Ntangu Yezu ke longa bantu na Sezarea-Filipo, yina kele na bakilometre kiteso ya 25 kana nge me katuka na Ngumba ya Ermoni, yandi me zabisa bantumwa na yandi diambu mosi ya kuyituka. Yandi me songa bo nde: “Ya kieleka mono ke tubila beno nde bantu ya nkaka na kati ya bantu yina me telama awa ta fwa ve tii kuna bo ta mona ntete Mwana ya muntu ke kwisa na Kimfumu na yandi.”—Matayo 16:28.

Yo fwete vanda nde balongoki ke kudiyula kana Yezu ke zola kutuba nki. Kiteso ya mposo mosi na nima, yandi me baka bantumwa tatu: Piere, Yakobo ti Yoane mpi bo me kwenda na ngumba mosi ya nda. Ziku, yo kele na mpimpa sambu babakala yai tatu kele ti mpongi na meso. Ntangu Yezu ke samba, yandi me kituka na ntwala na bo. Bantumwa ke mona luse na yandi ke sema bonso ntangu mpi bilele na yandi ke ngenga bonso nsemo ya mpembe.

Na nima, bantu zole me basika: “Moize ti Eliya.” Bo me yantika kusolula ti Yezu na yina me tala ‘kukwenda na yandi na Yeruzalemi.’ (Luka 9:30, 31) Kukwenda ya Yezu ke tadila lufwa mpi lufutumuku na yandi yina yandi me katuka kutubila. (Matayo 16:21) Disolo yai me monisa nde Yezu ta fwa kibeni lufwa mosi ya nsoni, mpi diambu yai me swaswana mpenza ti bangindu ya Piere.

Ntangu yai bantumwa kele diaka ve ti mpongi na meso, bo ke tala, ke widikila mpi ke yituka. Yo kele mbona-meso, kansi yo ke monana bonso diambu mosi ya kieleka kibeni, yo yina Piere me yantika kudikotisa na mbona-meso yina mpi me tuba nde: “Rabi, yo kele mbote mutindu beto kele awa. Beto tunga batenta tatu, mosi sambu na nge, mosi sambu na Moize, mpi mosi sambu na Eliya.” (Marko 9:5) Keti Piere ke zola nde bo tunga batenta sambu bo landa kumona mbona-meso yina?

Ntangu Piere ke tuba, dituti mosi ya ke sema me fika bo ebuna ndinga mosi me katuka na dituti yina mpi me tuba nde: “Yai Mwana na mono, ya mono ke zolaka mingi, yina mono me ndima. Beno wila yandi.” Ntangu bantumwa me wa ndinga ya Nzambi, bo me wa boma mpi me bwa luse na ntoto, kansi Yezu me tubila bo nde: “Beno telama. Beno wa boma ve.” (Matayo 17:5-7) Ntangu bo me telama, bantumwa yai tatu me mona kaka Yezu yandi mosi, ata muntu ya nkaka ve. Mbona-meso me mana. Ntangu suka me tana mpi bo ke kulumuka na ngumba, Yezu me zabisa bo nde: “Beno zabisa ve mbona-meso yai ata na muntu mosi tii kuna Mwana ya muntu ta telama na bafwa.”—Matayo 17:9.

Mutindu Eliya me monana na mbona-meso yai me basisa ngiufula. Bantumwa me yula Yezu nde: “Sambu na nki bansekudi ke tubaka nde Eliya fwete kwisa ntete?” Yezu me zabisa bo nde: “Eliya me kwisaka dezia, mpi bo zabaka yandi ve.” (Matayo 17:10-12) Yezu ke tubila Yoane Mbotiki, yina salaka kisalu yina me fwanana ti ya Eliya. Eliya yidikaka nzila sambu na Elisha, Yoane yidikaka nzila sambu na Kristu.

Mbona-meso yai me pesa Yezu ti bantumwa kikesa ya mingi. Yo ke monisa nkembo yina Kristu ta vanda ti yo na Kimfumu na yandi. Balongoki me mona “Mwana ya muntu ke kwisa na Kimfumu na yandi,” mutindu Yezu silaka yo. (Matayo 16:28) Ntangu bo vandaka na ngumba, bo ‘monaka bunene na yandi na meso na bo mosi.’ Bafarize zolaka nde Yezu kusonga bo kidimbu mosi yina ke monisa nde yandi kele Ntotila yina Nzambi me ponaka, kansi yandi pesaka bo ve ata kidimbu mosi. Nzambi pesaka nzila nde bantumwa yai tatu kumona mutindu Yezu me kituka, mpi diambu yai ke ndimisa nde bambikudulu ya me tala Kimfumu kele ya kieleka. Yo yina, Piere sonikaka na nima nde: “Beto kele ti ndinga ya mbikudulu yina me kuma kieleka kibeni.”—2 Piere 1:16-19.