1, 2. Inki ke monisa nde Yezu ke vandaka na zola ya mingi sambu na bantu?

MWANA ya ntete ya Nzambi kele kigangwa ya ntete yina monisaka mayele ya mingi ya Yehowa na mutindu ya kukuka. Yezu yina Biblia ke binga mayele, vandaka “kapita ya kisalu” ya Tata na yandi. Beto lenda yindula kiese yina yandi waka ntangu yandi monaka mutindu Tata na yandi “tulaka zulu na kisika na yo” mpi “tulaka bafondasio ya ntoto.” Kansi, ata yandi vandaka kusepela na bima yai ya Nzambi salaka, Mwana ya ntete ya Nzambi ‘vandaka kuzola mingi bana ya bantu.’ (Bing. 8:22-31) Ya kieleka, Yezu ke zolaka bantu mingi banda ntangu yandi vandaka na zulu na ntwala ya kukwisa na ntoto.

² Sambu na kumonisa kibeni nde yandi ke zolaka Tata na yandi mpi “bana ya bantu,” Mwana ya ntete ya Nzambi “yambulaka bima yonso” na luzolo na yandi mosi mpi kumaka muntu. Yandi salaka yo sambu na kupesa “moyo na yandi bonso nkudulu sambu na bantu mingi.” (Bafil. 2:5-8; Mat. 20:28) Yezu ke vandaka na zola ya mingi kibeni sambu na bantu! Ntangu yandi vandaka na ntoto, Nzambi pesaka yandi ngolo ya kusala bimangu yina monisaka nde yandi ke zolaka bantu. Bimangu yina Yezu salaka monisaka mambu ya kitoko yina yandi ta sala na ntoto ya mvimba ntama mingi ve.

3. Inki beto ta tadila na disolo yai?

 ³ Kukwisa ya Yezu na ntoto sadisaka yandi mpi na ‘kuzabisa nsangu ya mbote ya Kimfumu ya Nzambi.’ (Luka 4:43) Yezu zabaka nde Kimfumu yai ta santisa zina ya Tata na yandi mpi ta manisa bampasi yonso ya bantu. Bimangu yina Yezu salaka ntangu yandi vandaka kusala banzietelo sambu na kulonga bantu, ke monisa mpi nde yandi ke kudibanzaka mingi sambu na bantu. Kuzaba mambu yai kele mfunu sambu yo ta sadisa beto na kuvanda ti kivuvu sambu na bilumbu ke kwisa. Bika beto tadila bimangu iya ya Yezu.

4. Tubila mambu yina salamaka ntangu Yezu kutanaka ti muntu mosi ya lepre.

⁴ Yezu kudipesaka mingi na kisalu ya kusamuna, mpi yandi samunaka mingi na Galilea. Na mbanza mosi ya Galilea, yandi kutanaka ti muntu mosi yina vandaka ti lepre, maladi mosi ya mpasi. (Mar. 1:39, 40) Munganga Luka ke tuba sambu na maladi ya muntu yai nde yandi vandaka “ya kufuluka na lepre.” (Luka 5:12) “Ntangu yandi monaka Yezu, yandi bwaka luse na ntoto, bondilaka yandi mpi tubaka nde: ‘Mfumu, kana nge me zola, nge lenda kumisa mono bunkete.’” Ntembe kele ve nde muntu yina zabaka nde, Yezu vandaka ti ngolo ya kubelula bambefo, kansi yandi vandaka kudiyula kana Yezu ta zola kusadila ngolo na yandi yina. Inki Yezu salaka? Inki mutindu Yezu kudiwaka ntangu yandi talaka muntu yai ya vandaka na mpasi ya ngolo? Keti Yezu vandaka bonso Bafarize, yina vandaka kuvweza bantu ya lepre? Kana nge vandaka na kisika ya Yezu, inki nge zolaka kusala?

5. Inki pusaka Yezu na kutuba nde, “Mono me zola” ntangu yandi belulaka muntu ya lepre?

⁵ Yo ke monana nde muntu yai ya lepre vandaka diaka ve ti kikalulu ya kutuba na ndinga ya ngolo nde “Mvindu, mvindu!” mutindu Nsiku ya Moize vandaka kulomba. Kansi, Yezu tudilaka ve diambu yango dikebi. Yandi kudibanzaka mingi-mingi sambu na muntu yina mpi na bampusa na yandi. (Levi 13:43-46, NW) Beto ke zaba ve na siki-siki yonso mambu yina Yezu yindulaka, kansi beto me zaba mambu yina yandi salaka. Mawa pusaka Yezu na kusala diambu mosi yina yitukisaka bantu. Yandi tandulaka diboko, simbaka muntu ya lepre, mpi tubaka na ndinga ya ngolo mpi na zola yonso nde: “Mono me zola. Kuma bunkete.” Ebuna, ‘lepre manaka.’ (Luka 5:13) Ya kieleka, ngolo yina Yehowa me pesaka Kristu kele ve kaka sambu na kusala bimangu, kansi sambu na kumonisa mpi nde yandi ke vandaka na zola ya mingi sambu na bantu.—Luka 5:17.

