Mambu ya Mbi Tasuka Mpenza!

NZAMBI mepesaka beto Ndinga na yandi ya kupemama, yina kemonisaka bikuma yina bantu kesalaka mambu ya mbi. Yandi mepesaka beto mpi nswa ya kupona ti makuki ya kudiyala, na mpila nde beto pona na kusala ve mambu ya mbi. (Kulonga 30:15, 16, 19) Na kutadila makuki yai, beto lenda bakisa konso bupusi ya mbi yina beto lenda vanda na yo mpi kusala bitambi ya mefwana sambu na kusungika mambu. Nsukansuka, kana beto kebuya kusala mambu ya mbi, yo tanatila beto mpi bantu yina kele na nzyunga na beto mambote.​—Nkunga 1:1.

Kansi, ata bikesa yonso yina beto kemeka kusala sambu na kubuya kusala mambu ya mbi, bantu ya nsi ntoto kelanda na kumona mpasi sambu na mambu ya mbi yina bantu yankaka kesala. Biblia kepesa lukebisu yai: “Nge fweti zaba mambu yai nde: Na bilumbu ya nsuka ta vanda mpasi mingi.” Sambu na  kumonisa mambu yina kesala nde bilumbu kuvanda “mpasi mingi,” Biblia kelanda na kutuba nde: “Bantu ta zolaka bantu ya nkaka ve, bo ta zolaka kaka mbongo; bo ta kuditulaka, bo ta vandaka lulendo mingi; bo ta vwenzaka Nzambi, bo ta tulaka ntu-ngolo na batata ti bamama na bo; bo ta zabaka kupesa mersi ve; bo ta zitisaka mambu ya Nzambi ve; bo ta vandaka nku mingi, bo ta zingaka kaka na kimbeni, bo ta kumaka songi-songi, bo ta waka makasi nswalu, bo ta zolaka kusala bantu ya nkaka mpasi, bo ta zolaka ve mambu ya mbote; bo ta zolaka kuteka bantu ya nkaka; bo ta vandaka na kifu ya kusala mambu kukonda kuyindula ntete; ntima na bo ta vanda me fuluka na lulendo mingi; bo ta zolaka kiese ya nsi-ntoto, kansi Nzambi ve; bo ta songaka na meso ya bantu nde bo kele na kinzambi, kisi na ntima na bo, bo ke buyaka ngolo ya kieleka ya kinzambi. Kuvanda kimvuka mosi ve ti bantu ya mutindu yina!”​—2 Timoteo 3:1-5.

Ziku nge memona bangogo “bilumbu ya nsuka” na mbikudulu yai ya kele na zulu. Yo ketendula inki sambu na nge? Mutindu bantu mingi kebakisaka yo, kutuba “bilumbu ya nsuka” kepesa ngindu nde kima mosi kekwenda na nsuka. Yo lenda vanda inki? Tala mambu yina Nzambi kesila na Ndinga na yandi.

Nzambi takatula bantu ya mbi kimakulu.

“Kubika fioti kaka bantu ya mbi ta vila, nge lenda sosa bo kansi nge ta mona bo ve; kansi bantu yina ke kudikulumusaka, bo ta zinga mbote na ngemba mpenza na ntoto.” ​—NKUNGA 37:10, 11.

“Yandi ke taninaka bantu yonso yina ke lemfukaka na yandi, kansi yandi ta fwa bantu yonso ya mbi.”​—NKUNGA 145:20.

Bantu tamonisa dyaka ve bantu yankaka mpasi.

“Yandi ta sadisaka bantu ya mawa yina ke didila yandi ti bantu ya kukonda muntu ya kusadisa bo. Yandi ta gulusaka bo na maboko ya bantu ya nku, na yandi luzingu na bo kele mfunu mingi.”​—NKUNGA 72:12, 14.

“Kilumbu mosi Nzambi ta katula bima yina yonso na kimpika yina ke nataka lufwa, ebuna yo ta baka dipanda ya lukumu yina ya bana ya Nzambi ta baka.”​—ROMA 8:21.

Nzambi talungisa bampusa ya kinsuni ya bantu.

“Konso muntu ta zinga na ngemba na bilanga na yandi ya vinu ti ya bafige; ata muntu mosi ve ta kwisa kupesa yandi boma.” ​—MISHE 4:4.

