Mono yelaka na Santiago, nto-mbanza ya insi Chilie, kisika bantu mingi vandaka kusadila bima yina ke lausaka, mubulu, mpi kufwa bantu. Bo fwaka tata na mono ntangu mono vandaka ti bamvula 5. Na nima, mama kumaka kuzinga ti bakala mosi ya nku. Ntangu yonso, yandi vandaka kubula mono ti mama. Tii bubu yai, mambu yina me bikaka bamputa na mawi na mono.

Ntangu mono vandaka kuyela, mambu yina pusaka mono na kukuma muntu ya mubulu kibeni. Mono kumaka kuwidikila miziki yina bo ke bingaka heavy-metal, kulauka malafu, mpi bantangu ya nkaka, kusadila bima yina ke lausaka. Mbala mingi, mono vandaka kunwana na balabala ti bantu yina ke tekaka bima ya ke lausaka, ya vandaka kusosa kufwa mono. Kilumbu mosi, muntu mosi ya mubulu yina vandaka mbeni na mono, futaka muntu mosi ya nku mbongo sambu na kufwa mono, kansi mono tinaka ata yandi lwadisaka mono na mbele. Kilumbu ya nkaka, kimvuka ya bantu yina ke tekaka bima yina ke lausaka tulaka munduki na ntu na mono mpi sosaka kufwa mono.

Na 1996, mono zolaka nkento mosi na zina ya Carolina, mpi beto kwelanaka na 1998. Ntangu beto butaka mwana na beto ya ntete ya bakala, mono kumaka kuwa boma na kukuma bonso tata na mono ya lundi sambu na mubulu na mono, mpi kubebisa dibuta na mono. Yo yina, mono kwendaka kusosa lusadisu na lupitalu mosi ya ke sadisaka bantu ya mubulu (centre de rééducation fonctionnelle). Mono bakaka lusansu kansi yo nungaka ve. Mono kumaka kuwa makasi ata na mambu ya fioti-fioti mpi ata muntu mosi ve lendaka kuyala mono. Mono salaka diambu mosi ya mbi ntangu mono sosaka kudifwa sambu na kuyambula kuniokula dibuta na mono. Kansi diambu ya kiese, mono nungaka ve na kusala yo.

Tuka bamvula mingi, mono vandaka kundima ve nde Nzambi kele, kansi mono kumaka na mpusa ya kusoba mabanza na mono. Yo yina, mono kumaka kusambila na dibundu mosi sambu na mwa ntangu. Kaka na ntangu yina, nkento na mono yantikaka kulonguka Biblia ti Bambangi ya Yehowa. Mono vandaka kumenga Bambangi, mpi mbala mingi mono vandaka kuzabisa bo bangogo ya mafingu. Kansi diambu ya kuyituka, ntangu yonso bo vandaka kutubila mono na mawete.

Kilumbu mosi, Carolina songaka mono na kutanga Nkunga 83:18 (NW) na Biblia na mono mosi. Verse yina ke tuba pwelele  nde zina ya Nzambi kele Yehowa. Mono yitukaka sambu na dibundu na mono, mono longukaka mambu ya nzambi, kansi ve ya Yehowa. Na luyantiku ya mvu 2000, mono yantikaka mpi kulonguka Biblia ti Bambangi ya Yehowa.

Ntangu mono kumaka kuyela na kimpeve, mono bakaka ndembikilu na kuzaba nde Yehowa kele Nzambi ya mawa mpi ya ke lolulaka. Mu mbandu, na Kubasika 34:6, 7, Biblia ke monisa nde Yehowa kele ‘Nzambi yina ke wilaka bantu mawa mpi ya ke waka makasi nswalu ve mpi ya kele ya kufuluka na zola ya kwikama, yina ke songaka mambote na yandi na bantu yonso, mpi yina ke lolulaka kifu mpi disumu.’

Ata mpidina, yo vandaka pete ve na kusadila mambu yina mono vandaka kulonguka. Mono vandaka kumona nde mono lendaka ve kuyambula nkadilu na mono ya mubulu. Konso ntangu yina mono vandaka kubwa, Carolina vandaka kusiamisa mono na zola yonso. Yandi vandaka kuyibusa mono nde, Yehowa ke mona bikesa na mono. Lusadisu na yandi pesaka mono ngolo ya kusala bikesa sambu na kusepedisa Yehowa, ata mono vandaka kumona nde mono ta nunga ve.

Kilumbu mosi, Alejandro, mpangi yina vandaka kulonguka Biblia ti mono, zabisaka mono na kutanga Bagalatia 5:22, 23. Baverse yai ke tuba nde mbuma ya mpeve ya Nzambi kele “zola, kiese, ngemba, ntima-nda, ntima ya mbote, bumbote, lukwikilu, mawete, kudiyala.” Alejandro tubaka nde, mono lendaka ve kuyedisa bikalulu yina na ngolo na mono mosi, kansi ya mpeve santu ya Nzambi. Kieleka yina sobaka kibeni mabanza na mono!

Na nima, mono kwendaka na lukutakanu ya distrike ya Bambangi ya Yehowa. Ndonga, bunkete mpi zola yina mono monaka kuna ndimisaka mono nde mono monaka dibundu ya kieleka. (Yoane 13:34, 35) Mono bakaka mbotika na Februari 2001.

Yehowa sadisaka mono na kukatuka muntu ya mubulu mpi kukuma muntu ya ngemba. Mono ke monaka bonso nde yandi basisaka mono na mutambu yina kangaka mono. Bantu mingi mengaka mono, mpi mono ke pesa bo ve foti. Kansi, ntangu yai mono ke sepela kusadila Yehowa na ngemba ti nkento na mono mpi bana na beto zole ya babakala.

Bampangi na mono ya kinsuni mpi banduku na mono ya ntama yitukaka na mutindu mono me sobaka. Yo yina, mingi na bo me kumaka kulonguka Biblia. Mono me bakaka mpi dibaku ya kusadisa bankaka na kuzaba Yehowa. Mono ke sepelaka mingi ntangu mono ke monaka mutindu Biblia me sobaka luzingu na bo!