Bantu me katuka na Esti. Bo kele bantu ya ke zabisaka mambu yina ta salama na bilumbu ke kwisa na nzila ya bambwetete, disongidila bantu yina ke longukaka kisika bambwetete ke telamaka, mpi bo ke tubaka nde kusala mpidina ke sadisaka bo na kupesa ntendula ya mambu yina ta kumina bantu na luzingu. (Yezaya 47:13) Ntangu bo vandaka na bwala na bo na Esti, bo monaka “mbwetete” mosi mpi bo landaka yo bakilometre mingi; na kisika ya kunata bo na Betelemi, yo me nata bo na Yeruzalemi.

Ntangu bo me kuma na Yeruzalemi, bo me yula nde: “Mwana yina me butuka sambu na kuvanda ntotila ya Bayuda kele na wapi? Sambu beto monaka mbwetete na yandi ntangu beto vandaka na Esti, mpi beto me kwisa kufukimina yandi.”—Matayo 2:1, 2.

Erode, ntotila ya Yeruzalemi, me wa mambu yai mpi me wa makasi ya mingi. Ebuna yandi me binga bamfumu ya banganga-nzambi mpi bamfumu ya nkaka ya dibundu ya Bayuda mpi me yula bo kisika yina Kristu fwete butuka. Bo me tala mambu yina Masonuku ke tuba mpi me tuba nde: “Na Betelemi.” (Matayo 2:5; Mika 5:2) Ebuna, Erode me binga na kinsweki bantu yina ke zabisaka mambu yina ta salama na bilumbu ke kwisa na nzila ya bambwetete mpi me songa bo nde: “Beno kwenda kusosa mwana yina mbote-mbote, mpi kana beno mona yandi, beno kwisa kuzabisa mono sambu mono mpi kukwenda kufukimina yandi.” (Matayo 2:8) Kansi, Erode ke sosa mwana yina sambu na kufwa yandi.

Ntangu bo me kwenda, diambu mosi ya kuyituka me salama. “Mbwetete” yina bo monaka ntangu bo vandaka na Esti kumaka na ntwala na bo. Ya kieleka, mbwetete yai kele ve bonso bambwetete ya nkaka, kansi yo me basika kaka sambu na kutwadisa bo. Bo me landa yo tii kuna yo me telama na nzo yina Yozefi ti Maria kele ti mwana na bo.

Ntangu bo me kota na nzo, bo me mona Maria ti mwana na yandi Yezu. Na mbala mosi, bo me fukamina Yezu. Ebuna bo me pesa yandi makabu: wolo, ndumbu ya mpembe, ti mire. Na nima, ntangu bo ke zola kuvutuka na Erode, Nzambi me kebisa bo na ndosi nde bo vutuka ve. Yo yina, bo me kwenda na insi na bo na nzila ya nkaka.

Sambu na nge, nani basisaka “mbwetete” yina twadisaka bo? Yibuka nde, yo nataka bo ve mbala mosi na Betelemi, kisika yina Yezu vandaka. Kansi, yo nataka bo ntete na Yeruzalemi mpi kuna bo kutanaka ti ntotila Erode, yina zolaka kufwa Yezu. Mpi yandi zolaka kufwa kibeni Yezu kana Nzambi kangaka yandi ve nzila mpi kebisaka ve bantu yina ke zabisaka mambu yina ta salama na bilumbu ke kwisa na nzila ya bambwetete nde bo songa ve Erode kisika Yezu kele. Ya kieleka, yo vandaka Satana, mbeni ya Nzambi, muntu zolaka kufwa Yezu, mpi yandi sadilaka mbwetete sambu na kusosa kulungisa lukanu na yandi.