Kwenda Penepene na Nzambi

MPANGI Mukristu mosi ya nkento yina kunyokwama mingi na mabanza na luzingu na yandi kutubaka nde: ‘Yehowa lendaka kuzola mono ve ata fyoti.’ Yandi monaka nde, Yehowa vandaka ntama ti yandi. Keti Yehowa kevandaka mpenza ntama sambu na bansambidi na yandi yina kenyokwama na mabanza? Mvutu ya kepesa kikesa kele na bangogo ya muyimbi-bankunga, Davidi yina kele na Nkunga 34:19.

Davidi kuzabaka mutindu kunyokwama na mabanza lenda vanda na bupusi na luzingu ya nsambidi mosi ya kwikama ya Yehowa. Ntangu yandi vandaka leke, Davidi vandaka kuzinga ya kubumbana sambu na kutina Saule, ntotila ya zwa yina vandaka kusosa kufwa yandi. Davidi kutinaka kisika yina yandi yindulaka nde Saule lendaka ve kumona yandi​—na Gati, insi ya bambeni na yandi na teritware ya bantu ya Filistia. Kansi ntangu bo zabaka yandi, Davidi kugulukaka na kudimonisaka bonso muntu ya kilau. Davidi kupesaka Nzambi lukumu sambu yandi gulusaka yandi, mpi sambu na dyambu yango, yandi sonikaka Nkunga 34.

Keti Davidi kukwikilaka nde Nzambi kuvandaka ntama na bantu yina kenyokwama mpi ya kemona nde bo mefwana ve sambu Nzambi kutudila bo dikebi? Davidi kusonikaka nde: “Mfumu Nzambi kele penepene na bantu yina ke na kikesa ve, yandi ke gulusaka bantu yonso yina me katulaka ntima.” (verse 19) Bika beto tadila mutindu bangogo yai kepesa kikesa mpi kivuvu.

“Mfumu Nzambi kele penepene.” Mukanda mosi ketuba nde nsa yai kele “ntubilu mosi ya kemonisa nde Mfumu ketudilaka bantu na yandi dikebi mpi kelangidilaka bo, yandi kevandaka ntangu yonso ya kuyilama sambu na kusadisa mpi kugulusa bo.” Yo kelembika ntima na kuzaba nde Yehowa kelangidilaka bantu na yandi. Yandi kemonaka mambu yina bo kekutanaka ti yo na bantangu ya “mpasi” mpi yandi kezabaka mawi na bo.​—2 Timoteo 3:1; Bisalu 17:27.

‘Bantu yina mekonda kikesa.’ Na binkulu yankaka, muntu ya ‘kukonda kikesa’ to ya kenyokwama na ntima kele muntu yina kezola muntu kansi muntu yango kezola yandi ve. Kansi, muntu mosi ya mayele kutubaka nde, bangogo ya muyimbi-bankunga kemonisa “mawa mpi mpasi ya mingi.” Ee, bantangu yankaka ata bansambidi ya kwikama ya Nzambi lenda kutana ti bampasi yina lenda lembisa ntima na bo mpi kumanisa bo kikesa.

Bantu yina kenyokwama na mabanza. Bantu yina melembaka nitu lenda kudimona bonso nde bo kele na mfunu ve mpi bo kele dyaka ve ti kivuvu. Mukanda mosi sambu na bambaludi ya Biblia ketubaka nde, bo lenda balula bangogo yai nde, “bantu yina kele ve ti kima ya mbote yina bo lenda tudila kivuvu.”

Inki mutindu Yehowa kepesaka mvutu na bantu yina ‘mekonda kikesa’ mpi bayina kenyokwama na mabanza? Keti yandi kevandaka ntama ti bo, na kumonaka nde bo mefwana ve nde yandi monisila bo zola mpi dikebi na yandi? Ve! Bonso kibuti mosi ya zola yina kesimbaka mpi kepesaka kikesa na mwana yina kenyokwama, Yehowa kele penepene ya bansambidi yina kebokilaka yandi na kusadisa bo. Yandi kele ti mpusa ya ngolo ya kupesa bo kikesa mpi kulembika ntima mpi mabanza na bo ya kenyokwama. Yandi lenda pesa bo mayele mpi ngolo ya mefwana sambu na kununga bampasi yonso yina bo lenda kutana ti yo.​—2 Korinto 4:7; Yakobo 1:5.

Sambu na nki ve kusosa kuzaba mutindu yina nge lenda kwenda penepene ya Yehowa? Nzambi yai ya mawa kesila nde: “Mono kele mpi ti muntu yina ke monaka mawa na ntima, ke kudikulumusaka, sambu na kupesa yandi diaka kikesa ti ngolo.”​—Yezaya 57:15.