“Bo ta tunga banzo, bo ta zinga muna; bo ta kuna bilanga ya vinu, bo ta dia bambuma na yo. Banzo ya bo ta tunga ti bilanga ya bo ta kuna, yo ta vanda sambu na bo mosi kansi sambu na bantu ya nkaka diaka ve. Bantu na mono ta zinga mingi bonso banti ke zingaka mingi, ebuna bo ta mona kiese na bisalu ya maboko na bo.”​—YEZAYA 65:21, 22.

Lunungu tavanda.

“Keti Nzambi ta sadisa ve bantu yina ya yandi solaka, bayina ke bingaka yandi mpimpa ti mwini sambu yandi sadisa bo? . . . Mono ke tubila beno nde yandi ta sadisa bo nswalu.” ​—LUKA 18:7, 8.

“Mfumu Nzambi ke zolaka mambu ya kieleka, yandi ke vilaka mpi ve bantu yina ke lemfukaka na yandi. Yandi ke kebaka bo ntangu yonso.”​—NKUNGA 37:28.

Mambu ya mbote tayinga bwimi.

“Bantu ya nsi-ntoto, bo ke zaba nki yai masonga.”​—YEZAYA 26:9.

“Beto ke vingila nde Nzambi kubasisa zulu ya mpa ti ntoto ya mpa, yina ya yandi silaka beto; kuna bantu yonso ta lemfuka kaka na Nzambi konso ntangu.”​—2 PIERE 3:13.

 Bantu Kesala Bansoba​—Ata Bubu Yai

Kukonda ntembe, balusilu ya mutindu yai kepesa beto yonso kyese. Kansi, inki kendimisa nde yo talungana mpenza? Ya kyeleka, bubu yai beto kele ti banzikisa ya kemonisa nde balusilu ya Nzambi talungana. Inki kele banzikisa yango? Yo kele nde bamilio ya bantu na nsi-ntoto ya mvimba bubu yai menungaka dezia na kuyambula bikalulu na bo ya bwimi, ya mansoni, to ya nku, mpi bo melongukaka na kuvanda masonga, kuzinga na ngemba ti bankaka, mpi na kuvanda bantu ya mbote. Bubu yai, Bambangi ya Yehowa, ya meluta bamilio nsambwadi, kele dibuta ya ntoto ya mvimba ya bampangi yina menungaka bikalulu yina kekabulaka bantu ya metala kimbeni sambu na bantu ya mpusu ya nitu, ya dikanda ti ya nsi yankaka, mpi ya mambu ya metala politiki ti ekonomi, yina menataka mpenza kimbeni, nku, mpi metyamunaka menga na nsungi yonso ya disolo ya luzingu ya bantu. * Mutindu bansoba yai kesalama bubu yai kepesa kikuma ya ngolo ya kukwikila nde balusilu ya Nzambi talungana na kiteso mosi ya nene.

Kansi, inki kenataka bansoba ya mutindu yai? Beto kebaka mvutu na lusilu yankaka ya Biblia, yina profete Yezaya kusonikaka. Yandi sonikaka nde:

“Bantambu ta vandaka na ngemba ti bana-mameme, bankoi ta pemaka kisika mosi ti bana-bankombo; bana-bangombe ti bana-bantambu ta zingaka kisika mosi, mwana ya fioti ta nataka bo. . . . Bantambu ta diaka matiti bonso bangombe. Mwana ya fioti ta sakana penepene na nioka ya makasi; yandi ta tula diboko na yandi na dibulu na yo, yo ta sala yandi kima ve. Na Sioni, ngumba ya Nzambi, ata kima ya mpasi to ya mbi ta vandaka ve; ntoto ta fulukaka na mambu yai: kuzaba Mfumu Nzambi, mutindu nzadi-mungwa ke fulukaka na masa.”​—Yezaya 11:6-9.

Keti mbikudulu yai ketubila kaka ntangu yina bambisi ti bantu tazinga na ngemba? Ve,  yo ketubila mambu mingi kuluta. Simba nde kitini ya nsuka ya verse yai kemonisa mambu yina kele na kisina ya nsoba yina: “Ntoto ta fulukaka na mambu yai: kuzaba Mfumu Nzambi.” Keti kuzaba Nzambi kesobaka nkadilu ya bambisi? Ata fyoti ve. Kansi, yo lenda soba bantu, mpi yo kesobaka bo mpenza! Mbikudulu yai kutubaka na ntwala nde bayina kuvandaka mbala yankaka ti bikalulu bonso ya bambisi zolaka kuyambula yo mpi kuyedisa kimuntu bonso ya Kristu sambu bo talonguka mpi tasadila mambu yina Biblia kelongaka.

