“Nsangu yai ya mbote ya Kimfumu . . .”​—MATAYO 24:14.

NA DISOLO na yandi na Zulu ya Ngumba ya mezabanaka mingi, Yezu kupesaka kisambu ya mbandu, yina kele ti lombilu yai: ‘Bika Kimfumu na nge kukwisa.’ Bantu mingi mekangaka kisambu yai na ntu mpi kevutukilaka yo mbala na mbala. Ansiklopedi mosi ketuba nde, yo kele “kisambu ya ntete yina Bakristu mingi kesalaka ntangu bo kesambaka.” Kansi, bantu mingi yina kevutukilaka yo kezabaka ve ntendula ya Kimfumu ya Nzambi to mambu yina yo tasala ntangu yo takwisa.​—Matayo 6:9, 10.

Dyambu yai keyitukisaka beto ve. Bamfumu ya mabundu ya Kikristu kepesaka bantendula ya kuswaswana, ya kevwalangasaka mabanza, mpi ya mpasi na yina metala Kimfumu ya Nzambi. Nsoniki mosi kusonikaka nde Kimfumu ya Nzambi kele “kima mosi yina tasalama na ngolo ya Nzambi, . . . kima yina kesadisaka muntu na kuvanda na kuwakana ti Nzambi . . . , kima yina kesalaka nde bantu kubaka luguluku.” Muntu yankaka kutendulaka nde evanzile ya Kimfumu kele “malongi ya metala dibundu.” Mpi mukanda ya Malongi ya Mbundana ya Dibundu ya Katolika (Catéchisme de l’Église Catholique) ketuba nde: “Kimfumu ya Nzambi [kele] lunungu, ngemba mpi kyese na kati ya Mpeve Santu.”

Nge tamona ntendula ya pwelele na lutiti ya 2 ya zulunalu yai. Beto ketanga nde: “Kubika fyoti Kimfumu ya Nzambi, yina kele guvernema ya kyeleka na zulu, takatula mambi yonso mpi takitula ntoto paladisu.” Beto tala mutindu Biblia kendima dyambu yina.

Bamfumu Yina Tayala Ntoto ya Mvimba

Kimfumu kele luyalu yina ntotila keyalaka. Yezu Kristu yina kufutumukaka kele Ntotila na Kimfumu ya Nzambi. Nzambi kutubilaka kutulama ya Kimfumu yango na zulu, na mbonameso yina yandi pesaka na profete Daniele, yina kusonikaka nde: “Kaka na ntangu yango yina na mpimpa, mono monaka kima mosi bonso muntu [Yezu]; yandi ke kwisa penepene, matuti me ziunga yandi, ebuna bo ke kwisa kunata yandi na ntwala ya mbuta-muntu yina ya mununu [Yehowa Nzambi]. Ntangu yai yandi bakaka kiyeka, lukumu ti ngolo ya kimfumu na mpila nde bantu yonso ya nsi-ntoto ata bo kele nki dikanda to nki ndinga, bo sadila yandi. Ngolo na yandi ti kimfumu na yandi yo ta mana ve tii kuna, ata muntu mosi ve lenda botula kiyeka na yandi.”​—Daniele 7:13, 14.

Mukanda ya Daniele kemonisaka dyaka nde Nzambi muntu tatula Kimfumu yango, mpi yo tatula nsuka na baluyalu yonso ya bantu, mpi ata luyalu mosi ve tabwisa Kimfumu yango. Kapu ya 2 ketubilaka ndosi mosi yina ntotila ya Babilone kulalaka, yina yandi monaka na ngolo  ya mpeve kiteki ya nene yina vandaka kutendula kulandana ya bimfumu ya bangolo ya nsi-ntoto. Profete Daniele kutendulaka ndosi yina. Yandi sonikaka nde: “[Na kitini ya nsuka ya bilumbu, NW], Nzambi ya zulu ta tula ntotila mosi yina ta yalaka tii kuna; ntotila yina bantotila ya nkaka ta bedisaka yandi ve, kansi yandi ta fwa bantotila yonso ebuna yandi ta yalaka tii kuna.”​—Daniele 2:28, 44.

Ntotila ya Kimfumu ya Nzambi tayala yandi mosi ve. Ntangu yandi vandaka kusala kisalu na yandi na ntoto, Yezu kundimisaka bantumwa na yandi ya kwikama nde bo, kumosi ti bankaka, tafutumuka mpi tamata na zulu mpi tavanda na bakiti ya Kimfumu. (Luka 22:28-30) Yandi vandaka kutubila ve bakiti ya kyeleka, sambu mutindu Yezu kumonisaka yo, Kimfumu tavanda na zulu. Biblia ketubaka nde bantu yina tayala ti Yezu mekatuka ‘na makanda yonso, na bandinga yonso ti na bansi yonso.’ Bo tavanda kimfumu ya ‘banganga-Nzambi sambu na kusadila Nzambi na beto, mpi bo ta yala nsi-ntoto.’​—Kusonga 5:9, 10.

Bikuma Yina Nsangu ya Kimfumu Kele ya Mbote

Zaba nde, Nzambi mepesa Kristu Yezu kiyeka na zulu ya “bantu yonso, makanda yonso mpi bandinga yonso” mpi nde bantu yina tayala ti yandi ‘tayala nsi-ntoto ya mvimba.’ Yo yina, banani tavanda bantu yina Kimfumu yai tayala? Bayina kendima na luzolo yonso nsangu ya mbote yina ke na kulongama bubu yai. Na kati ya bantu yina yandi tayala, beto lenda tanga bantu yina tafutumuka sambu na kuzinga na ntoto mpi bayina tavanda ti kivuvu ya kuzinga mvula na mvula.

Biblia kemonisa pwelele balusakumunu yina bantu tabaka na nsi ya Kimfumu ya Nzambi. Tala mwa ndambu ya balusakumunu yango:

“Yandi ke sukisaka bitumba na nsi-ntoto yonso, yandi ke buka-bukaka babunduki ya tolotolo ti bamakonga, yandi ke tulaka tiya na mabaya ya kuditanina na batolotolo ya bambeni.”​—Nkunga 46:10.

“Bo ta tunga banzo, bo ta zinga muna; bo ta kuna bilanga ya vinu, bo ta dia bambuma na yo. Banzo ya bo ta tunga ti bilanga ya bo ta kuna, yo ta vanda sambu na bo mosi kansi sambu na bantu ya nkaka diaka ve.”​—Yezaya 65:21, 22.

“[Nzambi] ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve. Na ntangu yina mambu ya ntama ta vanda me vila.”​—Kusonga 21:3, 4.

“Meso ya bantu ya kufwa-meso ta mona, makutu ya bantu ya kufwa-makutu ta kanguka. Bantu ya makulu-kifu ta pumbuka bonso mbambi, bababa ta kuma kutuba na ndinga ya ngolo ti kiese.”​—Yezaya 35:5, 6.

“Na ntangu ke kwisa, bantu yonso yina me fwaka kele na maziamu, bo ta wa ndinga [ya Yezu]; ebuna bo ta basika na maziamu na bo. Bantu yina me salaka mbote, bo ta telama sambu na kubaka diaka moyo.”​—Yoane 5:28, 29.

“Bantu yina ke kudikulumusaka, bo ta zinga mbote na ngemba mpenza na ntoto.”​—Nkunga 37:11.

Yai kele mpenza nsangu ya mbote! Dyaka, bambikudulu ya Biblia yina melunganaka kemonisa nde ntangu mefinama sambu Kimfumu ya Nzambi kutula luyalu na yo ya lunungu na nsi-ntoto ya mvimba.