Nge Lenda Zinga Mvula na Mvula

Bakristu Mingi ya mabundu ya inza kevandaka ti kivuvu ya kuzinga mvula na mvula. Konso dibundu kevandaka ti mutindu na yo ya kutendula kivuvu yango, kansi bo yonso kekwikilaka na kima mosi: kuzinga luzingu mosi ya mbote mpi ya kyese kukonda kufwa. Keti yina kele mpi mpusa na nge? Inki mutindu dilongi yai mepanzanaka bisika yonso?

Keti kivuvu ya kuzinga mvula na mvula talungana? Masonuku kemonisa nde Ngangi kutulaka na kati ya ntima ya muntu mpusa mpenza ya kuzinga mvula na mvula banda na luyantiku, banda na ntangu yandi gangaka bankwelani ya ntete. Biblia ketuba nde: “Ata ntangu ya kukonda nsuka [Nzambi] metulaka yo na ntima na bo.”​—Longi 3:11, NW.

Kansi, sambu na kulungisa mpusa yina ya kuzinga mvula na mvula, yo lombaka nde bankwelani ya ntete kundima kiyeka ya Nzambi ya kuponila bo mambu ya mbote ti mambu ya mbi. Kana bo salaka mutindu yina, Yehowa zolaka kutadila bo nde bo mefwana na ‘kuzinga mvula na mvula’ na masamba ya Edeni, kisika ya yandi bongisaka sambu na bo.​—Kuyantika 2:8; 3:22.

Bo vidisaka Luzingu ya Mvula na Mvula

Biblia ketuba nde Nzambi kukunaka na masamba “nti ya nkaka yina ke pesaka mayele sambu na kuzaba mambu ya mbote ti mambu ya mbi” mpi yandi buyisaka Adami ti Eva na kudya bambuma ya nti yango sambu bo fwa ve. (Kuyantika 2:9, 17) Kana Adami ti Eva kudyaka ve mbuma ya nti yina, bo zolaka kumonisa Nzambi nde bo ndimaka kiyeka na yandi. Kansi, kudya mbuma ya nti yina zolaka kumonisa nde bo mebuya kiyeka ya Nzambi. Adami ti Eva kukolamaka na bansiku ya Nzambi mpi bo bakaka lweka ya Satana, kigangwa ya kimpeve yina kukolamaka na kiyeka ya Nzambi. Yo yina, Nzambi kubakaka lukanu nde Adami ti Eva mefwana ve na kuzinga mvula na mvula.​—Kuyantika 3:1-6.

Nzambi tulaka na ntwala na bo luzingu ti lufwa, kuzinga to kukonda kuzinga. Kukolama na Nzambi kunataka lufwa mpi nsuka ya luzingu na bo. Mpila kuvandaka ve sambu na Adami ti Eva, to sambu na bana na bo, na kulanda na kuzinga na nsadisa ya nkisi ya mazi to na nsadisa ya moyo yina kefwaka ve. *

Bana yonso ya Adami kemonaka mpasi sambu na kukolama na yandi. Ntumwa Polo kutendulaka malanda ya kukolama yina. Yandi sonikaka nde: “Masumu me kotaka na nsi-ntoto sambu na mbi ya muntu mosi yai Adami, ebuna masumu me kwisaka kunata lufwa. Yo yina, bantu yonso ke fwaka sambu bo yonso ke salaka masumu.”​—Roma 5:12.

