Batangi na Beto Keyula . . .

Keti Luzingu na Paladisu Talembisa Beto?

▪ Biblia kepesaka beto kivuvu nde, beto lenda zinga kimakulu na Paladisu awa na ntoto. (Nkunga 37:29; Luka 23:43) Keti kuzinga kukonda nsuka na nsi-ntoto mosi ya kukuka talembisa beto?

Yai kele ngyufula mosi ya mfunu. Bantu yina kesalaka bansosa memonisaka nde, kana muntu ketula ve mabanza na yandi kisika mosi na nsungi mosi ya nda, yandi lenda wa makasi, kulemba nitu, to kubwa na bigonsa kukonda kusukinina. Bantu yina kevandaka ve ti lukanu na luzingu na bo to bayina kelembaka sambu na bisalu yina bo kesalaka konso kilumbu, lenda lemba nitu. Keti luzingu ya bantu yina tavanda na paladisu takonda lukanu? Keti bisalu yina bo tasalaka konso kilumbu talembisa bo?

Ntete-ntete, zaba nde Yehowa Nzambi, yina kele Munkwa ya Biblia, muntu kepesa dikabu ya luzingu ya mvula na mvula. (Yoane 3:16; 2 Timoteo 3:16) Zola kele kikalulu ya ntete ya Nzambi. (1 Yoane 4:8) Yehowa kezolaka beto mingi mpenza, mpi yandi mepesaka beto bima yonso ya mbote yina beto kele na yo ntangu yai.​—Yakobo 1:17.

Ngangi na beto kezabaka nde, sambu na kuvanda na kyese, beto fwete vanda ti kisalu mosi yina kele ti lukanu. (Nkunga 139:14-16; Longi 3:12) Na paladisu, bantu yina tasalaka bisalu tavanda ti luzingu mosi ya kele ti lukanu mpi ya kesepedisa. Kisalu yina bo tasala tavanda sambu na mambote na bo mpi ya bantu yina bo kezolaka. (Yezaya 65:22-24) Kana nge kele ti kisalu mosi ya mbote yina nge kesalaka, ya ngolo mpi ya nge kesalaka ntangu yonso, keti nge tamona nde luzingu kelembisa nge?

Zaba mpi nde, Yehowa Nzambi tapesa ve dikabu ya kuzinga na paladisu na muntu yonso. Yandi kepesa dikabu ya luzingu ya mvula na mvula kaka na bantu yina kelandaka mbandu ya Mwana na yandi, Yezu. (Yoane 17:3) Ntangu yandi vandaka na ntoto, Yezu vandaka na kyese ya kusala luzolo ya Tata na yandi. Yandi longaka balongoki na yandi na bangogo mpi na bisalu na yandi nde, kyese ya mingi kekatukaka na kupesa kansi na kubaka ve. (Bisalu 20:35) Na paladisu yina tavutulama, bantu yonso tazinga na kulandaka bansiku yai zole​—zola sambu na Nzambi mpi zola sambu na bamfinangani. (Matayo 22:36-40) Yindula mutindu nge tazinga ti bantu yina mekonda bwimi, ya kezolaka nge mpi kisalu na bo! Keti nge keyindula nde, nge talemba na kuzinga ti bantu ya mutindu yai?

Dyaka, luzingu na paladisu tavanda nki mutindu? Konso kilumbu, beto tavanda ti makuki ya kulonguka mambu ya mpa ya metala Ngangi na beto. Bantu ya kesalaka bansosa mesengumunaka bima mingi yina Yehowa megangaka. (Roma 1:20) Kansi, tii bubu yai beto kezabaka kaka bima fyoti na kati ya bima yina Nzambi megangaka. Bamvula mingi meluta, Yobi muntu ya kwikama kutadilaka bima yina Nzambi megangaka, mpi mambu yina yandi tubaka kele kaka ya kyeleka. Yandi tubaka nde: “Mambu yai yonso ke songa kaka nki mutindu ngolo [ya Nzambi] kele, beto ke wa kaka nsangu mpamba. Ebuna nani ta kuka kuzaba mpenza-mpenza bisalu na yandi?”​—Yobi 26:14.

Ata kana beto zinga bamvula ikwa, beto tasengumuna ve ata fyoti mambu yonso ya metala Yehowa Nzambi mpi bisalu na yandi. Biblia kemonisaka nde Nzambi metulaka mpusa ya kuzinga mvula na mvula na ntima na beto. Kansi, yo ketubaka dyaka nde, beto ‘tazaba ve mambu yina Nzambi mesalaka’ banda na luyantiku tii na nsuka. (Longi 3:10, 11) Keti nge keyindula nde, nge talemba nitu sambu na kulonguka mambu ya mpa na yina metala Ngangi na nge?

Ata bubu yai, bantu yina kesalaka mambu mingi sambu na mambote ya bankaka mpi kepesaka Nzambi lukumu kelembaka ve nitu. Beto lenda ndima nde kana beto kesala mambu mingi ya kiteso mosi, beto talemba ve, ata kana beto zinga mvula na mvula.

[Bangogo ya kemonisa kisina ya foto ya kele na lutiti 14]

Earth: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/​STScI/​NASA)