salaka mambu ya kuyituka. Yandi kangaka mupepe ya ngolo mpi bitembo ya nzadi. (Marko 4:35-41) Sambu Yezu muntu kele Ntotila ya Kimfumu ya Nzambi, yandi ta vanda na kiyeka ya mingi na zulu ya ntoto mpi ya bima yonso yina kele na zulu na yo. Yandi ta yidika ntoto to ta kumisa yo ya mpa. Yandi ta sala nde mambu na ntoto kuvutuka diaka mutindu yo vandaka ntete na kilanga ya Edeni.—Matayo 19:28; Luke 23:43.

 Ve, yo ke tubaka ve mambu yai. Bantu ke kumaka ti bangindu yai ya luvunu sambu bo ke bakisaka ve mbote mambu yai ya kele na 2 Piere 3:7, ya ke tuba nde: “Zulu mpi ntoto ya ntangu yai, bo me bumba yo sambu na kufwa yo na tiya.” Beto tala mambu zole ya mfunu yina ke sadisa beto na kubakisa ntendula ya verse yai:

1.   Biblia ke sadilaka bangogo “zulu,” “ntoto” mpi “tiya” sambu na kutubila mambu mingi. Mu mbandu, Kuyantika 11:1 ke tuba nde: “Ntoto ya mvimba vandaka kutuba kaka ndinga mosi.” Na verse yai, “ntoto” ke tendula bantu.

2.   Baverse ya kele na ntwala mpi na nima ya 2 Piere 3:7 ke tendula mbote bangogo zulu, ntoto mpi tiya ya Biblia me sadila na verse 7. Verse 5 mpi  6 ke fwanisa yo ti Mvula ya Ngolo ya bilumbu ya Noa. Na ntangu yina, nsi-ntoto yina ya ntama fwaka, kansi ntoto fwaka ve. Mvula ya Ngolo fwaka “ntoto” disongidila bantu ya mubulu. (Kuyantika 6:11) Yo fwaka mpi “zulu,” disongidila bantu yina vandaka kuyala bantu ya ntangu yina. Ya kieleka bantu ya mbi fwaka kansi ntoto fwaka ve. Noa ti dibuta na yandi gulukaka ntangu Nzambi fwaka nsi-ntoto ya ntangu yina mpi bo bantu landaka kuzinga na ntoto na nima ya Mvula ya Ngolo.—Kuyantika 8:15-18.

 Masa ya Mvula ya Ngolo fwaka bantu. Mutindu mosi mpi, “tiya” yina 2 Piere 3:7 ke tubila, ta fwa bantu ya mbi kansi ve Ntoto. Nzambi ke sila “zulu ya mpa mpi ntoto ya mpa” kisika yina “lunungu ta vanda.” (2 Piere 3:13) “Zulu ya mpa,” disongidila kimfumu ya mpa to Kimfumu ya Nzambi ta yala “ntoto ya mpa” to kimvuka mosi ya mpa ya bantu. Ntangu Kimfumu yango ta yala, ntoto ta kuma paladisu, kisika mosi ya ngemba.—Kusonga 21:1-4.