Bantu Tabaka Dyaka Luzingu ya Mvula na Mvula

Ntumwa Polo kufwanisaka luzingu ya bana ya Adami ti luzingu ya mpika ya mvu-nkama ya ntete. Sambu bana ya Adami ti Eva kubakaka masumu, bo butukaka “bampika ya masumu” mpi bo zolaka kufwa kaka. (Roma 5:12; 6:16, 17) Disongidila, kana Yehowa kupesaka ve kima yina nsiku vandaka kulomba, bantu zolaka kudikatula ve na kimpika yina. Polo kutendulaka nde: “Mutindu Nzambi pesaka bantu yonso ndola sambu na mbi ya muntu mosi yai Adami, mpidina mpi Nzambi ke ndimaka bantu yonso, yandi ke pesaka bo mpi moyo sambu na mambu ya mbote ya muntu mosi yai Yesu Kristo salaka.” “Mambu ya mbote” yango kupusaka Yezu na kupesa kimenga ya luzingu na yandi ya kukuka “sambu na kukatula bantu yonso na kimpika ya masumu.” Yehowa kundimaka valere ya nkudulu sambu na kukatula bantu na kimpika ya “ndola” sambu na “masumu.”​—Roma 5:16, 18, 19; 1 Timoteo 2:5, 6.

Yo yina kikuma bantu ya siansi takuka kuzwa ve ata fyoti nkisi yina bo lenda tula na baselile sambu muntu kuzinga mvula na mvula. Yo kesonga nde nkisi kele kisika yankaka kansi na bantu ya siansi ve. Biblia ketuba nde kisina ya lufwa ya bantu kele dyambu mosi ya ketadila bikalulu ya mbote mpi lunungu, kansi yo kele ve na siansi. Mwaye ya kuvutula luzingu ya mvula na mvula na bantu kele nkudulu ya kimenga ya Yezu mpi nkudulu yango mefwanana ti kima yina nsiku vandaka kulomba.  Nkudulu kemonisa mpi lunungu mpi ntima ya mbote ya Nzambi. Ebuna, nani tabaka mambote ya nkudulu sambu na kuzinga mvula na mvula?

Dikabu ya Luzingu ya Kukonda Kufwa

Yehowa Nzambi kele “kaka Nzambi tii kuna.” Yandi kefwaka ve. (Nkunga 90:2) Muntu ya ntete ya Yehowa kupesaka dikabu ya luzingu ya kukonda kufwa kuvandaka Yezu Kristu. Ntumwa Polo kutendulaka nde: “Nzambi tedimisaka Kristo na lufwa, Kristo lenda fwa diaka ve; mpamba ve, lufwa ke na kiyeka ya kusimba yandi diaka ve.” (Roma 6:9) Ya kyeleka, kana beto fwanisa Yezu yina kufutumukaka ti bamfumu ya ntoto, Polo ketuba nde kaka yandi mpamba muntu lenda fwa dyaka ve. Yezu ‘tazinga mvula na mvula.’ Luzingu na yandi “ke na nsuka ve.”​—Baebreo 7:15-17, 23-25; 1 Timoteo 6:15, 16.

Nzambi kupesaka dikabu yina kaka na Yezu mpamba ve. Bakristu bapakulami yina Nzambi meponaka na kuyala bonso bantotila ya lukumu na zulu tafutumuka mpi mutindu Yezu futumukaka. (Roma 6:5) Ntumwa Yoane kumonisaka nde bantu 144 000 kebaka dikabu yina. (Kusonga 14:1) Bo mpi kebakaka luzingu ya kukonda kufwa. Sambu na yina metala lufutumuku na bo, Polo kutubaka nde: “Nitu ya misuni ti ya menga yo lenda vanda nitu ya Kimfumu ya Nzambi ve . . . Ntangu mpungi ta bula, bantu yina me fwaka bo ta telama sambu na kuvanda na moyo ya kukonda nsuka, beto yonso mpi ta baluka mutindu ya nkaka. Sambu muntu yina ke na nitu ya kupola yandi fweti baka nitu yina lenda pola ve; muntu yina ke fwaka fweti baka nitu yina lenda fwa ve.” Lufwa kevandaka dyaka ve na kiyeka ya kusimba bantu yina Nzambi mefutumunaka mutindu yai.​—1 Korinto 15:50-53; Kusonga 20:6.