6. Inki ke yitukisa nge na bimangu yina Yezu salaka, mpi yo ke longa beto nki?

⁶ Ngolo ya Nzambi sadisaka Yezu Kristu na kusala bimangu mingi yina yitukisaka bantu. Yandi belulaka kaka ve bantu ya lepre, kansi yandi belulaka mpi bantu yina vandaka ti bimbefo ya mitindu yonso mpi bampasi ya mutindu na mutindu. Biblia ke tuba nde: “Kibuka yina ya bantu yitukaka na ntangu bo monaka bababa ke tuba, bantu ya makulu-kifu ke tambula, mpi bifwa-meso ke mona.” (Mat. 15:31) Sambu na kusala bimangu yai, Yezu vandaka ve ti mfunu ya kuyingisa kitini mosi ya nitu. Yandi vandaka kibeni kubelula bitini ya nitu yina vandaka ti kimbefo! Yandi vandaka kubelula bantu mbala mosi, nkutu bantangu ya nkaka yandi vandaka kupesa kaka ntuma mpi bambefo yina vandaka ntama vandaka kubeluka. (Yoa. 4:46-54) Bambandu yai ke longa beto nki? Yo ke longa beto nde Yezu, yina kele Ntotila na zulu, kele ve kaka ti ngolo, kansi yandi kele mpi ti luzolo ya kubelula bantu kimakulu. Kulonguka mutindu Yezu vandaka kusadila bantu mambu ke ndimisa beto nde na nsi-ntoto ya mpa, mbikudulu yai ya Biblia ta lungana: “Bansukami ti bantu yina ke na ngolo ve, yandi ta wilaka bo mawa.”  (Nk. 72:13) Ya kieleka, Yezu ta lungisa mpusa na yandi ya kusadisa bantu yonso yina ke niokwama.

7, 8. Inki mutindu Yezu kutanaka ti muntu mosi ya maladi na kiziba ya Betzata?

⁷ Bangonda fioti na nima ya kubelula muntu mosi ya lepre na Galilea, Yezu kwendaka na Yudea sambu na kusamuna mpi kulonga nsangu ya mbote ya Kimfumu ya Nzambi. Ziku, bantu mingi ndimaka nsangu yina yandi longaka, mpi sepelaka na zola ya mingi yina yandi monisilaka bo. Yandi vandaka ti luzolo ya kulonga nsangu ya mbote na bansukami, kusamuna na bampika nde bo ta baka kimpwanza, mpi kupesa kikesa na bantu yina me vidisaka kivuvu.—Yez. 61:1, 2; Luka 4:18-21.

⁸ Na nima, ngonda ya Nisani lungaka. Sambu na kulemfuka na ntuma ya Tata na yandi, Yezu kwendaka na Yeruzalemi sambu na kuta nkinsi ya Paki. Bantu mingi mpi kwendaka sambu na kuta nkinsi yai ya santu. Na ndambu ya nordi ya tempelo vandaka ti kiziba yina bo vandaka kubinga Betzata, kuna yandi kutanaka ti muntu mosi ya maladi.

9, 10. (a) Sambu na nki Yezu kwendaka na kiziba ya Betzata? (b) Inki mambu Yezu salaka na kiziba ya Betzata, mpi yo ke longa beto nki? (Tala kifwanisu yina kele na luyantiku ya disolo.)

⁹ Bantu mingi ya maladi mpi bayina vandaka ti bifu na nitu vandaka kukwenda na Betzata. Sambu na nki? Ntembe kele ve nde, bo vandaka kukwikila nde kana muntu yina ke bela me kota na kiziba ntangu masa ke nikana, yandi ta beluka na mutindu ya kuyituka. Kuna, ziku bantu ya maladi vandaka mawa-mawa, mpi ya kukonda kivuvu. Kansi sambu na nki Yezu, muntu ya kukuka mpi ya kukonda maladi kwendaka na kiziba yina? Mawa pusaka Yezu na kukwenda pene-pene ya muntu mosi yina yantikaka kubela banda ntama na ntwala nde Yezu kubutuka na ntoto.—Tanga Yoane 5:5-9.

