Mwana ke yelaka mbote na nzo yina bibuti ke zolanaka mpi ke pesanaka luzitu. (Bakolosai 3:14, 19) Bibuti ya mbote ke zolaka bana na bo mpi ke sikisaka bo kaka mutindu Yehowa Nzambi sikisaka Mwana na yandi.—Tanga Matayo 3:17.

Tata na beto ya zulu ke widikilaka bansadi na yandi mpi ke bakisaka mawi na bo. Bibuti ke salaka mbote na kulanda mbandu na yandi mpi ke widikilaka bana na bo ntangu bo ke tuba. (Yakobo 1:19) Bibuti fwete tudila mawi ya bana na bo dikebi, ata yo kele mbote ve.—Tanga Kutanga 11:11, 15.

Sambu nge kele kibuti, nge kele ti kiyeka ya kutula bansiku. (Baefezo 6:1) Landa mbandu ya Nzambi. Yandi ke zolaka bana na yandi na mutindu yandi ke zabisaka bo na pwelele yonso bansiku na yandi mpi bampasi ya lenda kumina bo kana bo buya kulemfukila yo. (Kuyantika 3:3) Na kisika ya kupusa bantu na kulemfukila yandi na kingolo-ngolo, Nzambi ke zabisaka bo mambote ya bo lenda baka kana bo ke sala mambu ya mbote.—Tanga Yezaya 48:18, 19.

Vanda ti lukanu ya kusadisa bana na nge na kuzola Nzambi. Mpidina, bo ta sala mambu na mayele yonso ata nge kele ve ti bo kisika mosi. Diaka, Nzambi ke longaka ve kaka na bangogo, kansi yandi ke pesaka mbandu. Yo yina, yantika ntete na kuzola Nzambi sambu nge longa bana na nge mpi na kuzola yandi.—Tanga Kulonga 6:5-7; Baefezo 4:32; 5:1.