Mambu Yina Yezu Kulongaka na Yina Metala Nzambi

“Ata muntu mosi ve kuzaba kana Tata kele nani, kansi Mwana mpamba muntu kuzaba ti bantu yina ya Mwana zola nde bo zaba kana Tata kele nani.”​—LUKA 10:22.

NA LUZINGU na yandi na ntwala ya kukwisa na ntoto, Mwana ya ntete ya Nzambi kulutisaka bamvula mingi kibeni ti Tata na yandi. (Kolosai 1:15) Yo yina, Mwana kuzabaka mabanza, mawi, mpi banzila ya Tata na yandi. Na nima, ntangu Mwana yai kwisaka na ntoto bonso muntu, yandi vandaka ti mpusa ya ngolo ya kulonga kyeleka ya metala Tata na yandi. Beto lenda longuka mambu mingi na yina metala Nzambi kana beto kewidikila mambu yina Mwana yai kutubaka.

Zina ya Nzambi Zina ya Nzambi, Yehowa, kuvandaka na mfunu mingi sambu na Yezu. Mwana yai ya zola kuzolaka nde bantu yankaka kuzaba mpi kusadila zina ya Tata na yandi. Zina ya Yezu ketendula nde “Yehowa Kele Luguluku.” Na mpimpa yina kuyitaka lufwa na yandi, Yezu lendaka kutuba na kisambu na Yehowa nde: “Mono longaka bo na kuzaba [zina na, NW] nge.” (Yoane 17:26) Yo keyitukisa ve na kumona nde Yezu kusadilaka zina ya Nzambi mpi kuzabisaka yo na bantu yankaka. Nkutu, inki mutindu bawi ya Yezu lendaka kubakisa kyeleka ya metala Yehowa kukonda kuzaba zina na yandi mpi ntendula na yo? *

Zola ya nene ya Nzambi Kilumbu mosi Yezu kuzabisaka Nzambi na kisambu nde: “Tata, . . . nge vandaka kuzola mono ntangu ntoto vandaka me salama ntete ve.” (Yoane 17:24) Sambu Yezu kumonaka zola ya Nzambi na zulu, ntangu yandi vandaka na ntoto yandi sosaka na kumonisa zola yina na bitini na yo mingi ya kitoko.

Yezu kumonisaka nde zola ya Yehowa kele sambu na bantu yonso. Yandi tubaka nde: “Nzambi me lutaka kuzola bantu yonso; yo yina yandi pesaka bo mwana mosi yina kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda na moyo ya mvula na mvula.” (Yoane 3:16) Zola ya Nzambi sambu na bantu kele nene mpenza yo yina yandi pesaka Mwana na yandi ya mfunu mingi na mpila nde bantu ya kwikama kukatuka na kimpika ya masumu mpi ya lufwa mpi kuvanda ti kivuvu ya luzingu ya mvula na mvula. Beto lenda yantika ve kutesa bunene to mudindu ya zola ya nene ya mutindu yai.​—Roma 8:38, 39.

Yezu kutubaka kyeleka mosi ya kebwisa mpenza ntima: Yehowa kezolaka mingi konso nsambidi na yandi. Yandi longaka nde Yehowa kele bonso ngungudi mpi nde sambu na yandi konso dimeme na yandi kele ya kuswaswana mpi mfunu mingi. (Matayo 18:12-14) Yezu kutubaka nde ata ndeke mosi ve ya fyoti lenda bwa na ntoto kukonda nde Yehowa kuzaba. Yandi yikaka nde: “Ata nsuki na beno ya ntu, Nzambi me tangaka yo yonso.” (Matayo 10:29-31) Kana Yehowa kele ti makuki ya kumona nde ndeke mosi ya fyoti kekonda na buyambu mosi buna, ntembe kele ve nde yandi kemonaka mpenza konso muntu yina kesambilaka yandi mpi kekudibanzaka sambu na bo. Kana Yehowa lenda tanga mpi kumona konso nsuki ya ntu na beto, keti kele ti kima ya metala luzingu na beto​—bampusa na beto, mambu ya beto kenwanaka na yo, mpi basusi na beto—​yina yandi lenda zaba ve?

