Abrahami Muntu ya Kudikulumusa

Na ntangu, Abrahami mevanda na nsi ya madidi na kati ya nzo na yandi ya tenta. Na kintama, Abrahami kemona babakala tatu yina ketambula sambu na kutala bwala. * Ntembe kele ve nde, yandi landaka bo mpi lombaka bo na kupema fyoti mpi kuvanda na nzo na yandi. Yandi natilaka bo “mampa” mpi yantikaka na kudibongisa sambu na kupesa bo madya mumbandu manteka, miliki ti mbisi ya kitoko. Ntangu yandi vandaka kupesa bo madya, Abrahami monisaka kaka ve kikalulu ya kuyamba kansi mpi kudikulumusa ya kyeleka mutindu beto tamona yo.​—Kuyantika 18:1-8.

KUDIKULUMUSA KELE INKI? Kudikulumusa ketendula kukonda lulendo to kukonda kuvanda ntu-ngolo. Muntu ya kudikulumusa kendimaka nde bantu yankaka meluta yandi na mutindu mosi buna. (Filipi 2:3) Yandi kewaka bangindu ya bantu yankaka mpi kevandaka ti luzolo ya kusadila bantu yankaka mambu yina kemonanaka ya kukonda mfunu.

INKI MUTINDU ABRAHAMI MONISAKA KUDIKULUMUSA? Abrahami vandaka kusadila bantu yankaka mambu na kyese yonso. Mutindu beto tubilaka yo na luyantiku, Abrahami monaka na kintama banzenza tatu mpi kukonda kusukinina yandi pesaka bo bima yonso yina bo vandaka na yo mfunu. Kukonda kusukinina, Sara nkento na yandi yantikaka kulamba madya. Kansi, zaba nde Abrahami salaka mpi mambu mingi: Yandi landaka banzenza yina, yandi pesaka bo madya, yandi kwendaka na lupangu ya bitwisi mpi ponaka mbisi ya kitoko sambu na kufwa, yandi tulaka bima yonso na mesa sambu na banzenza yina. Na kisika ya kuyambudila bansadi na yandi bisalu yina yonso, muntu yai ya kudikulumusa kusalaka mambu yonso yina vandaka mfunu. Yandi monaka ve nde kusadila bankaka kele kufyotuna lukumu na yandi.

Abrahami widikilaka bangindu ya bantu yina yandi vandaka kutwadisa. Biblia ketubila kaka na bunkufi masolo yina Abrahami solulaka ti Sara. Kansi, beto ketanga mbala zole nde Abrahami widikilaka bangindu ya Sara mpi sadilaka yo. (Kuyantika 16:2; 21:8-14) Na dibaku  mosi buna, bangindu ya Sara “pesaka Abrahami mpasi mingi na ntima.” Kansi, ntangu Yehowa solulaka ti Abrahami mpi zabisaka yandi na kusadila ngindu ya Sara, na kudikulumusa yonso Abrahami waka mpi sadilaka ngindu yango.

INKI MALONGI BETO KEBAKA? Kana beto kele mpenza bantu ya kudikulumusa beto tavanda na kyese ya kusadila bantu yankaka. Beto tazwa kyese ntangu beto kesala yonso yina beto lenda sala sambu na kukumisa luzingu na bo mbote kuluta.

Beto lenda monisa mpi kudikulumusa ntangu beto kesadila bangindu ya bantu yankaka. Na kisika ya kubuya ngindu mosi buna kaka sambu beto yindulaka yo ve beto mosi, na mayele yonso beto lenda sadila mambu yina kekatuka na bantu yankaka. (Bingana 15:22) Kikalulu ya kuwidikila ya mutindu yai kenataka mambote na bantu yina kele ti kiyeka na zulu ya bankaka. John yina kele mfumu ya kisalu tuka bamvula mingi ketuba nde: “Mono memonaka nde mfumu ya mbote kesalaka mambu na mpila nde bantu yina yandi ketwadisa kuvanda ti kimpwanza ya kumonisa bangindu na bo.” Yandi keyika nde: “Yo kelombaka kudikulumusa sambu na kubakisa nde muntu yina nge ketwadisa lenda zaba mutindu ya mbote ya kusala mambu kuluta nge. Yo yina, ata muntu mosi ve yo vanda mfumu, kevandaka kaka ti bangindu ya mbote.”

Ntangu beto kelanda mbandu ya Abrahami na kuwidikilaka bangindu ya bantu yankaka mpi na kusalaka bisalu yina kemonana ya kukonda mfunu sambu na mambote na bo, Yehowa kendimaka beto. Na mambu yonso, “Nzambi kele mbeni ya bantu ya lulendo, kansi yandi ke songaka mambote na yandi na bantu yina ke na lulendo ve.”​—1 Piere 5:5.

[Noti na nsi ya lutiti]