Yezu me katuka kulutisa kilumbu mosi ya nda mpi yandi me lemba. Ntangu bo me kuma na nkokila, yandi me zabisa balongoki na yandi nde: “Beto sabuka na simu ya nkaka,” disongidila na simu ya Kapernaumi.—Marko 4:35.

Bwala Geraza kele na esti ya dibungu ya Nzadi-Mungwa ya Galilea. Bo ke bingaka yo mpi Dekapolisi. Bagreki vandaka kuzinga na bambanza ya Dekapolisi, kansi Bayuda mingi mpi vandaka kuzinga kuna.

Bantu mingi me zaba nde Yezu me yambula Kapernaumi. Bamaswa ya nkaka mpi me yantika kusabuka nzadi-mungwa. (Marko 4:36) Nzadi yango kele kibeni ve nda sambu na kusabuka. Nzadi-Mungwa ya Galilea kele bonso dizanga ya nene ya masa ya madidi, nda na yo kele bakilometre kiteso ya 21 mpi nene na yo bakilometre kiteso ya 12. Kansi yo kele ve mudindu.

Yezu kele muntu ya kukuka, kansi yandi me lemba sambu yandi me katuka kulonga mingi. Yo yina ntangu bo me yantika kusabuka, yandi me lala na nima ya maswa; yandi me tula ntu na zulu ya kuse, mpongi ya ngolo me simba yandi.

Bantumwa mingi me zaba mbote kunata bamaswa yai, kansi nzietelo yai kele pete ve. Bangumba mingi kele na lweka ya Nzadi-Mungwa ya Galilea mpi mbala mingi masa na yo ke vandaka tiya. Bantangu ya nkaka, mupepe ya madidi yina ke katukaka na bangumba ke bulaka mpi ke vukanaka ti tiya yina ke vandaka na masa; na mbala mosi yo ke salaka mipepe ya ngolo yina ke bulaka na nzadi. Yo kele mambu yina me salama ntangu yai. Kitembo me yantika kubula maswa. Ebuna, ‘masa me yantika kufuluka na maswa, mpi bo me kuma na kigonsa.’ (Luka 8:23) Kansi, Yezu ke lala kaka.

Babakala yai ya me zaba masa me sala yonso sambu na kubasisa maswa na kati ya kitembo yina, bo ke sala mutindu bo vandaka kusala na ntama kana mipepe ke bula na nzadi. Kansi, ntangu yai bo ke kuka ve. Ntangu bo me mona nde luzingu na bo me kuma na kigonsa, bo me tedimisa Yezu na mpongi mpi me tuba nde: “Mfumu, gulusa beto, beto ke zola kufwa!” (Matayo 8:25) Balongoki me wa boma nde bo ke zola kufwa.

Ntangu Yezu me telama na mpongi, yandi me yula bantumwa nde: “Sambu na nki beno ke wa boma, beno bantu ya kele na lukwikilu ya fioti?” (Matayo 8:26) Na nima, yandi me lembika mupepe ti nzadi-mungwa nde: “Bika makelele! Vanda pima!” (Marko 4:39) Na mbala mosi, mupepe yina ya ngolo me mana mpi nzadi me kuma pima. (Marko ti Luka me tubila diambu yai ya kuyituka; bo me benda ntete dikebi na mutindu Yezu me lembika mupepe na mutindu ya kuyituka mpi na nima bo me monisa nde balongoki me konda lukwikilu.)

Yindula mutindu balongoki me wa na nima ya kumona kimangu yina. Bo me katuka kumona nzadi-mungwa yina vandaka ti mupepe ya ngolo me kuma kibeni pima. Boma ya ngolo me simba bo. Bo me tuba bo na bo nde: “Muntu yai kele nani kibeni? Ata mupepe mpi nzadi-mungwa ke lemfukila yandi.” Na nima, bo me kuma na simu ya nkaka ya nzadi kukonda kigonsa. (Marko 4:41–5:1) Ziku bamaswa ya nkaka yina vandaka na nzadi me vutuka na westi ya dibungu.

Yo ke pesa beto kikesa kibeni na kuzaba nde mwana ya Nzambi kele ti kiyeka na zulu ya bima ya lugangu. Ntangu yandi ta yala na Kimfumu na yandi mpi ta tula dikebi yonso na ntoto, bantu yonso ta zinga na lutaninu sambu ata kisumbula mosi ve ya lugangu ta pesa bo boma.