Nzambi pesaka bantu ntoto sambu na kuzinga. Yo kele kisika yina beto fwete zinga. Yo yina, yandi salaka ve bankwelani ya ntete, Adami ti Eva, sambu na kufulusa zulu—Nzambi gangaka dezia bawanzyo sambu na kuzinga na zulu. (Yobi 38:4, 7) Kansi, Nzambi bakaka muntu ya ntete mpi tulaka yandi na paladisu mosi ya kitoko, ya bo kebingaka kilanga ya Edeni. (Kuyantika 2:15-17) Yehowa kupesaka yandi, mpi bana na yandi yina zolaka kubutuka na nima, dibaku ya kuzinga mvula na mvula na ntoto.—Tanga Nkunga 37:29; 115:16.

Na luyantiku, paladisu vandaka kaka na kilanga ya Edeni. Yo lombaka nde bankwelani ya ntete kufulusa ntoto ti bana yina bo zolaka kubuta. Na nima, bo zolaka kuyala ntoto ya mvimba mpi kukumisa yo paladisu. (Kuyantika 1:28) Ntoto tafwa ve ata fyoti. Ntangu yonso, yo tavandaka kisika yina bantu fwete zinga.—Tanga Nkunga 104:5.

Adami ti Eva kolamaka na Nzambi, yo yina Yehowa kulaka bo na kilanga. Paladisu kuvilaka, mpi ata muntu mosi ve menungaka na kuvutula yo. Biblia ketuba nde: ‘Bo me pesaka ntoto na maboko ya bantu ya mbi.’—Yobi 9:24.—Tanga Kuyantika 3:23, 24.

Keti Yehowa meyambulaka lukanu na yandi ya luyantiku sambu na bantu? Ve! Yandi kele Nkwa-Ngolo Yonso. Yandi fwete lungisa lukanu na yandi. (Yezaya 45:18) Yandi tasala na mpila nde bantu kuvutuka dyaka mutindu yandi zolaka.—Tanga Nkunga 37:11, 34.

Paladisu tavutulama na ntoto na nsungi ya luyalu ya Yezu, Ntotila ya Nzambi meponaka. Na mvita yina Biblia kebingaka Armagedoni, Yezu ti bawanzyo ya Nzambi tafwa bantu yonso yina ketelamina Nzambi. Na nima, Yezu tatula Satana na boloko  sambu na bamvula 1 000. Bantu ya Nzambi taguluka sambu Yezu tatwadisa bo mpi tatanina bo. Bo tabaka na luzingu ya mvula na mvula na Paladisu awa na ntoto.—Tanga Kusonga 20:1-3; 21:3, 4.

Inki ntangu Nzambi tamanisa bampasi awa na ntoto? Yezu kupesaka kidimbu yina fwete monisa nde nsuka mefinama. Mambu yina kesalama bubu yai na nsi-ntoto kenyokula luzingu ya bantu mpi yo kemonisa nde beto kezinga na “nsukilu ya ngidika ya bima.”—Tanga Matayo 24:3, 7-14, 21, 22.

Ntangu Yezu tayala ntoto tuka na zulu na nsungi ya bamvula 1 000, yandi tamanisa bampasi yonso. (Yezaya 9:6, 7; 11:9) Katula kuvanda Ntotila, Yezu tavanda mpi Nganga-Nzambi ya Nene mpi yandi talolula masumu ya bantu yina kezolaka Nzambi.—Tanga Yezaya 25:8; 33:24.

Bantu yina kelemfukilaka Nzambi tazinga na Paladisu. (1 Yoane 2:17) Yezu tindaka balongoki na yandi na kusosa bantu ya kudikulumusa mpi kulonga bo mutindu yina bo lenda ndimama na Nzambi. Bubu yai, Yehowa ke na kuyidika bamilio ya bantu sambu na kuzinga na Paladisu na bilumbu kekwisa awa na ntoto. (Sofonia 2:3) Na Banzo ya Kimfumu ya Bambangi ya Yehowa, bantu kelongukaka na kuvanda babakala ti batata ya mbote mpi bankento ti bamama ya mbote. Bana ti bibuti kesambilaka kumosi mpi kelongukaka mutindu ya kubaka balusakumunu ya nsangu ya mbote.—Tanga Mishe 4:1-4.