Kulonga 24:1-22
24 “Kana bakala mosi me kwela nkento, kansi nkento yango ke sepedisa yandi ve sambu yandi me mona diambu mosi ya nsoni na nkento yina, bakala yina fwete sonikila yandi mukanda ya kufwa makwela,+ kupesa yandi yo, mpi kukula nkento yina na nzo na yandi.+
2 Kana nkento yina me basika na nzo ya bakala yina, yandi lenda kwenda mpi kukuma nkento ya muntu ya nkaka.+
3 Kana bakala yina ya zole kumenga* nkento yina mpi kusonikila yandi mukanda ya kufwa makwela, kupesa yandi yo, mpi kukula yandi na nzo na yandi, to kana bakala ya zole yina kwelaka yandi me fwa,
4 bakala na yandi ya ntete yina kulaka yandi ta vanda ve ti nswa ya kukwela yandi diaka sambu nkento yina me kuma mvindu, sambu yo kele kima ya nzanzi na meso ya Yehowa. Nge fwete kotisa ve disumu na kati ya insi yina Yehowa Nzambi na nge ke pesa nge bonso dikabu.
5 Kana bakala mosi me katuka kukwela, yandi fwete sala ve kisalu ya kisoda mpi bo fwete pesa yandi ve bisalu ya nkaka. Yandi fwete vanda mutindu yina mvula mosi, kubikala na nzo mpi kusepedisa nkento na yandi.+
6 Ata muntu mosi ve fwete kanga kima ya kunikila bambuma na maboko to ditadi na yo ya zulu bonso kidimbu sambu na mfuka,*+ sambu kusala mutindu yina kele kubaka kima yina muntu ke zingilaka* bonso kidimbu.
7 Kana bo mona muntu ya me kanga na ngolo muntu* mosi na kati ya bampangi na yandi bantu ya Izraele, ebuna yandi me niokula yandi mpi me teka yandi,+ muntu yina me kanga mpangi na yandi fwete fwa.+ Nge fwete katula kima ya mbi na kati na beno.+
8 Kana maladi ya lepre* me basika na kintulumukina, beno fwete sala ngolo kibeni na kusala mambu na kuwakana ti mambu yonso yina banganga-nzambi yina kele Balevi ta longa beno.+ Beno fwete sala ngolo na kusala kaka mutindu mono songaka bo.
9 Yibuka mambu yina Yehowa Nzambi na nge salaka Miriami na nzila, ntangu beno vandaka kubasika na Ezipte.+
10 “Kana nge defisa konso kima yina na nkweno na nge,+ nge fwete kota ve na nzo na yandi sambu na kukanga yandi kima yina yandi ke pesa bonso kidimbu.
11 Nge fwete telama na nganda, ebuna muntu yina bakaka mfuka fwete natila nge na nganda kima yina yandi ke pesa bonso kidimbu.
12 Kana muntu yina kele nsukami, nge fwete lala ve kana kima yina yandi pesaka bonso kidimbu kele kaka na maboko na nge.+
13 Nge fwete sala yonso kibeni na kuvutudila yandi kima yina yandi pesaka bonso kidimbu kaka na ntangu ntangu ke dinda, ebuna yandi ta lala ti lele na yandi,+ mpi yandi ta sakumuna nge; ebuna nge ta vanda muntu ya lunungu na meso ya Yehowa Nzambi na nge.
14 “Nge fwete kusa ve muntu ya kisalu ya ke bakaka lufutu yina kele na mpasi mpi kele nsukami, yo vanda mpangi na nge to munzenza yina kele na insi na nge, na kati ya bambanza* na nge.+
15 Nge fwete pesa yandi lufutu na yandi kaka kilumbu yina,+ na ntwala nde ntangu kudinda, sambu yandi kele na mpasi mpi luzingu* na yandi kele na lufutu na yandi. Kana ve, yandi ta boka na Yehowa sambu na nge, ebuna nge ta sala disumu.+
16 “Bo fwete fwa ve batata sambu na mambu yina bana na bo ke sala, mpi bo fwete fwa ve bana sambu na mambu yina batata na bo ke sala.+ Muntu fwete fwa kaka sambu na masumu na yandi mosi.+
17 “Nge fwete sambisa ve mambu ya munzenza to ya mwana ya me konda tata* na mutindu ya mbi,+ mpi nge fwete kanga ve lele ya mufwidi ya nkento bonso kidimbu sambu na mfuka.*+
18 Yibuka nde nge kumaka mpika na Ezipte, mpi Yehowa Nzambi na nge sumbaka nge diaka kuna.+ Yo yina mono ke songa nge na kusala diambu yai.
19 “Ntangu nge ke katula bima na kilanga na nge ebuna nge me vila kita mosi ya bambuma na kilanga, kuvutuka ve sambu na kubaka yo. Yo fwete bikala sambu na munzenza, mwana ya me konda tata, mpi mufwidi ya nkento,+ mpidina Yehowa Nzambi na nge ta sakumuna nge na mambu yonso yina nge ke sala.+
20 “Kana nge ke bula nti na nge ya olive, nge fwete vutukila ve kusala yo na balutangu na yo. Bambuma yina me bikala fwete bikala sambu na munzenza, mwana ya me konda tata, mpi mufwidi ya nkento.+
21 “Kana nge ke katula bambuma ya vinu na kilanga na nge ya vinu, nge fwete vutuka ve sambu na kukatula bambuma yina me bikala. Yo fwete bikala sambu na munzenza, mwana ya me konda tata, mpi mufwidi ya nkento.
22 Yibuka nde nge kumaka mpika na insi ya Ezipte. Yo yina mono ke songa nge na kusala diambu yai.
Banoti na nsi ya lutiti
^ To “kubuya.”
^ To “bonso kipiku.”
^ To “kubaka luzingu; kubaka moyo.”
^ To “moyo.”
^ Ngogo ya Kiebreo ya bo me balula na “lepre” ke tendula mambu mingi mpi yo lenda tendula mpi maladi ya mpusu ya mitindu mingi ya ke sambukilaka. Yo lenda tendula mpi maladi ya nkaka yina ke vandaka na bilele mpi na banzo.
^ Na kisina, “bakielo.”
^ To “moyo.”
^ To “mwana-nsiona.”
^ To “bonso kipiku.”
