Yindula diambu yai: David ke nata kamio na kisika yina yandi me zaba ve ata fioti. Babala-bala mpi bidimbu ya nzila ke songa nde yandi ke ve kisika yina yandi fwete vanda. David me bakisa nde yandi me vila nzila. Yo fwete vanda nde yandi balukaka na kisika mosi ya mbi ntangu yandi vandaka kukwenda.

Kana nge vandaka Davidi, nge zolaka kusala nki?

Nge ke ti bansola mingi:

1. Kuyula bantu.

2. Kutala karti ya nsi-ntoto, to kusadila GPS.

3. Kulanda kunata kamio, ti kivuvu nde nge ta zwa nzila ya mbote na mutindu mosi buna.

Yo ke pwelele nde, Nsola C kele ya mbote ve.

Nsola B me luta ya ntete. Na kutuba ya mbote, nge ta vanda ti karti to GPS na nzietelo ya mvimba, mpi yo ta sadisa nge na kukwenda na nzila ya mbote.

Biblia lenda sadisa nge na mutindu mosi!

Mukanda yai ya bo me tekaka mingi lenda

• twadisa nge ntangu nge ke kutana ti bampasi na luzingu

• sadisa nge na kudizaba mpi na kukuma muntu ya mbote

• songa nge mutindu ya kuvanda ti luzingu ya kuluta mbote

Banda ntangu beto ke yantikaka kutuba, beto ke yulaka bangiufula.

• Sambu na nki zulu kele ble?

• Bambwetete me salamaka na nki?

Na nima, beto ke yantikaka kuyula bangiufula ya ke tadila mambu yina ke salama na nziunga na beto.

• Sambu na nki bantu ke salaka mambu ya mbi?

• Sambu na nki bantu ke fwaka?

Ebuna kana bamvutu na bangiufula yai ke vandaka banda ntama na Biblia?

Bantu mingi ke tubaka nde Biblia me fuluka ti masapu mpi malongi ya luvunu, nde yo me manaka ngala, to nde mpila ya kubakisa yo kele ve. Kansi Biblia kele kibeni mbi, to keti kima kele mbi kele mambu yina bantu me waka sambu na Biblia? Keti mbala ya nkaka bo me kusaka bo?

Mu mbandu, bantu ke yindulaka nde Biblia ke tubaka nde Nzambi muntu ke yalaka nsi-ntoto. Kansi, nki mutindu yo lenda vanda mpidina? Nzambi ve muntu ke yalaka nsi-ntoto yai! Yo me fuluka ti mawa mpi bampasi, maladi mpi lufwa, kinsukami mpi bisumbula. Inki mutindu Nzambi ya zola lenda vanda na kisina ya mambu yai yonso?

Keti nge ta zola kuzaba mvutu? Mambu yina Biblia ke tubaka na yina me tala muntu yina ke yalaka nsi-ntoto lenda yitukisa nge!

Ziku nge me mona nde bandongisila ya kele na kamukanda yai me katuka na Biblia. Bambangi ya Yehowa ke ndimaka kibeni nde Biblia kele nto ya lutwadisu ya me fwana na kutudila ntima. Yo ke mpidina sambu yo kele “ya kupemama na Nzambi mpi yo kele mfunu sambu na kulonga, sambu na kunganina, sambu na kusungika mambu.” (2 Timoteo 3:16, 17) Nge mosi fwete baka lukanu ya kutadila mukanda yai ya ntama, kansi yina kele mpi ya mpa!