Inki Ntangu Kimfumu ya Nzambi Takwisa?
Inki Ntangu Kimfumu ya Nzambi Takwisa?
‘MFUMU, keti nge kevutula diaka kimfumu na bantu ya Israele na ntangu yai?’ (Bisalu 1:6) Bantumwa kuvandaka na mpusa ya kuzaba nki ntangu Yezu zolaka kutula Kimfumu na yandi. Bubu yai, bamvula kiteso ya 2 000 meluta, bantu kele kaka na mpusa ya kuzaba: Inki ntangu Kimfumu ya Nzambi takwisa?
Sambu Kimfumu kuvandaka ntu-dyambu ya kisalu ya kusamuna ya Yezu, nge mpi lenda yindula nde yandi tubilaka dyambu yai. Ee, yandi tubilaka yo! Yandi tubilaka mbala mingi nsungi mosi ya ntangu yina yandi bingaka nde “kuvanda” na yandi. (Matayo 24:37, NW) Kuvanda yina kewakana mpenza ti kutulama ya Kimfumu ya Mesia. Kuvanda yango ketendula inki? Bika beto tadila bakyeleka iya ya Biblia ya metala kuvanda ya Kristu.
1. Kuvanda ya Kristu zolaka kuyantika bamvula mingi na nima ya lufwa na yandi. Yezu kutaka kingana mosi yina yandi kudifwanisaka ti muntu mosi yina “kwendaka na nsi mosi ya ntama sambu bo kwenda kupesa yandi kimfumu.” (Luka 19:12) Inki mutindu mbikudulu yai kulunganaka? Yezu kufwaka mpi kufutumukaka; na nima yandi kwendaka na ‘nsi ya ntama,’ disongidila na zulu. Mutindu yandi tubaka yo na kingana yankaka, kuvutuka na yandi bonso mfumu zolaka kusalama kaka na nima ya “ntangu mingi.”—Matayo 25:19.
Bamvula mingi na nima ya kukwenda ya Yezu na zulu, ntumwa Polo kusonikaka nde: ‘Kristo pesaka kaka makabu mosi sambu na kukatula masumu, makabu yina kele mfunu mvula na mvula; na nima yandi kwendaka kuvanda na diboko ya kitata ya Nzambi. Ntangu yai yandi ke vingila tii kuna Nzambi ta tula bambeni na yandi sambu yandi kuniata bo.’ (Baebreo 10:12, 13) Yo yina, na nima ya kukwenda na zulu, Yezu kuvingilaka bamvula mingi. Kuvingila yina kusukaka ntangu Yehowa Nzambi kutulaka yandi Ntotila ya Kimfumu ya Mesia yina yandi silaka banda ntama. Na ntangu yina, kuvanda ya Kristu kuyantikaka. Keti bantu na ntoto zolaka kumona dyambu yai ya mfunu mingi?
2. Kuvanda ya Yezu zolaka kumonana ve na meso ya bantu. Kuvila ve nde Yezu kutubilaka kidimbu ya kuvanda na yandi. (Matayo 24:3, NW) Kana kuvanda na yandi zolaka kumonana na meso ya bantu, keti bo zolaka kuvanda na mfunu ya kidimbu? Beto baka mbandu: Yindula nde nge kekwenda kutala nzadi. Nge lenda mona bidimbu na nzila ya kesonga nge nzila yina nge fwete landa, kansi kana nge kuma na lweka ya nzadi, nge metelama mpi ketala mutindu masa kenikana, keti nge tasosa kumona kidimbu mosi ya bo mesonika na bisono ya nene nde “Yai Nzadi”? Ve! Ya kyeleka, kidimbu kele ve mfunu sambu nzadi yango kemonana na meso.
Yezu kupesaka kidimbu ya kuvanda na yandi sambu na kusadisa bantu na kubakisa dyambu mosi yina tasalama na zulu, kansi ve sambu na kutubila kima yina bo lenda mona na meso. Yo yina, yandi tubaka nde: “Ke na kima ve ya bantu lenda mona na meso yina ta songa bo nde Kimfumu ya Nzambi ke kwisa.” (Luka 17:20) Ebuna, inki kidimbu bantu zolaka kumona na ntoto sambu na kubakisa nde kuvanda ya Kristu meyantika?
3. Bampasi ya ngolo na ntoto zolaka kumonisa kuvanda ya Yezu. Yezu kutubaka nde bitumba, nzala, kunikana ya ntoto, maladi, mpi mambu ya mbi na ntoto zolaka kumonisa kuvanda na yandi bonso Ntotila na zulu. (Matayo 24:7-12; Luka 21:10, 11) Inki zolaka kunata bampasi yina yonso? Biblia ketendula nde Satana, “mfumu ya nsi-ntoto yai,” kele na makasi mpenza sambu yandi kezaba nde, mutindu kuvanda ya Kristu bonso Ntotila meyantika, ntangu na yandi mebikala fyoti kibeni. (Yoane 12:31; Kusonga 12:9, 12) Banzikisa ya pwelele ya kemonisa kudasuka ya Satana mpi kuvanda ya Kristu kele mingi mpenza na ntangu na beto. Banzikisa yai memonanaka na kiteso mosi yina mesalamaka ntete ve na ntoto ya mvimba, mingimingi banda na mvu 1914, mvula yina bantu ya istware kendimaka nde yo vandaka mvula mosi ya mesobaka mpenza luzingu ya bantu.
