Keti Nge Zabaka Yo?

Sambu na nki bantu yina vandaka kushanze mbongo vandaka na tempelo ya Yeruzalemi?

▪ Ntangu fyoti na ntwala ya lufwa ya Yezu, yandi tubilaka dyambu mosi ya kukonda lunungu ya vandaka kusalama na tempelo. Biblia ketuba nde: “Yesu . . . kulaka bantu yina yonso vandaka kuteka bima ti bantu yina vandaka kusumba bima muna. Yandi losa-losaka bamesa ya bantu yina vandaka kushanze mbongo, ti bakiti ya bayina vandaka kuteka bapizio. Yandi tubilaka bo nde: ‘Bo sonikaka na mukanda ya Nzambi nde: “Nzo na mono ta vanda nzo ya bisambu.” Kansi beno ke kumisa yo nzo ya bamiyibi!’”​—Matayo 21:12, 13.

Bayuda ya mvu-nkama ya ntete mpi baprozelite ya Bayuda vandaka kukatuka na babwala mpi bambanza mingi sambu na kukwenda na Yeruzalemi mpi bo vandaka kukwenda ti mbongo ya babwala na bo. Kansi, yo vandaka kulomba nde bo sadila mbongo yina bantu vandaka kusadila na Yeruzalemi sambu na kufuta mpaku ya tempelo yina bo vandaka kufuta mbala mosi na mvula, kusumba bambisi ya kupesa bimenga mpi sambu na makabu yankaka. Yo yina, bantu yina vandaka kushanze mbongo lendaka kushanze mbongo ya bantu yina vandaka kukwisa mpi kupesa bo mbongo yina bo vandaka na yo mfunu. Ntangu bankinsi ya Bayuda vandaka kufinama, bantu yina vandaka kushanze mbongo vandaka kutula bamesa na bo na tempelo na Kibansala ya Mimpani.

Ntangu Yezu kutubaka nde, bantu yina vandaka kushanze mbongo kukumisaka tempelo “nzo ya bamiyibi,” yo kemonisa nde ntalu yina bo vandaka kulomba bantu sambu na kisalu na bo vandaka mingi.