Na mpimpa ya nsuka na ntwala ya kupesa luzingu na yandi, Yezu pesaka balongoki na yandi ya kwikama ntuma ya kuyibuka to ya kusungimina kimenga na yandi. Ntangu yandi sadilaka dimpa ya kukonda levire mpi vinu ya mbwaki na ntwala na bo, yandi yantikisaka nkinsi yina bo ke bingaka nde Madia ya Nsuka to Madia ya Nkokila ya Mfumu mpi yandi pesaka ntuma yai: “Beno landa na kusala yo sambu na kuyibuka mono.”—Luka 22:19.

Konso mvula, Bambangi ya Yehowa na ntoto ya mvimba ke vukanaka sambu na kusungimina lufwa ya Yezu. Na 2014, Lusungiminu ta salama na Kintete, Aprili 14 na nima ya kudinda ya ntangu.

Beto ke binga nge na kiese yonso na kukwisa na lukutakanu yai sambu na kuwa malongi ya nkaka yina ta tendula mfunu ya lufwa ya kimenga ya Yezu. Lukutakanu yai ta vanda ya ofele. Bo ta kungula ve mbongo. Muntu yina pesaka nge zulunalu yai lenda zabisa nge ntangu mpi kisika yina Lusungiminu ta salama na teritware na beno to nge lenda tala yo na site Internet na beto, jw.org. Kana nge me zola, sonika dati yango mpi beto ke tula ntima nde nge ta konda ve