Bazuzi 11:1-40
11 Yefte+ muntu ya Gileadi vandaka soda ya ngolo; yandi vandaka mwana ya nkento mosi ya ndumba, mpi Gileadi vandaka tata ya Yefte.
2 Kansi nkento ya Gileadi mpi butilaka yandi bana ya babakala. Ntangu bana ya nkento na yandi yelaka, bo kulaka Yefte mpi tubilaka yandi nde: “Nge ta baka ve dikabu na nzo ya tata na beto, sambu nge kele mwana ya nkento ya nkaka.”
3 Yo yina, Yefte tinaka bampangi na yandi mpi kwendaka kuzinga na insi ya Tobi. Ebuna bantu yina kondaka kisalu vukanaka ti Yefte, mpi bo landaka yandi.
4 Na nima ya mwa ntangu, bantu ya Amoni nwanisaka Izraele.+
5 Ebuna ntangu bantu ya Amoni nwanisaka Izraele, na mbala mosi bankuluntu ya Gileadi kwendaka kubaka Yefte na insi ya Tobi sambu yandi vutuka.
6 Bo tubilaka Yefte nde: “Kwisa mpi vanda komanda na beto, mpidina beto lenda nwanisa bantu ya Amoni.”
7 Kansi Yefte tubilaka bankuluntu ya Gileadi nde: “Keti beno ve bantu mengaka mono mingi kibeni na mpila nde beno kulaka mono na nzo ya tata na mono?+ Sambu na nki beno me kwisa na mono ntangu yai ya beno kele na mpasi?”
8 Ebuna bankuluntu ya Gileadi tubilaka Yefte nde: “Yo yina beto me kwisa ntangu yai kuvutukila nge. Kana nge kwenda ti beto mpi nge nwanisa bantu ya Amoni, nge ta kuma ntwadisi na beto, ya bantu yonso ya ke zingaka na Gileadi.”+
9 Yefte tubilaka bankuluntu ya Gileadi nde: “Kana beno vutula mono sambu na kunwanisa bantu ya Amoni, ebuna Yehowa kubedisa bo sambu na mono, mono ta kuma kibeni ntwadisi na beno!”
10 Bankuluntu ya Gileadi tubilaka Yefte nde: “Bika nde Yehowa kuvanda mbangi* na kati na beto kana beto sala ve mutindu nge me tuba.”
11 Yo yina Yefte kwendaka ti bankuluntu ya Gileadi, ebuna bantu tulaka yandi ntwadisi mpi komanda na bo. Yefte tubaka diaka bangogo na yandi yonso na ntwala ya Yehowa na Mispa.+
12 Ebuna Yefte tindaka binati-nsangu na ntotila ya bantu ya Amoni+ sambu na kutuba nde: “Inki diambu ya mbi mono me sala nge* sambu nge kwisa kunwanisa insi na mono?”
13 Ebuna ntotila ya bantu ya Amoni tubilaka binati-nsangu ya Yefte nde: “Yo kele sambu bantu ya Izraele bakaka insi na mono ntangu bo basikaka na Ezipte,+ yantika na Arnoni+ tii na Yaboki mpi tii na Yordani.+ Ntangu yai vutula yo na malembe yonso.”
14 Kansi Yefte tindaka diaka binati-nsangu na ntotila ya bantu ya Amoni
15 sambu na kutubila yandi nde:
“Yefte me tuba nde: ‘Izraele bakaka ve insi ya bantu ya Moabi+ mpi insi ya bantu ya Amoni,+
16 sambu ntangu bo basikaka na Ezipte, Izraele tambulaka na ntoto-makanga, tii na Nzadi-Mungwa ya Mbwaki+ mpi kwisaka na Kadeshi.+
17 Ebuna Izraele tindaka binati-nsangu na ntotila ya Edomi+ sambu na kutuba nde: “Pardo pesa beto nzila beto luta na ntoto na nge,” kansi ntotila ya Edomi waka ve. Bo tindaka mpi ndinga na ntotila ya Moabi,+ kansi yandi ndimaka ve. Yo yina Izraele landaka kuzinga na Kadeshi.+
18 Ntangu bo tambulaka na ntoto-makanga, bo lutaka na lweka ya insi ya Edomi+ mpi ya insi ya Moabi. Bo kwendaka na ndambu ya esti ya insi ya Moabi+ mpi bo salaka camp pene-pene ya Arnoni; bo kwisaka ve na kati ya ndilu ya Moabi,+ sambu Arnoni vandaka ndilu ya Moabi.
19 “‘Na nima, Izraele tindaka binati-nsangu na Sihoni ntotila ya bantu ya Amore, ntotila ya Eshboni, mpi Izraele tubilaka yandi nde: “Pardo, pesa beto nzila ya kuluta na insi na nge sambu na kukwenda na ntoto na beto mosi.”+
20 Kansi Sihoni ndimaka ve Izraele mpi pesaka yandi ve nzila ya kuluta na teritware na yandi, yo yina Sihoni vukisaka bantu na yandi yonso kisika mosi mpi salaka camp na Yahasi mpi bo nwanisaka Izraele.+
21 Ebuna Yehowa Nzambi ya Izraele pesaka Sihoni mpi bantu na yandi yonso na maboko ya Izraele, yo yina bo bedisaka bo ebuna Izraele bakaka insi ya mvimba ya bantu ya Amore, bantu ya insi yina.+
22 Na mutindu yina, bo bakaka teritware ya mvimba ya bantu ya Amore yantika na Arnoni tii na Yaboki, mpi yantika na ntoto-makanga tii na Yordani.+
23 “‘Yehowa Nzambi ya Izraele muntu kulaka bantu ya Amore na ntwala ya bantu na yandi Izraele,+ ebuna ntangu yai nge, nge ke zola kukula bo?
