Ata Biblia ke tubilaka ve nsaka ya mbongo na bunda, na nsadisa ya minsiku ya Biblia, beto ke bakisa nde sambu na Nzambi kusala nsaka ya mbongo kele disumu.​—Baefezo 5:​17. a

•   Kima ke simbaka nsaka ya mbongo kele bwimi, diambu yina Nzambi ke mengaka. (1 Bakorinto 6:​9, 10; Baefezo 5:3, 5) Bantu ya ke salaka nsaka ya mbongo ke vandaka ti kivuvu ya kuzwa mbongo ntangu bankaka ke bela, kansi Biblia ke buyaka kuyuma ntima sambu na bima ya bantu ya nkaka.​—Kubasika 20:17; Baroma 7:7; 13:​9, 10.

•   Kusala nsaka ya mbongo, ata sambu na mbongo fioti, lenda basisa zola ya mbi ya mbongo.​—1 Timoteo 6:​9, 10.

•   Mbala mingi, bantu ya ke salaka bansaka ya mbongo ke ndimaka balukwikilu ya luvunu to shanse. Kansi, Nzambi ke monaka balukwikilu ya mutindu yina bonso mutindu mosi ya lusambu ya biteki, diambu yina ke wakana ve ti lusambu na yandi.​—Yezaya 65:11.

•   Na kisika ya kusiamisa nzala ya kubaka kima kukonda kusala ngolo, Biblia ke siamisaka beto na kusala ngolo. (Longi 2:​24; Baefezo 4:28) Bantu yina ke landaka bandongisila ya Biblia lenda dia “madia yina bo mosi ke baka.”​—2 Batesalonika 3:​10, 12.

•   Kusala nsaka ya mbongo lenda basisa mpeve ya mbi ya kutesana, diambu yina Biblia ke buyisaka.​—Bagalatia 5:​26.