Lufutumuku ya Yezu yikaka balongoki na yandi lukwikilu mpi kikesa. Mu mbandu, ntumwa Polo salaka nzietelo na Asie Mineure ya mvimba mpi na Mediterane sambu na kukangula mabundu mpi kusiamisa bampangi Bakristu na kutelamina bupusi ya bikalulu ya mbi mpi ya kimbeni ya ngolo. Ata na nsi ya bampasi yina yonso, dibundu ya Bukristu landaka kuyela mpi bantu mingi kumaka Bakristu.

Na nima, bo tulaka Polo na boloko. Kansi ata kuna, yandi sonikilaka mabundu ya Bukristu mikanda yina vandaka ti bandongisila mpi bansiamisa. Nkutu, yandi kebisaka bo sambu na kigonsa mosi ya nene​—apostazi. Na lutwadisu ya mpeve santu ya Nzambi, Polo bikulaka nde “bibulu ya nku” yina ke tubaka “mambu ya nioka-nioka” ta kota na kati na bo mpi ‘ta benda balongoki na kulanda bo.’​—Bisalu 20:29, 30.

Apostazi yai yantikaka na nsuka ya mvu-nkama ya ntete. Na ntangu yina, Yezu yina futumukaka pesaka ntumwa Yoane mbona-meso ya kifwani ya mambu yina ta salama na makwisa. Mutindu Yoane sonikaka yo, yo vanda bambeni to balongi ya luvunu, ata muntu mosi ve lendaka kukanga Nzambi nzila ya kulungisa lukanu na yandi ya luyantiku sambu na ntoto mpi bantu. ‘Bantu ya makanda yonso, ya mabuta yonso, ya bandinga yonso, mpi ya bansi yonso,’ ta wa nsangu ya mbote ya Kimfumu ya Nzambi. (Kusonga 14:6) Ntoto ta kituka diaka paladisu mpi muntu yonso yina ke zola kusala luzolo ya Nzambi ta zinga kuna!

Keti yo kele ve “nsangu ya mbote” sambu na nge? Kana mpidina, longuka mambu mingi ya me tala nsangu ya Nzambi sambu na bantu ya kele na Biblia mpi mutindu yo lenda natila nge mambote bubu yai mpi na makwisa.

Nge lenda tanga Biblia na Internet na www.isa4310.com. Kaka na site yina, nge lenda tanga mpi tumikanda Biblia​—Inki Kele Nsangu na Yo? (Kifalansa) mpi Nsangu ya Mbote ya Mekatuka na Nzambi! yika mpi mukanda Inki Biblia Kelongaka Mpenza? ti mikanda ya nkaka yina ke monisa kikuma yina beto lenda tudila Biblia ntima mpi kusadila bandongisila na yo na dibuta mpi na luzingu na beto. To yula konso Mbangi ya Yehowa sambu na kuzaba mambu mingi.

—Yo me katuka na Bisalu, Baefezo, Bafilipi, Bakolosai, Filemoni, 1 Yoane, Kusonga.