¹⁰ Inki vandaka mawi ya muntu yina ya maladi ntangu Yezu yulaka yandi kana yandi ke zola kubeluka? Yandi pesaka mvutu na mbala mosi. Yandi vandaka na mfunu ya kubeluka, kansi yandi vandaka kuzaba ve nki mutindu yandi ta beluka sambu yandi vandaka ve ti muntu yina lenda kotisa yandi na kiziba yina. Yezu zabisaka yandi na kubaka mbeto na yandi mpi kutambula, diambu mosi yina vandaka mpasi sambu na yandi. Muntu yango lemfukaka na ndinga ya Yezu, yandi bakaka mbeto na yandi mpi yantikaka na kutambula. Kimangu yai ya Yezu ke pesa kiese mingi sambu yo ke monisa mambu ya nene yina yandi ta sala na ntoto ya mpa! Kimangu yai ke monisa mpi nde Yezu ke wilaka bantu mawa. Yandi vandaka kukwenda kusosa bantu yina vandaka na mfunu ya lusadisu. Mbandu ya Yezu fwete pusa beto na kulanda kusosa bantu yina ke kudiyangisa mingi sambu na mambu yina ke salama na nsi-ntoto yai ya mbi.

11. Inki mutindu Marko 5:25-34 ke monisa mawa yina Yezu ke monisilaka bantu yina ke niokwama na maladi?

¹¹ Tanga Marko 5:25-34. Nkento mosi niokwamaka na maladi mosi yina vandaka kupesa yandi nsoni na nsungi ya bamvula 12. Maladi na yandi vandaka na bupusi na mambu ya luzingu na yandi yonso, ata na mambu ya lusambu. “Minganga mingi monisaka yandi mpasi mingi mpi yandi manisaka bima na yandi yonso,” ata mpidina, maladi na yandi vandaka kaka kukuma mingi. Kansi kilumbu mosi, yandi bakaka lukanu ya nkaka sambu na kubeluka. Yandi salaka bikesa sambu na kukwenda pene-pene ya Yezu. Yandi kotaka na kati ya bantu mpi simbaka lele ya Yezu ya zulu. (Levi 15:19, 25) Yezu bakisaka nde ngolo mosi me basika na  nitu na yandi, yo yina yandi sosaka kuzaba nani me simba yandi. Nkento yina “vandaka kutekita na boma,” ebuna “yandi kwisaka mpi fukamaka na ntwala [ya Yezu] mpi tubilaka yandi kieleka yonso.” Ntangu Yezu bakisaka nde Yehowa, Tata na yandi me belula nkento yina, yandi monisilaka nkento yina mawete mpi tubaka nde: “Mwana na mono, lukwikilu na nge me belula nge. Kwenda na ngemba, mpi beluka na maladi na nge ya mpasi.”

12. (a) Mambu yina beto me longuka, me sadisa nge na kubakisa nde Yezu kele muntu ya nki mutindu? (b) Inki mbandu Yezu me bikilaka beto?

¹² Yezu kele muntu ya mbote kibeni! Beto me mona nde yandi ke wilaka bambefo mawa. Satana ke sosaka kundimisa beto nde Nzambi ke zolaka beto ve mpi nde yandi ke bakaka beto ve na mbalu. Bimangu ya Yezu ke monisa pwelele nde Yezu ke tudilaka beto dikebi mpi yandi ke kudibanzaka sambu na bampasi na beto. Yezu kele Ntotila mpi Nganga-Nzambi ya Nene yina ke wilaka bantu mawa kibeni! (Baeb. 4:15) Beto lenda bakisa ve kibeni mawi ya muntu yina ke niokwama na kimbefo mosi yina ke manaka ve, mingi-mingi kana beto me belaka yo ntete ve. Beto fwete vila ve nde Yezu wilaka bambefo mawa ata yandi mosi belaka ve. Bika nde beto baka lukanu ya kulanda mbandu ya Yezu na kiteso ya ngolo na beto.—1 Pie. 3:8.

13. Lufutumuku ya Lazare ke monisa nki na yina me tala kimuntu ya Yezu?

¹³ Yezu vandaka kudiyangisa sambu na bampasi ya bantu ya nkaka. Ntangu yandi monaka bantu ya nkaka ke dila nduku na yandi Lazare, “yandi waka mpasi mingi na kati na yandi mpi kumaka kisaka-saka.” Yandi waka mpasi mingi ata yandi zabaka nde ntangu fioti na nima yandi ta futumuna Lazare. (Tanga Yoane 11:33-36.) Yezu waka ve nsoni  na kumonisa mawi yina ya mpasi. Bantu yina vandaka pana, bakisaka zola yina Yezu vandaka na yo sambu na Lazare mpi sambu na bantu ya dibuta na yandi. Yezu monisaka nde yandi ke wilaka bantu mawa kibeni ntangu yandi sadilaka ngolo yina Tata na yandi me pesaka yandi sambu na kufutumuna nduku na yandi!—Yoa. 11:43, 44.

