Longi 1:1-18
1 Bangogo ya longi,*+ mwana ya Davidi, ntotila na Yeruzalemi.+
2 “Yo kele mpamba kibeni!” longi muntu ke tuba,“Yo kele mpamba kibeni! Bima yonso kele mpamba!”+
3 Inki luta muntu ke bakaka na kisalu na yandi yonso ya ngoloYina yandi ke salaka ngolo awa na ntoto?*+
4 Ndonga mosi ya bantu ke kwenda, mpi ndonga mosi ya bantu ke kwisa,Kansi ntoto ke bikalaka* kimakulu.+
5 Ntangu ke basikaka,* mpi ntangu ke dindaka;Na nima yo ke vutukaka ntinu* na kisika yina yo ke basikaka diaka.+
6 Mupepe ke kwendaka na sudi, yo ke balukaka mpi yo ke kwendaka na nordi;Yo ke balukaka mpi yo ke landaka kubaluka; mupepe ke landaka kubaluka-baluka.
7 Bamasa yonso* ke kulumukaka na nzadi-mungwa, kansi nzadi-mungwa ke fulukaka ve.+
Na kisika yina bamasa ke katukaka sambu yo kulumuka, yo ke vutukaka kuna sambu yo kulumuka diaka.+
8 Bima yonso ke lembisaka;Muntu mosi ve lenda tubila yo.
Disu ke fulukaka ve na kutala;Dikutu mpi ke fulukaka ve na kuwa.
9 Mambu yina vandaka ntete, yo yina ta vanda diaka,Mpi mambu yina bo salaka ntete, bo ta sala yo diaka;Kele ve ti kima ya mpa awa na ntoto.*+
10 Keti kele ti kima yina muntu lenda tuba sambu na yo nde, “Tala kima yai—yo kele ya mpa”?
Yo ke vandaka dezia katuka ntama;Yo ke vandaka dezia na ntwala ya ntangu na beto.
11 Muntu mosi ve ke yibukaka bantu ya ntangu ya ntama;Muntu mosi mpi ve ta yibuka bantu yina ta kwisa na nima;Bantu yina ta kwisa diaka na nima ta yibukaka bo mpi ve.+
12 Mono, longi, mono vandaka ntotila ya Izraele na Yeruzalemi.+
13 Mono salaka ngolo na kulonguka mpi na kutala mbote-mbote+ ti mayele mambu yonso ya ke salamaka na ntoto+—kisalu ya mpasi yina Nzambi me pesaka bana ya bantu yina ke salaka nde bo vanda ti kisalu.
14 Mono monaka bisalu yonso yina ke salama awa na ntoto,*Ebuna tala, bima yonso kele mpamba mpi kulanda mupepe.+
15 Kima yina kele nioka-nioka, bo lenda tandula yo ve,Mpi kima yina kele ve, bo lenda tanga yo ve.
16 Ebuna mono tubaka na ntima na mono nde: “Mono me baka mayele mingi, kuluta konso muntu yina vandaka na ntwala na mono na Yeruzalemi,+ ebuna ntima na mono kumaka ti mayele mpi nzayilu mingi.”+
17 Mono salaka ngolo sambu na kuzaba mayele, sambu na kuzaba kilawu,*+ mpi sambu na kuzaba buzoba, diambu yai mpi kele kulanda mupepe.
18 Sambu mayele mingi ke nataka kiseku mingi,Yo yina muntu yina ke kumaka ti mayele mingi ke kumaka mpi ti bampasi mingi.+
Banoti na nsi ya lutiti
^ Na kisina, “muntu ya ke vukisaka.”
^ Na kisina, “na nsi ya ntangu.”
^ Na kisina, “kele.”
^ To “ke semaka.”
^ To “ke vutukaka na mpema.”
^ To “Bamasa yonso ya nsungi ya madidi; Bamasa yonso ya bansungi.”
^ Na kisina, “na nsi ya ntangu.”
^ Na kisina, “na nsi ya ntangu.”
^ To “buzoba ya mingi.”