24 Keti nge ke bakaka ve konso kima yina nzambi na nge Kemoshi+ ke pesaka nge na kubaka? Yo yina, konso muntu yina Yehowa Nzambi na beto me kula na ntwala na beto kele muntu yina beto ta kula.+
25 Ebuna, keti nge kele mbote mingi kuluta Balaki+ mwana ya Sipore, ntotila ya Moabi? Keti yandi me swanisaka dezia Izraele, to keti yandi me nwanisaka bo dezia?
26 Ntangu Izraele zingaka bamvula 300 na Eshboni ti na babwala yina vandaka na nziunga na yo+ mpi na Aroere ti na babwala yina vandaka na nziunga na yo mpi na bambanza yonso yina kele pene-pene ya lweka ya nzadi Arnoni, sambu na nki nge mekaka ve kuvutula bo na ntangu yina?+
27 Mono me sala ve disumu na meso na nge, kansi nge ke sala mbi mutindu nge ke nwanisa mono. Bika nde Yehowa yina kele Zuzi,+ kuvanda zuzi bubu yai na kati ya bantu ya Izraele mpi ya bantu ya Amoni.’”
28 Kansi ntotila ya bantu ya Amoni waka ve nsangu yina Yefte tindilaka yandi.
29 Mpeve ya Yehowa kwisaka na zulu ya Yefte,+ ebuna yandi lutaka na Gileadi mpi na Manase sambu na kukwenda na Mispe ya Gileadi,+ mpi katuka Mispe ya Gileadi yandi landaka kukwenda tii na bantu ya Amoni.
30 Ebuna Yefte salaka lusilu+ na Yehowa mpi tubaka nde: “Kana nge pesa bantu ya Amoni na maboko na mono,
31 konso muntu yina ta basika na kielo ya nzo na mono sambu na kukwisa kukutana ti mono ntangu mono ta katuka na bantu ya Amoni mpi ta vutuka na ngemba, yandi ta kuma muntu ya Yehowa,+ mpi mono ta pesa yandi bonso dikabu ya kuyoka.”+
32 Yefte kwendaka kunwanisa bantu ya Amoni, ebuna Yehowa pesaka bo na maboko na yandi.
33 Yandi fwaka bo mingi kibeni yantika na Aroere nzila-nzila tii na Miniti—bambanza 20—mpi tii na Abele-keramimi. Na mutindu yina, bantu ya Amoni belaka na ntwala ya bana ya Izraele.
34 Nsuka-nsuka, Yefte kwisaka na nzo na yandi na Mispa,+ mpi tala! mwana na yandi ya nkento vandaka kubasika sambu na kukwisa kukutana ti yandi, mpi yandi vandaka kubula ngoma ya fioti mpi kukina! Yandi vandaka mwana mosi kaka ya Yefte. Katula yandi, Yefte vandaka ve ti mwana ya nkaka, yo vanda ya bakala to ya nkento.
35 Ntangu yandi monaka mwana na yandi ya nkento, yandi pasulaka bilele na yandi mpi tubaka nde: “O mwana na mono! Nge me pasula ntima na mono,* sambu nge me kuma muntu yina mono me kula. Mono salaka lusilu na Yehowa, mpi mono lenda soba ve.”+
36 Kansi mwana na yandi ya nkento tubilaka yandi nde: “Tata na mono, kana nge salaka lusilu na Yehowa, sala mono mutindu nge silaka,+ sambu Yehowa me vutula mbi na bambeni na nge, bantu ya Amoni.”
37 Ebuna yandi tubilaka tata na yandi nde: “Bika nde diambu yai kusalama sambu na mono: Bika nde mono vanda mono mosi bangonda zole, mono kwenda na bangumba mpi mono dila kimwense na mono ti banduku na mono ya bankento.”*
38 Ebuna Yefte tubaka nde: “Kwenda!” Yo yina yandi bikaka mwana na yandi ya nkento yandi kwenda bangonda zole; mpi yandi kwendaka na bangumba ti banduku na yandi sambu na kudila kimwense na yandi.
39 Na nsuka ya bangonda zole, mwana yina ya nkento vutukaka na tata na yandi, ebuna na nima tata na yandi lungisaka lusilu yina yandi salaka sambu na yandi.+ Mwana yina ya nkento bikalaka ve kuvukisa nitu ti bakala. Mpi diambu yai kumaka kikalulu* na Izraele:
40 Konso mvula, bana-bankento ya Izraele vandaka kukwenda bilumbu iya na mvula sambu na kupesa mwana ya Yefte, muntu ya Gileadi, lukumu.
Banoti na nsi ya lutiti
^ Na kisina, “muntu yina ke wa.”
^ Na kisina, “Inki diambu mono ti nge?”
^ Na kisina, “Nge me kulumusa mono na nsi kibeni.”
^ To “mono dila ti banduku na mono sambu mono ta bikalaka kukwela ve.”
^ To “nsiku.”
