Kwenda Penepene na Nzambi

“Moyo na Nge Ta . . . Fumbama na Zulu na Mono”

KUDIKULUMUSA kele kikalulu yina kesepedisaka. Mbala mingi beto kewaka mbote na kuvanda ti muntu ya kudikulumusa. Kansi dyambu ya mawa kele nde, yo kele mpasi na kumona kudikulumusa ya kyeleka na nsi-ntoto ya bubu yai​—mingi-mingi na bantu yina kevandaka ti kiyeka. Ebuna inki beto lenda tuba sambu na Yehowa Nzambi, Muntu ya kuluta ngolo na luyalanganu ya mvimba? Keti yandi kele ti kudikulumusa? Bika beto tadila bangogo ya mbikudi Yeremia ya kele na Mawa 3:20, 21, NW. Beto ketanga nde: “Ya kyeleka moyo na nge ta yibuka mpi ta fumbama na zulu na mono. Yo yina mono tayibusa ntima na mono. Yo yina mono talanda kuvingila.”

Yeremia sonikaka mukanda ya Mawa ntangu dikanda ya Izraele vandaka na bilumbu ya mpasi. Yandi katukaka kumona mutindu bantu ya Babilone fwaka Yeruzalemi, mbanza yina yandi vandaka kuzola mingi mpi dyambu yai pesaka yandi mpasi. Mbikudi yai zabaka nde mpasi yina vandaka ndola yina Nzambi pesaka bantu ya Izraele sambu na masumu na bo. Kansi, keti Yeremia vidisaka kivuvu? Keti yandi monaka nde Yehowa vandaka ntama to kondaka mawa sambu na kubakisa bantu yina balulaka ntima mpi kupesa bo dyaka kivuvu? Widikila mutindu Yeremia ketuba na kisika ya bantu ya mbanza na yandi.

Ata bantu mingi vandaka na mawa, Yeremia vandaka ti kivuvu. Yandi dilaka na Yehowa nde: “Ya kieleka moyo * na nge ta yibuka mpi ta fumbama na zulu na mono.” (Verse 20) Yeremia vandaka ve ti baketi-keti. Yandi zabaka nde Yehowa tavila yandi ve​—to bantu ya mbanza na yandi yina balulaka ntima. Kansi, Nzambi Nkwa-Ngolo Yonso tasala nki?​—Kusonga 15:3.

Yeremia kwikilaka nde Yehowa ta “fumbama” na zulu ya bantu yina kebalulaka mpenza ntima. Mbalula yankaka ketuba nde: “Aa, yibuka, mpi fumbama tii na mono.” Bangogo yai kesadisa beto na kumona nde Yehowa kele mawete. Yehowa “Muntu ya Kuluta Kuzanguka na zulu ya ntoto ya mvimba” ta fumbama, disongidila takatula bampasi yina bansambidi na yandi kemona mpi tandima bo dyaka. (Nkunga 83:18, NW) Sambu Yeremia vandaka ti kivuvu yai, yandi bakaka kikesa ya kyeleka na mpasi yina vandaka na ntima na yandi. Mbikudi yai ya kwikama vandaka ti lukanu ya kuvingila tii ntangu yina Yehowa tulaka sambu na kugulusa bantu ya mbanza na yandi yina balulaka ntima.​—Verse 21.

Bangogo yina Yeremia sonikaka kelonga beto mambu zole ya metala Yehowa. Ya ntete, yandi kele muntu ya kudikulumusa. (Nkunga 18:35, NW) Ata yandi kele ti ‘ngolo mingi kuluta,’ Yehowa kendimaka kufumbama tii na kiteso na beto, na mutindu ya kifwani, sambu na kusadisa beto ntangu beto ke na mpasi. (Yobi 37:23; Nkunga 113:5-7) Keti dibanza yai kepesa nge ve kikesa? Ya zole, Yehowa kewilaka bantu mawa; yandi kevandaka ya kuyilama sambu na kulolula bansumuki yina mebalula ntima mpi kundima bo dyaka. (Nkunga 86:5) Kikalulu ya kulolula mpi ya kudikulumusa kevandaka na kuwakana.

Beto kemonisa mpenza ntonda na Yehowa sambu yandi kele ve bonso bantu yina kele na kiyeka, yina lulendo kepusaka na kukuma ntu-ngolo mpi na kukonda kuwila bankaka mawa! Na nima ya kulonguka nde Yehowa kele Nzambi ya kudikulumusa yina kevandaka ya kuyilama sambu na ‘kufumbama’ mpi kupesa bansambidi na yandi kivuvu ntangu bo kele na mpasi, keti yo kepusa nge ve na kuzola kulonguka mambu mingi ya metala yandi?

[Noti na nsi ya lutiti]

[Bangogo sambu na kubenda dikebi ya kele na lutiti 32]

Yehowa kendimaka kufumbama tii na kiteso na beto, na mutindu ya kifwani, sambu na kusadisa beto ntangu beto ke na mpasi