Bangonda kiteso ya sambanu me luta banda Yoane Mbotiki me yantika kulonga. Ntangu yai, Yezu me lungisa bamvula kiteso ya 30 mpi yandi me kwisa na Yoane na Nzadi ya Yordani. Sambu na nki? Yandi me kwisa kaka ve sambu na kutala yandi. Yandi me kwisa mpi ve sambu na kutala mutindu kisalu ya Yoane ke salama. Kansi yandi me kwisa kulomba Yoane na kubotika yandi.

Kansi Yoane me buya mpi me zabisa yandi nde: “Mono muntu kele ti mfunu nde nge botika mono, kansi nge, nge ke kwisa na mono?” (Matayo 3:14) Yoane ke zaba nde Yezu kele kibeni Mwana ya Nzambi. Yibuka nde, ntangu Yoane vandaka na divumu ya mama na yandi, yandi nikanaka na kiese ntangu Maria, yina vandaka ti divumu ya Yezu, kwendaka kutala Elizabeti mama ya Yoane. Ntembe kele ve nde na nima mama ya Yoane telaka Yoane mambu yina. Ziku bo telaka yandi mpi mambu yina wanzio tubaka sambu na lubutuku ya Yezu mpi mambu yina bawanzio yina basikilaka bangungudi tubaka na mpimpa yina Yezu butukaka.

Yoane zabaka nde yandi vandaka kubotika bantu sambu na kumonisa nde bo me balula ntima na masumu na bo. Kansi Yezu vandaka ve muntu ya masumu. Ata Yoane vandaka kubuya, Yezu zabisaka yandi nde: “Bika yo vanda mutindu yina mbala yai, sambu yo me fwana nde beto lungisa mambu yonso ya lunungu na mutindu yai.”—Matayo 3:15.

Sambu na nki yo lombaka nde Yezu kubaka mbotika? Yezu bakaka ve mbotika sambu na kumonisa nde yandi me balula ntima sambu na masumu na yandi. Kansi yandi bakaka mbotika sambu na kumonisa nde yandi ke zola kusala luzolo ya tata na yandi. (Baebreo 10:5-7) Yezu vandaka kusala kisalu ya mabaya, kansi sesepi yai, ntangu me lunga sambu yandi yantika kisalu yina tata na yandi yina kele na zulu tindaka yandi na kusala na ntoto. Keti nge ke yindula nde Yoane vandaka kuvingila nde kima mosi ya kuyituka kusalama ntangu yandi ta botika Yezu?

Yoane tubaka na nima nde: “Muntu yina tindaka mono na kubotika bantu na masa songaka mono nde: ‘Konso muntu yina nge ta mona mpeve ke kwisa kukulumuka mpi ke telama na zulu na yandi, yandi yina muntu ke botikaka na mpeve santu.’” (Yoane 1:33) Yoane vandaka kuvingila nde mpeve ya Nzambi kukulumuka na zulu ya muntu mosi yina yandi ta botika. Yo yina, ntangu Yezu basikaka na masa, Yoane yitukaka ve na kumona “mpeve ya Nzambi ke kulumuka bonso pizio mpi yo ke kwisa na zulu [ya Yezu].”—Matayo 3:16.

 Kansi, kima ya nkaka ya kuyituka salamaka ntangu Yezu bakaka mbotika. ‘Zulu kangukaka’ sambu na yandi. Yo ke zola kutendula nki? Yo ke tendula nde ntangu Yezu bakaka mbotika, yandi yibukaka luzingu yina yandi vandaka na yo na zulu na ntwala ya kukuma muntu. Na ntangu yina, Yezu yibukaka ntangu yandi vandaka mwana ya kimpeve ya Yehowa mpi malongi ya kieleka yina Nzambi longaka yandi na zulu na ntwala nde yandi kwisa na ntoto.

Diaka, ntangu Yezu bakaka mbotika, ndinga mosi katukaka na zulu mpi tubaka nde: “Yai Mwana na mono, ya mono ke zolaka mingi, yina mono me ndima.” (Matayo 3:17) Ndinga yina vandaka ya nani? Yo vandaka ve ndinga ya Yezu sambu yandi vandaka pana ti Yoane. Yo vandaka ndinga ya Nzambi. Ya kieleka, Yezu kele mwana ya Nzambi. Yandi kele ve Nzambi.

Yo ke mfunu na kuzaba nde, Yezu kele mwana ya Nzambi mpi yandi vandaka muntu, kaka mutindu Adami vandaka. Na nima ya kutubila mbotika ya Yezu, longoki Luka sonikaka nde: “Ntangu Yezu yantikaka kisalu na yandi, yandi vandaka ti bamvula kiteso ya 30, mutindu bantu vandaka kuyindula, yandi vandaka mwana ya Yozefi, mwana ya Eli, . . . mwana ya Davidi, . . . mwana ya Abrahami, . . . mwana ya Noa, . . . mwana ya Adami, mwana ya Nzambi.”—Luka 3:23-38.

Kaka mutindu Adami vandaka muntu mpi “mwana ya Nzambi,” Yezu mpi vandaka kaka mpidina. Ntangu Yezu bakaka mbotika, yandi salaka bangwisana ya mpa ti Nzambi, mpidina yandi kumaka Mwana ya kimpeve ya Nzambi. Yo yina, Yezu fwanaka na kulonga bantu kieleka ya me tala Nzambi mpi kusonga bo nzila ya luzingu. Yezu me yantika luzingu yina ta sala nde yandi fwa sambu na kupesa luzingu na yandi bonso kimenga sambu na bantu ya masumu.