Mutindu Nge Lenda Bakisa Biblia

1. Lomba Lusadisu ya Munkwa ya Biblia

Ninfa, yina kezingaka na Italie ketuba nde: “Na ntangu mosi buna, mu vandaka kutanga Biblia na ntwala ya kulala. Mu vandaka kusala mpidina sambu mu zabaka nde yo kele Ndinga ya Nzambi, mpi ata mu vandaka ve kusepela na kutanga, mu vandaka kuzola kuzaba mambu yina Nzambi mesonikaka na Biblia. Mu vandaka ti dibanza ya kutanga yo ya mvimba. Na luyantiku, mu monaka yo pete, kansi na nima mu kumaka na bitini yina kuvandaka mpasi, ebuna mu yambulaka kutanga yo.”

KETI nge mekutanaka ti dyambu mosi ya mefwanana ti yina Ninfa kukutanaka na yo? Bantu mingi mekutanaka ti yo. Ata mpidina, mutindu beto tubilaka yo na disolo yina meluta, Munkwa ya Biblia, Yehowa Nzambi, kezola nde nge bakisa Ndinga na yandi. Kansi, inki mutindu nge lenda baka nzayilu ya mutindu yai? Kima ya ntete kele kulomba lusadisu na Munkwa na yo.

Bantu vandaka kumona bantumwa ya Yezu nde bo vandaka “bantu ya mfunu mingi ve mpi nde bo me longukaka ve” sambu bo kotaka ve banzo-nkanda yina balongi mpi bantwadisi ya mabundu ya Bayuda vandaka kusala, sambu na kubaka formasio na mambu ya lusambu. (Bisalu 4:13) Kansi, Yezu kundimisaka bo nde bo lendaka kubakisa Ndinga ya Nzambi. Inki mutindu? Yezu kutendulaka nde: “Muntu yina ta sadisaka beno kele mpeve-santu yina ya Tata Nzambi ta tinda na zina na mono; yandi ta longaka beno mambu yonso.” (Yoane 14:26) Nzambi kusadilaka mpeve santu yai, to ngolo na yandi ya kisalu, sambu na kuganga ntoto ti bigangwa yonso ya kele na luzingu na zulu na yo. (Kuyantika 1:2) Yandi pesaka mpi mpeve yina na bansoniki kiteso ya 40 sambu na kusonika mabanza na yandi na Biblia. (2 Piere 1:20, 21) Mpeve ya Nzambi kesadisaka mpi bantu yina kesosaka kubakisa Biblia.

Inki mutindu nge lenda baka mpeve santu ya Nzambi? Nge fwete lomba yo ti lukwikilu. Nkutu, yo lenda vanda mfunu nde nge lomba yo kukonda kulemba. Yezu kutubaka nde: “Beno landa kaka na kulomba mambu yina ya beno ke na yo mfunu, ebuna Nzambi ta pesa beno yo. . . . Kana beno zaba kupesa makabu ya mbote na bana na beno, zaba nde Tata yina kele na zulu ta pesa mpenza mpeve na yandi na bantu yina ke lombaka yandi mpeve!” (Luka 11:9, 13) Yehowa tapesa na luzolo yonso mpeve santu na bantu yina kelombaka yo na masonga yonso. Ngolo yai ya kisalu lenda sadisa nge na kubakisa ntendula ya mambu ya kupemama ya bo mesonikaka na Biblia tuka bamvula funda mingi. Mpeve ya Nzambi lenda pesa nge mpi mayele ya nge ke na yo mfunu sambu na kusadila nsangu ya ngolo ya Biblia na luzingu na nge.​—Baebreo 4:12; Yakobo 1:5, 6.

Yo yina, konso ntangu ya nge kezola kutanga Biblia, samba Nzambi sambu na kulomba mpeve santu sambu yo sadisa nge na kubakisa Ndinga na yandi.