14, 15. (a) Inki ke monisa nde Yehowa kele ti mpusa ya ngolo ya kumanisa bampasi ya bantu? (b) Sambu na nki bangogo “maziamu ya mbambukilu” yina Yezu sadilaka me fwana?

¹⁴ Biblia ke monisa nde Yezu “me fwanana kibeni ti mutindu yina [Ngangi] kele.” (Baeb. 1:3) Yo yina, bimangu ya Yezu ke monisa nde yandi ti Tata na yandi ta katula maladi mpi lufwa. Bo ta futumuna bantu mingi kuluta balufutumuku yina Biblia ke tubilaka. Yezu tubaka nde: “Ngunga ke kwisa ntangu bantu yonso ya kele na maziamu ya mbambukilu [to ya kuyibuka] . . . ta basika.”—Yoa. 5:28, 29.

¹⁵ Bangogo “maziamu ya mbambukilu” yina Yezu sadilaka me fwana sambu Nzambi ta futumuna bantu yina kele na mabanza na yandi. Nzambi Nkwa-Ngolo Yonso, yina gangaka luyalanganu ya mvimba, lenda yibuka mambu yonso ya bantu yina me fwaka, yo vanda kimuntu yina bo butukaka ti yo to mambu ya nkaka yina bo longukaka na luzingu na bo. (Yez. 40:26) Yehowa kele kaka ve ti makuki ya kuyibuka bantu yina me fwaka, kansi yandi ti Mwana na yandi kele mpi ti luzolo ya kusala yo. Lufutumuku ya Lazare mpi ya bantu ya nkaka yina Biblia ke tubilaka, ke monisa mambu yina ta salama na bisika yonso na nsi-ntoto ya mpa.

16. Bakristu yina ta bikala ya kwikama ta vanda ti nki dibaku?

¹⁶ Kana beto me bikala ya kwikama, beto ta mona kimangu mosi ya kuluta nene: kuguluka ya bantu na mpasi ya nene. Ntangu fioti na nima ya mvita ya Armagedoni, bimangu mingi ta salama, sambu bantu kuvutukila mavimpi ya mbote. (Yez. 33:24; 35:5, 6; Kus. 21:4) Yindula mutindu bantu ta losa maneti, banti ya kutambudila, bakiti ya bikata, bima yina bantu ke tulaka na makutu sambu na kuwa mbote, mpi bima ya nkaka. Yehowa ta sala nde bantu yina ta guluka na Armagedoni kuvanda na mavimpi ya mbote. Yandi ta pesa bo mpi kisalu ya kusala. Bo ta vanda na kati ya bantu yina ta kumisa ntoto ya mvimba paladisu.—Nk. 115:16.

17, 18. (a) Inki vandaka lukanu ya ntete ya bimangu yina Yezu salaka? (b) Sambu na nki nge fwete sala bikesa sambu na kukota na ntoto ya mpa ya Nzambi?

¹⁷ Bubu yai, ‘kibuka ya nene’ ke bakaka kikesa na mutindu Yezu belulaka bantu na ntangu ya ntama, sambu yo ke ndimisaka bo nde na bilumbu ke kwisa, Yezu ta belula maladi na bo yonso. (Kus. 7:9) Mutindu mwana ya ntete ya Nzambi belulaka bantu ke monisa nde yandi ke vandaka na zola ya mingi sambu na bantu. (Yoa. 10:11; 15:12, 13) Mawa ya Yezu ke monisa kibeni nde Yehowa ke kudibanzaka mingi sambu na konso nsadi na yandi.—Yoa. 5:19.

¹⁸ Bantu yonso ke dila, ke mona mpasi mpi ke fwa. (Bar. 8:22) Beto kele na mfunu ya ntoto ya mpa ya Nzambi; sambu kuna, yandi ta belula bantu kimakulu mutindu yandi me silaka. Malashi 3:20 ke monisa bikuma yina ke pusa beto na kundima nde bantu yina ta beluka ta ‘vanda na kiese ya mingi bonso bana-bangombe yina me basika ntinu na lupangu’ sambu bo ta kuma bantu ya kukuka. Bika nde ntonda yina beto ke monisilaka Nzambi mpi lukwikilu na beto ya ngolo na yandi kupusa beto na kusala bikesa sambu na kukota na nsi-ntoto ya mpa. Yo kele kiese mingi na kuzaba nde bimangu yina Yezu salaka ntangu yandi vandaka na ntoto monisaka mambu yina yandi ta sala na nsungi ya luyalu ya Mesia ntangu yandi ta belula bantu kimakulu!