Kulonga 30:1-20
30 “Ntangu mambu yai yonso ta kumina nge, lusakumunu mpi kusinga yina mono me tula na ntwala na nge,+ mpi nge yibuka yo*+ na makanda yonso yina Yehowa Nzambi na nge me panza nge,+
2 mpi nge vutukila Yehowa Nzambi na nge+ mpi nge wa ndinga na yandi na kuwakana ti mambu yonso yina mono ke songa nge bubu yai, nge ti bana na nge, na ntima na nge ya mvimba mpi na moyo* na nge ya mvimba,+
3 Yehowa Nzambi na nge ta vutula bantu na nge yina bo nataka na kimpika+ mpi yandi ta wila nge mawa+ mpi ta baka nge na kati ya bantu yonso yina Yehowa Nzambi na nge panzaka nge+ sambu na kuvukisa nge diaka.
4 Ata bantu na nge kele ya kupanzana tii na nsuka ya ntoto, katuka kuna, Yehowa Nzambi na nge ta vukisa nge mpi ta vutula nge.+
5 Yehowa Nzambi na nge ta nata nge na insi yina batata na nge bakaka, mpi nge ta baka yo; ebuna yandi ta sala nde nge toma mpi yandi ta kumisa nge mingi kuluta batata na nge.+
6 Yehowa Nzambi na nge ta kumisa ntima na nge bunkete* mpi ntima ya bana na nge,+ mpidina nge ta zola Yehowa Nzambi na nge na ntima na nge ya mvimba mpi na moyo* na nge ya mvimba, mpi nge lenda zinga.+
7 Ebuna Yehowa Nzambi na nge ta nata balusingu yai yonso na zulu ya bambeni na nge yina mengaka nge mpi monisaka nge mpasi.+
8 Ebuna nge ta vutuka mpi ta wa ndinga ya Yehowa mpi ta zitisa bantuma na yandi yonso yina mono ke pesa nge bubu yai.
9 Yehowa Nzambi na nge ta sala nde nge toma mingi na kisalu yonso ya maboko na nge,+ yandi ta sala nde bana na nge, bitwisi na nge, mpi bambuma ya ntoto na nge kukuma mingi, sambu Yehowa ta vanda diaka na kiese ya kusala nde nge toma, kaka mutindu yandi vandaka na kiese sambu na ba-nkaka na nge.+
10 Ebuna nge ta widikila ndinga ya Yehowa Nzambi na nge mpi ta zitisa bantuma ti bansiku na yandi yina kele ya kusonika na mukanda yai ya Nsiku, ebuna nge ta vutukila Yehowa Nzambi na nge na ntima na nge ya mvimba mpi na moyo* na nge ya mvimba.+
11 “Nsiku yai ya mono ke pesa nge bubu yai kele ve mpasi mingi sambu na nge, yo kele mpi ve ntama.*+
12 Yo kele ve na zulu, sambu nge tuba nde, ‘Nani ta tombuka na zulu mpi kubakila beto yo, na mpila nde beto wa yo mpi kuzitisa yo?’+
13 Yo kele mpi ve na simu ya nkaka ya nzadi-mungwa, sambu nge tuba nde, ‘Nani ta sabuka na simu ya nkaka ya nzadi-mungwa mpi kubakila beto yo, na mpila nde beto wa yo mpi kuzitisa yo?’
14 Sambu ndinga kele kibeni pene-pene na nge, na munoko na nge mpi na ntima na nge,+ sambu nge sadila yo.+
15 “Tala, mono ke tula na ntwala na nge bubu yai luzingu ti mambote, mpi lufwa ti mambi.+
16 Kana nge wa bantuma ya Yehowa Nzambi na nge yina ya mono ke pesa nge bubu yai, kana nge zola Yehowa Nzambi na nge,+ nge tambula na banzila na yandi, mpi nge zitisa bantuma na yandi, bansiku na yandi, ti bankanu na yandi, nge ta zinga+ mpi beno ta kuma mingi, ebuna Yehowa Nzambi na nge ta sakumuna nge na insi yina nge ke kwenda kubaka.+
17 “Kansi, kana ntima na nge kuvila nzila+ mpi nge wa ve, ebuna nge bika nde bo pukumuna nge mpi nge fukimina banzambi ya nkaka mpi nge sadila bo,+
18 mono ke zabisa beno bubu yai nde beno ta fwa kibeni.+ Beno ta zinga mingi ve na insi yina nge ke sabuka Yordani sambu na kubaka.
19 Mono ke baka zulu mpi ntoto bonso bambangi na ntwala na beno bubu yai nde mono me tula luzingu mpi lufwa na ntwala na nge, lusakumunu mpi kusinga;+ nge fwete sola luzingu sambu nge zinga,+ nge ti bana na nge,+
20 mpi kuzola Yehowa Nzambi na nge,+ kuwidikila ndinga na yandi, mpi kukangama na yandi,+ sambu yandi kele luzingu na nge mpi na nzila na yandi, nge ta zinga mingi na insi yina Yehowa zengaka kieleka na kupesa ba-nkaka na nge, Abrahami, Izaki, mpi Yakobi.”+
Banoti na nsi ya lutiti
^ Na kisina, “mpi nge vutula yo na ntima na nge.”
^ Tala Bantendula ya Bangogo.
^ Na kisina, “ta yotisa ntima na nge.”
^ Tala Bantendula ya Bangogo.
^ Tala Bantendula ya Bangogo.
^ To “yo kele mpi ve na kisika yina nge lenda baka yo ve.”
