Keti Yehowa ke kudibanzaka mpenza sambu na beto, to keti yandi ke tulaka ve dikebi na bampasi yina beto ke kutana ti yo? Mvutu ya Biblia na ngiufula yina ke pesa beto kikesa. Ya kieleka, Nzambi ke kudibanzaka mpenza sambu na beto mpi yandi ke zolaka nde beto vanda na luzingu ya mbote. Konso kilumbu Nzambi ke pesaka bantu yonso​—ata nkutu bayina ke monisilaka yandi ve ntonda—​nzila ya kubaka balusakumunu ya bumbote na yandi ya nene. Beto tadila bangogo ya ntumwa Polo.​—Tanga Bisalu 14:16, 17.

Ntangu yandi vandaka kusolula ti bantu ya mbanza Listre, bayina vandaka ve kusambila Nzambi Polo tubaka nde: “Na ntangu ya ntama, [Nzambi] pesaka makanda yonso nzila ya kulanda banzila na bo mosi, ata yandi kudibikaka mpenza ve kukonda kimbangi kansi yandi salaka mambu ya mbote mutindu yandi pesaka beno mvula mpi bansungi yina bambuma ke basikaka mingi, mpi yandi pesaka beno madia mingi mpi fulusaka bantima na beno na kiese.” Bangogo yai vandaka kutendula inki sambu na bawi ya Polo?

Bantu ya Listre vandaka kubakisa mbote-mbote bangogo ya Polo. Bo vandaka bantu yina ke salaka bilanga mpi ntoto na bo vandaka ti masa mingi mpi kubuta mbote. Kansi, mutindu Polo yibusaka bo, Nzambi kele Nto ya mvula mpi ya bansungi ya bambuma. Yo yina, konso ntangu yina bo vandaka kukatula bambuma ya bilanga mpi kudia madia ya kitoko, bo vandaka kubaka balusakumunu ya bumbote ya Nzambi.

Bangogo yina Polo zabisaka bantu ya Listre ke pesa beto malongi mingi ya mfunu na yina me tala Yehowa Nzambi.

Yehowa me pesaka beto kimpwanza ya kupona. Simba nde Yehowa pesaka nzila na bantu ya Makanda yonso na “kulanda banzila na bo mosi.” Mukanda mosi ya bambaludi ya Biblia ke tuba nde, bangogo yina lenda tendula “kulanda nzila yina ke sepedisa bo” to “kusala mambu yina bo ke mona nde yo kele mbote.” Yehowa ke pusaka ve muntu na ngolo na kusambila yandi. Yandi me pesaka beto kimpwanza ya kupona​—makuki ya kupona luzingu na beto mosi.​—Kulonga 30:19.

Yehowa ke zola nde beto zaba yandi. Polo tubaka nde, yandi me “kudibikaka . . . ve kukonda kimbangi.” Mukanda yina beto tubilaka ke tuba nde, bo lenda balula nsa yai nde: “Yandi me monisaka bantu pwelele kana yandi kele Nzambi ya inki mutindu.” Lugangu ya Nzambi ke taka kimbangi ya ngolo ya “bikalulu na yandi ya ke monanaka ve,” mu mbandu bumbote, mayele, ngolo mpi zola. (Baroma 1:20) Na nsadisa ya Biblia, Yehowa me monisaka mambu mingi ya me tala yandi. (2 Timoteo 3:16, 17) Keti yo ke monisa ve nde, yandi ke zolaka nde beto zaba yandi?

Yehowa ke zola nde beto vanda na kiese. Polo tubaka nde, yandi ‘ke pesaka beto madia mingi mpi ke fulusaka bantima na beto na kiese.’ Ata nsumuki yina me zaba Yehowa ve lenda dia sambu na kusepedisa ntima mpi kuvanda na mwa kiese na luzingu. Kansi, Nzambi ke zolaka nde beto vanda na kiese ya kieleka mpi ya kimakulu. Beto lenda zwa kiese yango kaka kana beto ke longuka kieleka ya me tala yandi mpi ke sadila yo na luzingu na beto.​—Nkunga 144:15; Matayo 5:3.

Konso kilumbu, beto yonso ke bakaka balusakumunu ya bumbote ya Yehowa. Sambu na nki ve kulonguka mambu mingi na mutindu nge lenda monisa ntonda na nge na Nzambi yina ‘ke pesaka beto madia mingi mpi ke fulusaka bantima na beto na kiese’?