Ntangu dibuta mosi na Kenya bingisaka bapasudi-nzila zole na nzo na bo, bo yitukaka na kumona muntu mosi me lala na mbeto ilungi ya kukonda. Yandi vandaka ka-ntulu fioti mpi maboko nkufi. Ntangu bo zabisaka yandi lusilu ya Nzambi yina ke tuba nde “bantu ya makulu-kifu ta pumbuka bonso mbambi,” yandi mwetaka.—Yez. 35:6.

Bapasudi-nzila bakisaka nde Onesmus, yina kele bubu yai ti bamvula kuluta 30, butukaka ti maladi ya ngolo ya mikwa (ostéogenèse imparfaite). Mikwa na yandi vandaka pete-pete kibeni na mpila nde ata kututana ya fioti vandaka kusala nde yo bukana. Sambu maladi yina kele ve ti lusansu to lusansu ya mbote kele ve, Onesmus zabaka nde yandi ta lutisa luzingu na yandi ya mvimba na bampasi mpi na velo ya bikata.

Onesmus ndimaka kulonguka Biblia. Kansi, mama na yandi vandaka kubuya nde yandi kwenda na balukutakanu, sambu yandi vandaka kuyindula nde mikwa na yandi lendaka kubukana mpi kuyika yandi bampasi. Yo yina, bampangi vandaka kutudila yandi masolo ya balukutakanu na kasete, mpidina Onesmus vandaka kuwidikila yo na nzo. Na nima ya kulonguka bangonda 5, Onesmus bakaka lukanu ya kukwenda na balukutakanu ata yo vandaka kigonsa.

Keti kukwenda na balukutakanu yikaka yandi bampasi? Ata fioti ve. Onesmus ke tuba nde: “Mpasi na mono ya ntangu yonso kumaka kumonana bonso ya fioti na balukutakanu.” Yandi monaka nde kivuvu na yandi ya mpa vandaka kikuma yina yandi kumaka kuwa mbote. Mama ya Onesmus monaka nsoba na nkadilu ya mwana na yandi mpi sepelaka mingi yo yina yandi mpi ndimaka kulonguka Biblia. Mbala mingi yandi vandaka kutuba nde: “Kusadila Nzambi kele nkisi sambu na mwana na mono.”

Kukonda kusukinina, Onesmus kumaka nsamuni yina me bakaka ntete ve mbotika. Na nima, yandi bakaka mbotika mpi bubu yai yandi kele nsadi ya kisalu. Ata yandi lenda sadila ve makulu mpi diboko na yandi mosi, Onesmus vandaka ti mpusa ya kusala mambu yonso yina yandi lendaka kusala na kisalu ya Yehowa. Yandi vandaka na mfunu ya kusala bonso mupasudi-nzila nsadisi kansi yandi vandaka ti keti-keti sambu na kufulusa formilere. Sambu na nki? Sambu yandi zabaka nde yandi fwete vanda na mfunu ya muntu yina ta pusaka velo na yandi. Ntangu yandi monisaka mpusa na yandi na bampangi, bo silaka na kusadisa yandi. Mpi bo sadisaka Onesmus na kusala bonso mupasudi-nzila nsadisi.

Onesmus kumaka mpi na mpusa ya kusala bonso mupasudi-nzila ya ntangu yonso. Mukapu ya lumbu ya kilumbu yina pesaka yandi kikesa yina yandi vandaka na yo mfunu. Kapu yina vandaka Nkunga 34:9: ‘Meka mpi mona nde Yehowa kele mbote!’ Na nima ya kuyindulula verse yina, Onesmus bakaka lukanu ya kukuma mupasudi-nzila ya ntangu yonso. Bubu yai, yandi ke samunaka bilumbu iya na mposo mosi mpi ke longukaka Biblia ti bantu mingi yina ke yela mbote na kimpeve. Na 2010, yandi kotaka Nzo-Nkanda ya Kisalu ya Kimupasudi-Nzila. Onesmus waka kiese na kumona nde mosi ya balongi yina vandaka mpangi-bakala mosi na kati ya bampangi-babakala zole yina kwendaka kutala yandi sambu na mbala ya ntete!

Bubu yai, bibuti ya Onesmus me fwaka kansi bampangi ya dibundu ke lungisaka bampusa na yandi ya konso kilumbu. Yandi kele na ntonda sambu na balusakumunu yonso yina yandi ke baka ntangu yai, mpi yandi ke vingila kilumbu yina ‘ata muntu mosi ve ta tuba diaka nde: “Mono ke bela.”’​—Yez. 33:24.