“Nsangu yai ya mbote . . .”​—MATAYO 24:14.

BAKRISTU fwete samuna ‘nsangu ya mbote ya Kimfumu’ na kuzabisaka bankaka mambu ya metala yo, mpi na kutendulaka nde Kimfumu ya Nzambi kele luyalu ya ntoto yina tayala nsi-ntoto na lunungu yonso. Kansi, Biblia kesadilaka mpi bangogo ‘nsangu ya mbote’ na mitindu yankaka. Mu mbandu, Biblia ketubilaka ‘nsangu ya mbote ya kegulusaka’ (Nkunga 96:2); “nsangu ya mbote ya Nzambi” (Roma 15:16); mpi “nsangu ya mbote ya Yesu Kristo.”​—Marko 1:1.

Na bunkufi, nsangu ya mbote ketadilaka bakyeleka yonso yina Yezu kutubaka mpi yina balongoki na yandi kusonikaka. Na ntwala ya kumata na zulu, Yezu kuzabisaka balongoki na yandi nde: “Yo yina, beno kwenda kukumisa bantu yonso balonguki na mono: Beno botika bo na zina ya Tata ti ya Mwana ti ya mpeve-santu, beno longa bo mpi na kulanda mambu yonso ya mono vandaka kusonga beno na kusala.” (Matayo 28:19, 20) Yo yina, kisalu ya Bakristu ya kyeleka kele ve kaka ya kuzabisa bankaka mambu ya metala Kimfumu; bo fwete sala mpi bikesa ya ngolo sambu na kukumisa bantu balongoki.

Inki mutindu mabundu kesalaka mambu na kutadila dyambu yai? Bantu yina kebakisaka ve kana Kimfumu kele nki​—mpi bo kele mingi—​lenda longa ve bankaka na sikisiki yonso mambu ya metala Kimfumu yango. Kansi, bo kelongaka malongi yina bantu kesepelaka na kuwa, ya ketubilaka ndolula ya masumu mpi kukwikila na Yezu. Dyaka, bo kesosaka kukuma ti bansambidi mingi na kutomisaka luzingu ya bantu to na kutungaka balupitalu, banzo-nkanda, mpi banzo ya bansukami. Ata bikesa ya mutindu yai lenda sala nde bantu kukuma mingi na nzo-Nzambi, bikesa yango kebasisaka ve Bakristu ya kyeleka yina kesosaka mpenza kuzinga na kuwakana ti mambu yina Yezu kulongaka.

Muntu mosi ya kelongukaka teolozi kusonikaka nde: “Na kati ya Bakristu nge tamona bantu fyoti ya mayele to bantwadisi yina kendimaka nde beto fwete kumisa bantu balongoki to bilandi ya Yezu mpi kulonga bo na kusala mambu yonso yina Yezu kutubaka. . . . Nkutu, bantuma ya Yezu na dyambu yai kele pwelele. Beto kesalaka ve mambu yina yandi tubaka. Beto kesalaka ve bikesa sambu na kusala yo. Mpi yo kemonana nde, beto mezaba ve mutindu ya kusala yo.”

Mutindu mosi, nsosa mosi yina kusalamaka na Mabundu ya Katolika na États-Unis kumonisaka nde, bantu 95 na kati ya nkama kundimaka nde kusamuna nsangu ya mbote kele malombo ya lukwikilu na bo. Kansi, bansambidi mingi kemonaka nde, mutindu ya mbote ya kusala yo kevandaka ve na kutubilaka mambu ya metala yo kansi na kutwadisaka luzingu na bo na mutindu yina tavanda mbandu sambu na bankaka. Muntu mosi na kati ya bantu yina bo yulaka bangyufula kutubaka nde: “Kutubila Nsangu ya Mbote kele ve mutindu ya kuluta mbote ya kusamuna yo. Kansi, kupesa mbandu ya mbote kele dyambu ya kuluta mfunu.” Zulunalu ya Dibundu ya Katolika na États-Unis, yina kutubilaka nsosa yango kutubaka nde, bantu mingi kebuyaka kuzabisa bankaka mambu yina bo kekwikilaka sambu na “mambu ya nsoni yina mekatuka kusalama na dibundu ya metala kuvukisa nitu ti bana-fyoti mpi malongi ya mpasi yina dibundu kelongaka.”

Na bisika yankaka, episikopo mosi ya dibundu ya Bametodiste kudiyangisaka nde bantu ya dibundu na yandi kukabwanaka, bo kumaka kisaka-saka, bo vandaka dyaka ve ti kikesa ya kulungisa mukumba na bo mpi bo vandaka dyaka ve ti nkadilu ya mbote. Ti makasi yonso, yandi yulaka nde: “Banani kele ti mukumba ya kusamuna nsangu ya Kimfumu?”

Episikopo yina kupesaka ve mvutu na ngyufula na yandi. Kansi, mvutu kele. Nge tamona yo na disolo yina kelanda.

[Bangogo sambu na kubenda dikebi ya kele na lutiti 6]

Nsangu ya mbote ketadila Kimfumu ya Nzambi mpi luguluku na nsadisa ya lukwikilu na Yezu Kristu