Tata ya zulu Mutindu beto monaka yo na disolo yina meluta, Yezu kele Mwana mosi kaka ya kubutukaka ya Nzambi. Yo keyitukisa beto ve na kumona nde Mwana yai ya zola vandaka kubinga Yehowa mpi kutubila yandi bonso “Tata” na yandi. Ya kyeleka, na bangogo ya ntete ya Yezu yina bo mesonikaka, yina yandi tubaka na tempelo  ntangu yandi vandaka kaka ti bamvula 12, yandi bingaka Yehowa “Tata na mono.” (Luka 2:49) Ngogo “Tata” kemonana penepene ya bambala 190 na Baevanzile. Yezu kubingaka Yehowa na mitindu ya kuswaswana nde, “Tata na beno,” “Tata na beto,” mpi “Tata na mono.” (Matayo 5:16; 6:9; 7:21) Na kusadilaka bangogo yai mbala mingi, Yezu kumonisaka nde bantu ya masumu mpi ya kukonda kukuka lenda sala bangwisana ya mbote mpi ya kyeleka ti Yehowa.

Mawa mpi luzolo ya kulolula Yezu kuzabaka nde bantu ya kukonda kukuka kevandaka na mfunu ya mawa ya mingi ya Yehowa. Na kingana na yandi ya mwana ya kuvilaka, Yezu kufwanisaka Yehowa ti tata mosi ya mawa mpi ya kelolulaka yina kukangulaka maboko na yandi sambu na kuyamba dyaka mwana yina kubalulaka ntima. (Luka 15:11-32) Yo yina, bangogo ya Yezu kendimisa beto nde Yehowa ketalaka konso nsoba yina nsumuki lenda sala na ntima na yandi sambu na kuzwa kikuma ya kuwila yandi mawa. Yehowa kevandaka ti mpusa ya ngolo ya kulolula nsumuki yina mebalula ntima. Yezu kutendulaka nde: “Mono ke tubila beno nde mutindu mosi mpi Nzambi ta mona kiese mingi sambu na muntu mosi ya masumu yina me balula ntima. Kiese na yandi yina ta luta kiese yina ya yandi ke monaka sambu na bantu makumi uvwa na uvwa ya mbote yina ke na mfunu ve ya kubalula ntima.” (Luka 15:7) Nani tawa ve mpusa ya kupusana penepene ya Nzambi ya mawa ya mutindu yai?

Muntu ya kewaka bisambu Na zulu, na ntwala ya kukwisa na ntoto, Yezu kumonaka na meso na yandi mosi nde Yehowa ‘kewaka bisambu’ mpi nde yandi kesepelaka na bisambu ya bansambidi na yandi ya kwikama. (Nkunga 65:3) Yo yina, ntangu yandi vandaka kusala kisalu ya kusamuna, Yezu kulongaka bawi na yandi mutindu ya kusamba mpi mambu yina bo fwete lomba na kisambu. Yandi longisilaka bo nde: “Beno tuba ve kima yo yina mosi mbala na mbala.” (NW) Yandi syamisaka bawi na yandi na kusamba sambu luzolo ya Nzambi “kusalama awa na ntoto bonso na zulu.” Beto lenda samba mpi sambu na madya na beto ya konso kilumbu, sambu yandi lolula masumu na beto, mpi sambu na kunwana ti bampukumuna. (Matayo 6:5-13) Yezu kulongaka nde Yehowa kendimaka na zola yonso bisambu yina bansadi na yandi kesalaka, mpi yandi kepesaka mvutu na mambu yina ya bo kelombaka na masonga yonso mpi na lukwikilu.​—Matayo 7:7-11.

Ya kyeleka, Yezu sosaka kulonga kyeleka ya metala Yehowa mpi mutindu ya Nzambi yina yandi kele. Kansi Yezu vandaka ti mpusa ya ngolo ya kuzabisa bantu kima yankaka ya metala Yehowa: nzila yina yandi tasadila sambu na kunata bansoba na nsi-ntoto ya mvimba sambu na kulungisa lukanu na yandi sambu na ntoto yai mpi sambu na bantu yina kele na zulu na yo. Ya kyeleka, kitini yai ya nsangu ya Yezu kuvandaka ntu-dyambu ya kisalu na yandi ya kusamuna.

[Noti na Nsi ya Lutiti]