Bisumbula Tavanda Dyaka Ve!

KANA muntu mosi kusonga nge nde: “Bisumbula tavanda dyaka ve,” inki mvutu nge tapesa? Nge lenda tuba nde: “Ziku nge kelala ndosi. Bisumbula kele mosi ya mambu yina kesalamaka na luzingu.” To nge lenda tuba nde: ‘Yandi keyindula nde yandi kekusa nani?’

Ata yo kemonana bonso nde bisumbula ya lugangu tasalamaka konso ntangu, kivuvu mosi ya kyeleka kemonisa nde yo tasalamaka dyaka ve. Kansi, nsoba yango tasalama ve na bikesa ya bantu. Bantu kele ve ti makuki ya kubakisa mbote-mbote mutindu mambu kesalamaka na lugangu mpi kikuma na yo, bo lenda manisa ve bisumbula ya lugangu to kusoba yo. Na mayele na yandi mpi na mutindu na yandi ya kutadila mambu mbote-mbote, Salomo yina vandaka ntotila ya Izraele kusonikaka nde: Bantu “ta kuka kuzaba ve mambu ya Nzambi ke sala. Ata [bo] tula ngolo nki mpila, [bo] ta kuka ve. Bantu ya mayele lenda sosa mpila ya kuzaba yo, kansi bo lenda kuka ve.”​—Longi 8:17.

Kana bantu lenda manisa ve bisumbula ya lugangu, nani lenda manisa yo? Biblia kemonisa nde Ngangi na beto muntu tasala nsoba yai. Yandi Muntu gangaka bima yina kele na ntoto, mu mbandu kutambula ya masa (cycle de l’eau). (Longi 1:7) Mpi na kuswaswana ti bantu, Nzambi kele ti ngolo yina kemanaka ve. Sambu na kundimisa dyambu yai, mbikudi Yeremia kutubaka nde: “Mfumu Nzambi, nge muntu salaka zulu ti ntoto na ngolo na nge; ata kima mosi me luta nge na ngolo ve.” (Yeremia 32:17) Sambu Nzambi gangaka ntoto ti bima yonso, yo mefwana nde yandi zaba mutindu ya kuyidika mambu na mpila nde bantu lenda zinga na ngemba mpi na lutaninu na ntoto.​—Nkunga 37:11; 115:16.

Kansi, inki mutindu Nzambi tanata nsoba yina bantu kele na yo mfunu? Yezu kutubaka nde: “Kana beno mona nde mambu yina ke bwa, beno fweti zaba nde Kimfumu ya Nzambi me kuma penepene.” (Matayo 24:3; Luka 21:31) Kimfumu ya Nzambi, yina kele luyalu ya zulu yina Nzambi mesalaka tanata bansoba ya nene na ntoto, nkutu yo tayala bima ya lugangu. Ata Yehowa Nzambi kele ti ngolo ya kusala mambu yina yandi mosi, yandi mepesaka mwana na yandi mukumba ya kusala mambu yango. Mbikudi Daniele kutubilaka mwana yina ntangu yandi tubaka nde: “Ntangu yai yandi bakaka kiyeka, lukumu ti ngolo ya kimfumu na mpila nde bantu yonso ya nsi-ntoto ata bo kele nki dikanda to nki ndinga, bo sadila yandi.”​—Daniele 7:14.

Nzambi mepesaka Mwana na yandi Yezu Kristu, kiyeka ya kusala bansoba yonso yina kele mfunu sambu ntoto kuvanda kisika mosi ya kitoko. Bamvula mafunda zole melutaka, tuka Yezu vandaka na ntoto, yandi monisaka na kiteso ya fyoti makuki yina yandi kele na yo ya kuyala bima ya lugangu. Kilumbu mosi ntangu yandi ti balongoki na yandi vandaka na bwatu na Nzadi Galilea, “mupepe ya ngolo kwisaka na mbala mosi. Kitembo ya masa yantikaka kukota na kati ya bwatu. Yo yina, bwatu yantikaka kufuluka na masa.” Balongoki na  yandi kuwaka boma. Sambu bo zolaka kugulusa luzingu na bo, bo tedimisaka Yezu. Yezu kusalaka inki? Yandi “nganinaka mupepe ti masa nde: ‘Bika makelele! Vanda pima!’ Mupepe manaka, ndambu yonso yina kumaka nie.” Balongoki na yandi yitukaka mpi kuyulaka nde: “Muntu yai, nki mutindu yandi kele? Ata mupepe ti masa mpi ke wila yandi!”​—Marko 4:37-41.

