Kitini ya 9

Longuka na Mesia Ntwadisi

NZAMBI tubaka na ntwala nde yandi tapona Mesia sambu na kuvanda Ntwadisi ya bantu yonso. Nzambi mezaba nki ntwadisi mefwana mpenza sambu na beto mpi yandi meponaka Ntwadisi ya kuluta mbote. Mesia monisaka nde yandi kele Ntwadisi ya nki mutindu? Keti yandi vandaka mfumu mosi ya nene ya basoda, muntu ya mayele ya politiki, to filozofe mosi ya mayele? Na kutadila Masonuku ya Santu, Mesia vandaka profete mosi ya sipesiali mpenza​—Yezu Kristu.​—Matayo 23:10.

Nzambi salaka yonso sambu Yezu butuka ya kukuka, ya santu. Dyaka, Yezu telaminaka bikesa yonso yina Satana salaka sambu na kubebisa yandi. Na bangogo mpi na bisalu na yandi, Yezu sadilaka ngolo na yandi na mutindu mosi ya kuluta mbote bonso Nzambi. Yandi landaka mpi mbandu ya lunungu, ya mayele, mpi ya zola ya Nzambi. Beto tadila mutindu beto lenda longuka na mbandu ya Yezu.

Yandi sadilaka ngolo yina Nzambi pesaka yandi sambu na kusadisa bankaka. Yezu vandaka kudibanza mpenza sambu na bantu, mpi yandi sadilaka na zola yonso ngolo na yandi sambu na kulungisa bampusa na bo. Yandi tubaka nde: “Mono ke mona mawa sambu na bantu yai, . . . bo ke na kima ya kudia ve.” (Marko 8:2) Na mutindu ya kuyituka, Yezu disaka bibuka ya bantu yina kwisaka kuwa malongi na yandi.

Dyaka, Yezu vandaka kusala banzyetelo, kulonga mpi “kubelula bantu yina vandaka na maladi to mpasi ya mutindu na mutindu.” (Matayo 4:23) Yo kesadisa beto na kubakisa sambu na nki bantu mingi vandaka kulanda yandi, mpi “bantu yina yonso vandaka kusosa mpila ya kusimba yandi na nitu, sambu ngolo vandaka kubasika na yandi, ebuna yo vandaka kubelula bo yonso.” (Luka 6:19) Ya kyeleka, Yezu “kwisaka ve sambu bantu kusadila yandi, kansi yandi kwisaka sambu na kusadila bantu ti na kupesa bo moyo na yandi bonso mbongo ya kukatula bantu mingi na kimpika ya masumu.” (Matayo 20:28) * Bantwadisi ikwa kemonisaka mpeve ya kuditambika ya mutindu yai?

Yandi monisaka lunungu ya Nzambi. Yezu landaka bantuma ya sikisiki ya nsiku ya Nzambi mpi salaka mambu na kuwakana ti minsiku ya kele na nsiku yango. Ya kyeleka, mutindu Masonuku tubilaka yo na ntwala, yandi tubaka nde: “Nzambi na mono, mono ke zolaka mingi kusala mambu ya nge zola! Malongi na nge kele na ntima na mono.” (Nkunga 40:9) Yezu vandaka kusadila bantu yonso mambu ti lukumu, luzitu, mpi kukonda kupona-pona bonso Nzambi​—yo vanda bamvwama mpi bansukami, babakala mpi bankento, bana mpi bambuta. Kilumbu mosi, balongoki ya Yezu nganinaka bibuti yina vandaka kunata bana na bo na Yezu. Kansi, Yezu tubaka nde: “Beno bikisa bana bo kwisa awa na mono. Beno kanga bo nzila ve, sambu Kimfumu ya Nzambi kele ya bantu yina kele bonso bo.”​—Marko 10:14.

Yandi monisaka mayele yina kekatukaka na Nzambi. Yezu vandaka kuzaba bantu mbote-mbote. “Yandi mosi zabaka mbote-mbote mambu yina kele na kati ya ntima ya bantu.” (Yoane 2:25) Ntangu bambeni ya Yezu tindaka bantu na kukanga yandi, bantu yango tubaka nkutu nde: “Ata mbala mosi ve muntu me tubaka mambu mutindu muntu yai ke tuba!” Yezu bakaka nzayilu yina na wapi? Yandi mosi tendulaka nde: “Malongi yai ya mono ke pesaka beno kele ya mono ve, kansi yo ke katukaka na muntu yina tindaka mono.”​—Yoane 7:16, 46.

 Yandi monisaka zola ya Nzambi. Yezu vandaka mpi kuwila bantu mawa. Muntu mosi yina vandaka ‘na maladi ya lepre ya kufuluka na nitu yonso’ bondilaka Yezu nde: “Mfumu, kana nge zola, nge lenda belula mono.” Yezu wilaka muntu yango mawa mpi ‘tandulaka diboko na yandi, kusimbaka yandi, mpi kutubaka nde: “Mono me zola, beluka ka nge!” Kaka na mbala mosi, maladi manaka yandi.’ (Luka 5:12, 13; Marko 1:41, 42) Yezu vandaka mpenza ti mpusa ya kukatula mpasi ya muntu yina.

Keti Yezu kekudibanzaka sambu na nge mpi? Yezu yandi mosi kepesa mvutu yai: “Beno kwisa na mono, beno yonso bantu yina me lemba, sambu beno ke nata kilo ya nene, ebuna mono ta pesa beno ntangu ya kupema. Beno baka kilo na mono, beno nata yo; beno vanda balonguki na mono, sambu mono kele muntu ya pima, mono kele muntu ya ntima ya mbote; ebuna beno ta zaba kupema.”​—Matayo 11:28, 29.

Yezu kele Ntwadisi ya kuluta mbote kibeni sambu na beto. Yo yina yandi kelongisila beto nde: “Beno vanda balonguki na mono.” Keti nge tandima kuvanda longoki na yandi? Kana nge ndima, nge takuma ti luzingu mosi ya kyese.

[Noti na nsi ya lutiti]

Inki Mvutu Nge Tapesa?

• Inki kiyeka Nzambi pesaka Yezu?

• Inki bikalulu Yezu monisaka? Inki bikalulu kesepedisa nge mingi?

• Yezu kelomba beto na kuvanda banani?

[Kifwanisu ya kele na lutiti 23]

Yezu sadisaka bankaka na luzolo yonso

[Kifwanisu ya kele na lutiti 23]

Yezu vandaka kuzola bana-fyoti

[Kifwanisu ya kele na lutiti 23]

Yezu wilaka bantu ya maladi mawa mpi belulaka bo