Lukanu ya Nzambi Sambu na Ntoto Kele Inki?
Kitini ya 6
Lukanu ya Nzambi Sambu na Ntoto Kele Inki?
NZAMBI gangaka ntoto sambu yo vanda kisika mosi ya mbote yina bantu fwete zinga. Ndinga na yandi ketuba nde: “Zulu kele ya Mfumu Nzambi yandi mosi, kansi ntoto yandi pesaka yo na bantu.”—Nkunga 115:16.
Na ntwala ya kuganga Adami, muntu ya ntete, Nzambi ponaka kitini mosi ya fyoti ya ntoto, yina yandi bingaka nde Edeni, mpi yandi salaka kilanga mosi ya kitoko. Masonuku ketuba nde banto ya nzadi Efrate mpi Tigre (Hiddekel) vandaka na Edeni. * Bantu keyindulaka nde kilanga ya Edeni vandaka na kisika yina kele bubu yai na Esti ya Turquie. Ya kyeleka, kilanga ya Edeni kuvandaka mpenza awa na ntoto!
Nzambi gangaka Adami mpi tulaka yandi na kilanga ya Edeni “sambu na kusalaka muna ti kutalaka yo mbote-mbote.” (Kuyantika 2:15) Na nima, Nzambi gangaka nkento mosi sambu na Adami—Eva. Nzambi zabisaka bankwelani yai nde: “Beno buta bana mingi, mpidina bana na beno ta zingaka na bisika yonso na nsi-ntoto ti kuyala yo.” (Kuyantika 1:28) Yo kele pwelele nde, Nzambi gangaka ve ‘ntoto sambu nde yo vanda ya mpamba, kansi yandi yidikaka yo sambu bantu kuzinga muna.’—Yezaya 45:18.
Kansi, Adami ti Eva kolamaka na Nzambi na luzolo yonso na kufwaka nsiku na yandi. Yo yina, Nzambi kulaka bo na kilanga ya Edeni. Paladisu kuvilaka. Mpi malanda ya disumu ya Adami kusukaka pana ve. Masonuku ketuba nde: “Masumu me kotaka na nsi-ntoto sambu na mbi ya muntu mosi yai Adami, ebuna masumu me kwisaka kunata lufwa. Yo yina, bantu yonso ke fwaka sambu bo yonso ke salaka masumu.”—Roma 5:12.
Keti Yehowa yambulaka lukanu na yandi ya luyantiku, disongidila ntoto kuvanda paladisu, kisika yina bantu ya kyese tazinga? Ve! Nzambi ketuba nde: “Mambu ya mono ke tubaka . . . yina ke katukaka na munoko na mono, yo ke vutuka ve mpamba na mono kana yo me sala ve ntete luzolo na mono, kana yo me lungisa ve bangindu na mono.” (Yezaya 55:10) Nzambi tavutula paladisu na ntoto!
Luzingu na Paladisu tavanda nki mutindu? Tala balusilu yina Masonuku kepesa ya kele na balutiti zole yina kelanda.
[Noti na nsi ya lutiti]
^ Kuyantika 2:10-14 ketuba nde: “Kuvandaka na nto ya nzadi na ntoto ya Edeni. Nzadi yango vandaka kuluta na kati ya kilanga tii na nganda, kuna yo kabanaka na banzadi iya. Nzadi ya ntete zina na yo Pishoni . . . Nzadi ya zole zina na yo Gilhoni . . . Nzadi ya tatu zina na yo Tigre [to, Hiddekel], yo ke luta na ndambu ya este ya nsi ya Asiria. Nzadi ya iya zina na yo Efrate.” Sambu na banzadi zole yina ya ntete, kisika yo vandaka mpi mambu ya metala yo mezabana ve.
Inki Mvutu Nge Tapesa?
• Inki kuvandaka lukanu ya Nzambi ya luyantiku sambu na ntoto mpi bantu?
• Inki mutindu beto kezaba nde Nzambi talungisa lukanu na yandi?
[Lupangu/Bifwanisu ya kele na lutiti 17]
Paladisu Yina Tavanda na Ntoto na Bilumbu Kekwisa
Bafwa tafutumuka: “Bantu yonso yina me fwaka [ya] kele na maziamu, bo ta wa ndinga na yandi; ebuna bo ta basika.”—Yoane 5:28, 29.
Kununa, maladi to lufwa tavanda dyaka ve: “Ata muntu mosi ve . . . ta tuba diaka nde: ‘Mono ke bela.’” (Yezaya 33:24) Nzambi “ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve.”—Kusonga 21:4.
Madya ya mingi mpi ya mbote: ‘Ntoto tabuta-buta bima, Nzambi, Nzambi na beto, tasakumuna beto.’—Nkunga 67:7.
Banzo ya kitoko mpi kisalu ya kesepedisa: “Bo ta tunga banzo, bo ta zinga muna . . . Bo ta mona kiese na bisalu ya maboko na bo.”—Yezaya 65:21, 22.
Mvita, mubulu mpi nku tavanda dyaka ve: Yehowa ‘tasukisa bitumba na nsi-ntoto ya mvimba.’ (Nkunga 46:10) “Bantu yonso ya mbi, Nzambi ta katula bo na ntoto.”—Bingana 2:22.