Yehowa kuzangulaka Yezu mpi kupesaka yandi kiyeka mpi ngolo ya kuluta nene. Sambu yandi kele Ntotila ya Kimfumu ya Nzambi, yandi kele ti mukumba mpi makuki ya kusala bansoba yonso yina kele mfunu sambu na kupesa bantu ngemba mpi lutaninu na ntoto.

Kansi mutindu beto mekatuka kumona yo, bantu kele na kisina ya bampasi mpi bisumbula mingi yina kesalamaka. Mambu yai kekuma dyaka mbi kuluta sambu bantu kesadila ntoto na mutindu ya mbi mpi ya bwimi. Inki Kimfumu ya Nzambi tasala bantu yina kekwamina na kusala mambu ya mutindu yai mpi kebuya kusoba? Biblia ketuba nde: “Mfumu Yezu ta katuka na zulu sambu na kwisa kumonika ti bawanzio na yandi ya ngolo, na kati ya tiya yina ke pela ngolo, sambu na kupesa ndola na bantu yina kuzaba Nzambi ve, bayina ke zola kulanda ve Nsangu ya Mbote ya Mfumu na beto Yesu.” Ya kyeleka, yandi ‘tafwa bantu yina ke bebisaka nsi-ntoto!’​—2 Tesalonika 1:7, 8; Kusonga 11:18.

Na nima, Yezu Kristu “Ntotila ya bantotila,” tayala mpenza bima yonso ya lugangu. (Kusonga 19:16) Yandi tasala mambu na mpila nde bantu yina Kimfumu ya Nzambi tayala kunyokwama dyaka ve. Nzambi tasadila ngolo na yandi sambu na kuyidika mambu na mpila nde mwini kuvanda ngolo ve to madidi kuvanda mingi ve mpi mutindu bansungi kesobaka kusalama mbote sambu na kunatila bantu mambote. Mambu yai ya Yehowa Nzambi mesilaka bantu na yandi tuka ntama talungana: “Mono ta nokisa mvula sambu bima na beno ya bilanga kumena ti banti kubuta bambuma.” (Levi 26:4) Bantu tatunga banzo kukonda kuwa boma nde bisumbula tabebisa yo, sambu: “Bo ta tunga banzo, bo ta zinga muna; bo ta kuna bilanga ya vinu, bo ta dia bambuma na yo.”​—Yezaya 65:21.

Inki Nge Fwete Sala?

Ntembe kele ve nde, nge mpi bantu mingi yankaka kesepelaka na dibanza ya kuzinga na nsi-ntoto yina bisumbula tavanda dyaka ve. Kansi, inki nge fwete sala sambu na kuvanda na nsi-ntoto yina? Sambu bantu yina “kuzaba Nzambi ve, bayina ke zola kulanda ve Nsangu ya Mbote” tazinga ve na nsi-ntoto yina kekwisa, yina bisumbula tavanda dyaka ve. Yo kele pwelele nde konso muntu fwete longuka mambu ya metala Nzambi mpi kupesa maboko na ngidika yina yandi mebakaka sambu na kuyala ntoto. Nzambi kezolaka nde beto zaba yandi mpi kulemfuka na nsangu ya mbote ya kimfumu yina yandi mepesaka na nzila ya Mwana na yandi.

Kulonguka Biblia na dikebi yonso kele mutindu ya kuluta mbote ya kuzaba kusala mambu yai. Biblia kele ti bantuma yina tapesa nzila na kuzinga na lutaninu na nsi-ntoto yina Kimfumu ya Nzambi tayala. Sambu na nki ve kulomba Bambangi ya Yehowa na kusadisa nge na kulonguka mambu yina Biblia kelongaka? Bo kele ya kuyilama sambu na kusadisa nge. Dyambu ya kyeleka kele nde, kana nge sala bikesa sambu na kuzaba Nzambi mpi kulemfuka na nsangu ya mbote bangogo yai ya Bingana 1:33 talungana sambu na nge: “Kansi muntu yina kewilaka mono, yandi ta vanda mbote, yandi ta zinga na ngemba, boma ve.”