Keti Nzambi Kekudibanzaka Sambu na Mono?

Bamvutu yina bantu mingi kepesaka:

▪ “Nzambi kele muntu ya mfunu mingi na mpila nde yandi lenda kudiyangisa ve sambu na makambu na munu.”

▪ “Mu keyindula ve nde yandi kekudibanzaka sambu na munu.”

Inki Yezu kutubaka?

▪ “Keti bo ke tekaka ve bandeke tanu ya fioti na tubibende zole ya mbongo? Kansi Nzambi ke vilaka ata ndeke mosi ve. Ata nsuki na beno ya ntu, Nzambi me tangaka yo yonso. Beno kuwa boma ve; ata bandeke kele mingi, kansi beno me luta bo na mfunu!” (Luka 12:6, 7) Ya kyeleka, Yezu kulongaka nde Nzambi kekudibanzaka sambu na beto.

▪ “Beno kumona mpasi ve na kuyulaka nde: ‘Beto ke dia nki? Beto ke nwa nki? Beto ke lwata nki?’ Bamimpani bantu ke sosaka bima yina yonso ntangu yonso. Kansi beno, Tata na beno yina kele na zulu kuzaba nde beno ke na mfunu ya bima yina yonso.” (Matayo 6:31, 32) Yezu vandaka kukwikila nde Nzambi kezabaka bampusa na beto.

BIBLIA ketuba mpenza nde Nzambi kekudibanzaka sambu na beto. (Nkunga 55:23; 1 Piere 5:7) Kana yandi kekudibanzaka sambu na beto, ebuna sambu na nki beto kekutana ti bampasi mingi bubu yai? Kana Nzambi kele zola mpi nkwa-ngolo yonso, sambu na nki yandi kesala ve kima mosi sambu na kumanisa bampasi?

Mvutu na bangyufula yai ketadila dyambu mosi yina bantu mingi mezaba ve, disongidila nde Satana Dyabulu muntu kele mfumu ya nsi-ntoto yai ya mbi. Ntangu Satana kupukumunaka Yezu, yandi songaka Yezu nde yandi tapesa yandi bimfumu yonso ya ntoto, mpi kutubaka nde: “Mono ta pesa nge kiyeka yai yonso ti lukumu ya bimfumu yai; sambu mono me bakaka kiyeka yai, ebuna mono lenda pesa yo na konso muntu yina ya mono zola.”​—Luka 4:5-7.

Nani kutulaka Satana mfumu ya nsi-ntoto? Ntangu bibuti na beto ya ntete, Adami ti Eva, kulemfukilaka Satana mpi kukolamaka na Nzambi, bo ponaka Satana bonso mfumu na bo. Banda kukolama yina, Yehowa Nzambi kukangaka ntima mpi kubikaka ntangu sambu na kumonisa nde luyalu ya Satana menunga ve. Yehowa kepusaka ve bantu na kusadila yandi, kansi yandi mepesaka beto dibaku ya kuvutukila yandi.​—Roma 5:10.

Sambu Nzambi kekudibanzaka sambu na beto, yandi mebakaka bangidika sambu Yezu kugulusa beto na luyalu ya Satana. Kubika fyoti, Yezu ta “fwa Satana yina ke na kiyeka ya lufwa.” (Baebreo 2:14) Na kufwaka Satana mutindu yina, yandi tafwa ‘bisalu ya Satana.’​—1 Yoane 3:8.

Ntoto yai tavutuka paladisu. Na ntangu yina, Nzambi “ta kusula mansanga yonso na meso [ya bantu]. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve. Na ntangu yina mambu ya ntama ta vanda me vila.”​—Kusonga 21:4, 5. a

[Noti na nsi ya lutiti]

[Bangogo sambu na kubenda dikebi ya kele na lutiti 8]

Ntoto yai tavutuka paladisu