Mambu yai yonso lenda monana bonso bansangu ya mbi, kansi yo kele ve bansangu ya mbi. Yo ketendula nde Kimfumu ya Mesia keyala ntangu yai na zulu. Kubika fyoti, guvernema yai tayalumuna luyalu na yo awa na ntoto ya mvimba. Ebuna, inki mutindu bantu tazaba mambu ya metala Kimfumu yango sambu na kundima luyalu na yo mpi kukuma bantu ya guvernema yango?
4. Kisalu ya kusamuna na ntoto ya mvimba kemonisa kuvanda ya Yezu. Yezu kutubaka nde kuvanda na yandi tavanda bonso “na ntangu ya Noa.” a (Matayo 24:37-39, NW) Noa kutungaka kaka ve maswa, kansi yandi vandaka mpi “kulonga malongi ya Nzambi.” (2 Piere 2:5) Yandi vandaka kukebisa bantu nde kubika fyoti Nzambi zolaka kusambisa bo. Yezu kutubaka nde balongoki na yandi na ntoto zolaka kusala kisalu ya mutindu mosi na nsungi ya kuvanda na yandi. Yandi bikulaka nde: “Bo ta longaka nsangu yai ya mbote ya Kimfumu na nsi-ntoto ya mvimba, na mpila nde bantu ya makanda yonso kuwa yo. Ebuna na nima, nsuka ya ntoto ta kwisa.”—Matayo 24:14.
Mutindu beto monaka yo na disolo yina meluta, Kimfumu ya Nzambi tafwa baguvernema yonso ya nsi-ntoto yai. Kisalu ya kusamuna kekebisa bantu nde kubika fyoti guvernema ya zulu talungisa mambu yina, mpi yo kepesa bantu yonso dibaku ya kutina lufwa yina kekwisa mpi na kukuma bantu ya Kimfumu yango. Yo yina, ngyufula ya mfunu kele nde: Inki nge tasala?
Keti Kimfumu ya Nzambi Kele Nsangu ya Mbote Sambu na Nge?
Nsangu yina Yezu kusamunaka kuvandaka nsangu mosi ya kivuvu yina beto lenda fwanisa ve ti kima yankaka. Na nima ya kukolama yina kusalamaka na Edeni bamvula mingi meluta, Yehowa Nzambi kubakaka lukanu ya kusala guvernema mosi yina tasungika mambu mpi tavutula bantu ya kwikama na luzingu yina Nzambi kukanaka sambu na bo banda na luyantiku, disongidila luzingu ya mvula na mvula awa na ntoto. Yo kele kyese kibeni na kuzaba nde guvernema yai ya Nzambi kusilaka banda ntama ke na kuyala ntangu yai na zulu! Yo kele ve kaka ndosi to kima mosi ya bantu keyindulaka kaka na ntu, kansi yo kele kyeleka mpenza!
Ntangu yai, Ntotila yina Nzambi metulaka ke na kuyala na kati ya bambeni na yandi. (Nkunga 110:2) Na nsi-ntoto yai ya mbi mpi ya mezaba ve Nzambi, Mesia ke na kulungisa mpusa ya Tata na yandi ya kusosa bantu yonso yina kezola kuzaba Nzambi mutindu yandi kele mpenza mpi kusamba yandi “na mpeve mpi na kyeleka.” (Yoane 4:24, NW) Kivuvu ya kuzinga mvula na mvula na nsi ya luyalu ya Kimfumu ya Nzambi mepesama na bantu ya mpusu ya nitu yonso, ya bamvula yonso, mpi ya luzingu ya mutindu na mutindu. (Bisalu 10:34, 35) Beto kelongisila nge na kundima dibaku yai ya kitoko ya bo kepesa nge. Longuka mambu ya metala Kimfumu ya Nzambi ntangu yai sambu nge zinga mvula na mvula mpi na kyese na nsi ya luyalu na yo ya lunungu!—1 Yoane 2:17.
[Noti na nsi ya lutiti]
a Mambu ya Yezu kutubaka kesadisa na kusongisa ngindu ya mbi yina bambalula yankaka kepesaka na mutindu bo kebalulaka ngogo “kuvanda.” Bo kebalulaka yo nde “kukwisa” to “kuvutuka,” kansi, bangogo yai yonso kepesaka kaka dibanza ya kima mosi ya kesalama na ntangu mosi ya nkufi. Kansi, Yezu kufwanisaka ve kuvanda na yandi ti Mvula ya Ngolo ya ntangu ya Noa, dyambu mosi ya kusalamaka na ntangu mosi buna. Yandi fwanisaka yo ti “ntangu ya Noa” yina kuvandaka nsungi mosi buna ya ntangu. Bonso na nsungi yina ya ntama, kuvanda ya Kristu zolaka kuvanda nsungi mosi ya ntangu yina bantu zolaka kudipesa mingi na mambu na bo ya konso kilumbu na mpila nde bo zolaka kuzwa ve ntangu ya kutula dikebi na lukebisu yina bo tapesa bo.