Beto baka mbandu ya Pedro. * Ntangu yandi kotaka na kimvuka mosi ya bateroriste, yandi vandaka kukwikila nde yandi vandaka kunwanina lunungu. Na nima ya kubaka formasio, bo pesaka yandi ntuma ya kukwenda kulosa bombi na kazerne mosi ya bapolisie. Ntangu yandi vandaka kuyilama na kusala yo, bo kangaka yandi. Pedro kulutisaka bangonda 18 na boloko, kisika yandi landaka na kusala mambu na yandi. Na ntangu yina, nkento ya Pedro yantikaka kulonguka Biblia ti Bambangi ya Yehowa. Ntangu yandi basikaka na boloko, Pedro mpi yantikaka kulonguka Biblia, mpi mambu yina yandi longukaka na yina metala Yehowa Nzambi kupusaka yandi na kusala bansoba ya nene na nkadilu na yandi mpi na mutindu na yandi ya kutadila luzingu. Pedro ketuba nde: “Mu kepesa Yehowa matondo mingi na mutindu mu fwaka ve ata muntu mosi na nsungi ya bamvula yina mu vandaka teroriste. Ntangu yai, mu kesadila mbele ya mpeve ya Nzambi, Biblia, sambu na kupesa bantu nsangu ya ngemba  ti lunungu ya kyeleka​—nsangu ya mbote ya Kimfumu ya Nzambi.” Nkutu, Pedro kwendaka kutala kazerne yina yandi kanaka na kupanza sambu na kuzabisa nsangu na yandi ya ngemba mpi ya nsi-ntoto yina nku tavanda ve.

Bupusi ya ngolo yina Ndinga ya Nzambi lenda vanda na yo na zulu ya bantu kepesa beto dyaka bikuma mingi ya kukwikila na lusilu ya Nzambi nde mambu yonso ya mbi tasuka mpenza. Ee, bantu tasala ve mambu ya mbi kimakulu kansi bo tasoba mpi takuma bantu ya mbote. Ntama mingi ve, Yehowa takatula muntu yina kele na kisina ya mambu ya mbi, Satana Dyabulu, yina ketambwisa mambu ya nsi-ntoto. Biblia ketuba nde: “Nsi-ntoto kele na maboko ya Muntu ya Mbi.” (1 Yoane 5:19) Kansi, kubika fyoti yandi tavanda dyaka ve. Bantu yina kebuyaka na ntu-ngolo yonso na kuyambula banzila na bo ya mbi tavanda mpi dyaka ve. Yo tavanda dyambu mosi ya kyese kibeni na kuzinga na ntangu yina!

Inki mambu muntu fwete sala sambu na kubaka mambote ya mutindu yai na bilumbu kekwisa? Yibuka nde “kuzaba Mfumu Nzambi” kele dyambu yina kesobaka bantu bubu yai mpi yina tanata nsoba na nsi-ntoto ya mvimba na bilumbu kekwisa. Kana nge baka nzayilu ya sikisiki ya Biblia mpi kusadila yo, mutindu Pedro kusalaka, nge mpi lenda vingila ti mpusa ya ngolo na kuzinga na nsi-ntoto yina “bantu yonso ta lemfuka kaka na Nzambi konso ntangu.” (2 Piere 3:13) Yo yina, beto kelongisila nge na kusadila dibaku yina beto kele na yo ntete ya kubaka nzayilu ya Nzambi mpi ya Yezu Kristu, sambu yo lenda tendula luzingu ya mvula na mvula sambu na nge.​—Yoane 17:3.

[Banoti na Nsi ya lutiti]

[Bangogo sambu na kubenda dikebi ya kele na lutiti 9]

Nge mpi lenda vingila ti mpusa ya ngolo na kuzinga na nsi-ntoto yina “bantu yonso ta lemfuka kaka na Nzambi konso ntangu.”

​—2 PIERE 3:13