Dyambu yai ya Nzambi mezabisaka kele ya kuyituka mpenza. Ata bawanzyo yina kele bigangwa ya kimpeve, Nzambi kupesaka bo ve luzingu ya kukonda kufwa ntangu yandi gangaka bo. Dyambu yai kele pwelele na mpila nde bigangwa ya kimpeve yina kulandaka Satana na kukolama na yandi, bo tafwa. (Matayo 25:41) Kansi, bantu yina tayala ti Yezu mebakaka dikabu ya luzingu ya kukonda kufwa, yina kele nzikisa ya kemonisa nde Yehowa ketulaka ve badute na kwikama na bo.

Keti yo ketendula nde kaka bantu 144 000, ntalu ya fyoti kana beto fwanisa ti bamiliare ya bantu yina mezingaka na ntoto, tazinga mvula na mvula? Ve. Bika beto tala sambu na nki beto metuba buna.

Luzingu ya Mvula na Mvula na Paladisu ya Ntoto

Mukanda ya Kusonga kemonisa kifwanisu mosi ya kitoko ya kibuka ya bantu yina Nzambi tapesa luzingu ya mvula na mvula na paladisu ya ntoto. Na kati na bo, beto lenda tanga bantu yina mefwaka kansi ya Nzambi tafutumuna mpi tavutuka na kileke ti ngolo mingi. (Kusonga 7:9; 20:12, 13; 21:3, 4) Bo kenata bo na “nzadi yina ke na masa ya moyo, yo vandaka kupela bonso ditadi ya kristale; nzadi yina vandaka kubasika na kiti ya kimfumu ya Nzambi.” Na balweka ya nzadi yina, “kuvandaka na nti ya moyo . . . matiti na yo ke belulaka bamputa ya bantu ya bansi yonso.” Yehowa Nzambi kebingisa bantu na zola yonso nde: “Konso muntu yina ke na nzala ya masa, yandi kwisa. Konso muntu yina ke zola kunwa masa ya moyo, yandi baka yo ya mpamba.”​—Kusonga 22:1, 2, 17.

Banti ti masa yina kele ve nkisi ya kenunisaka ve bonso yina bantu ya siansi kesosaka banda bamvula mingi sambu na kusoba luzingu ya bantu. Kansi, yo kemonisa bangidika yina Nzambi mebakaka na nzila ya Yezu Kristu sambu na kuvutula bantu na luzingu ya kukuka yina bantu ya ntete kuvandaka na yo na luyantiku.

Lukanu yina Nzambi kuvandaka na yo ya kupesa bantu ya bulemfu luzingu ya mvula na mvula na ntoto mesobaka ve. Lukanu yina talungana sambu Yehowa kele Nzambi ya kwikama. Nkunga 37:29 ketuba nde: “Bantu ya mbote ta zinga na ngemba na ntoto yina ya Mfumu Nzambi tubaka na kupesa bo; yo ta vanda ya bo tii kuna.” Lusilu yai kepusaka beto, kumosi ti bantu yina ya Nzambi tapesa luzingu ya kukonda kufwa na zulu, na kutuba nde: “Bisalu na nge kele ya nene ti ya kuyituka! Nge mfumu ya nene ya bansi yonso, mambu yina ya nge ke kanaka kele ya mbote ti ya kieleka! Mfumu Nzambi, nani lenda tina nge boma ve? Nani lenda buya na kupesa nge lukumu? Sambu nge mosi mpamba kele muntu ya santu.”​—Kusonga 15:3, 4.

Keti nge tazola kubaka dikabu yai ya valere mingi ya luzingu ya mvula na mvula? Kana mpidina, nge fwete vanda ya kwikama mpi kulemfuka na “Mfumu Nzambi.” Nge fwete longuka na kuzaba Yehowa ti Yezu Kristu yina ya yandi mesadilaka na kupesa luzingu yina. Nzambi tapesa dikabu ya “moyo ya mvula na mvula” na bantu yonso yina kevandaka ti luzolo ya kulanda bansiku na yandi ya bikalulu ya mbote ti ya mbi.​—Yoane 17:3.

[Noti na nsi ya lutiti]