Bimangu Yina Tasalama Ntama Mingi Ve

KANA munganga mosi kezola kusala nge operasio mosi ya ngolo, kansi nge mewa nde yandi mesalaka ntete ve operasio ya mutindu yina, nki mutindu nge takudiwa? Ntembe kele ve nde yo tayangisa nge. Kansi nki tasalama kana nge mewa nde yandi muntu ketwadisaka kisalu yina mpi mesalaka bantu mingi dezia operasio yina yandi kezola kusala nge? Keti nge tatula ve ntima nde yandi tasadisa nge?

Nsi-ntoto yai ya beto kezinga kele ti maladi mpi yo kelomba nde bo sala yo “operasio” mosi ya ngolo. Na nsadisa ya Ndinga na yandi, Biblia, Yehowa Nzambi mesila na kuvutula paladisu awa na ntoto. (2 Piere 3:13) Kansi na ntwala nde yo salama, yandi fwete katula mambu yonso ya mbi. (Nkunga 37:9-11; Bingana 2:21, 22) Sambu na kukitula ntoto yai paladisu, yandi fwete katula mambi yonso ya beto kemona na nzyunga na beto. Yo tavanda mpenza kimangu sambu mambu yai yonso kusalama!​—Kusonga 21:4, 5.

Bambangi ya Yehowa kekwikila nde bansoba ya nene tasalama ntama mingi ve. Sambu na nki? Sambu bimangu yina Yehowa Nzambi salaka na ntama kendimisa nde yandi kele ti ngolo ya kulungisa balusilu na yandi. Sambu na kundimisa beto, bika beto tadila bimangu sambanu yina Biblia ketubila mpi balusilu yina yo kepesa sambu na bilumbu kekwisa.

 Beto kelomba nge na kulanda kulonguka balusilu yina Biblia kepesa sambu na makwisa. Lukwikilu na nge tayela yika mpi kivuvu na nge ya kubaka mambote na bimangu yina Yehowa tasala.

[Lupangu/​Bifwanisu ya kele na lutiti 7]

KIMANGU:

YEZU DISAKA MAFUNDA YA BANTU NA MAMPA TI MWA BAMBISI YA MASA.​—MATAYO 14:13-21; MARKO 8:1-9; YOANE 6:1-14.

LUSILU:

‘Ntoto tabuta bambuma; Nzambi, Nzambi na beto ta sakumuna beto.’​—NKUNGA 67:7.

MAMBU YINA TASALAMA NA MAKWISA:

ATA MUNTU MOSI VE TA NYOKWAMA DYAKA NA NZALA.

KIMANGU:

YEZU KANGULAKA MESO YA BIFWA-MESO.​—MATAYO 9:27-31; MARKO 8:22-26.

LUSILU:

‘Meso ya bifwa-meso ta mona mpi makutu ya bifwa-makutu ta kanguka.’​—YEZAYA 35:5.

MAMBU YINA TASALAMA NA MAKWISA:

BIFWA-MESO YONSO TA MONA.

KIMANGU:

YEZU BELULAKA BAYINA VANDAKA TI BIFU NA NITU.​—MATAYO 11:5, 6; YOANE 5:3-9.

LUSILU:

“Bantu ya makulu-kifu ta pumbuka bonso mbambi.”​—YEZAYA 35:6.

MAMBU YINA TASALAMA NA MAKWISA:

BANTU YONSO YA KELE TI BIFU NA NITU TABELUKA.

KIMANGU:

YEZU BELULAKA MALADI YA MUTINDU NA MUTINDU.​—MARKO 1:32-34; LUKA 4:40.

LUSILU:

Ata muntu mosi ta tuba nde: “Mono ke bela.”​—YEZAYA 33:24.

MAMBU YINA TASALAMA NA MAKWISA:

MALADI YONSO TAMANA. BETO TAVANDA NA MAVIMPI YA MBOTE.

KIMANGU:

YEZU VANDAKA TI KIYEKA NA ZULU YA BIMA YONSO.​—MATAYO 8:23-27; LUKA 8:22-25.

LUSILU:

“Bo ta tunga banzo, bo ta zinga muna; bo ta kuna bilanga ya vinu, bo ta dia bambuma na yo. Bisalu ya bo ta sala yo ta vanda ya mpamba ve.”​—YEZAYA 65:21, 23.

‘Nge ta mona mpasi ve sambu nge tawa boma diaka ve mpi bantu ya nku ta kwisa penepene na nge ve.’​—YEZAYA 54:14.

MAMBU YINA TASALAMA NA MAKWISA:

BISUMBULA YA LUGANGU TAVANDA DYAKA VE.

KIMANGU:

YEZU FUTUMUNAKA BAFWA.​—MATAYO 9:18-26; LUKA 7:11-17.

LUSILU:

‘Bantu yonso yina kele na maziamu, ta basika.’​—YOANE 5:28, 29.

‘Nzadi-mungwa vutulaka bafwa yina vandaka na kati na yo. Lufwa ti maziamu vutulaka mpi bantu yina vandaka na kati na yo.’​—KUSONGA 20:13.

MAMBU YINA TASALAMA NA MAKWISA:

BANTU YONSO YINA BETO KEZOLAKA YA MEFWAKA TAFUTUMUKA.