Nzambi Kekudibanzaka Mpenza Sambu na Nge

NA NTANGU ya mpasi, yo kele mbote na kusosa lusadisu ya Nzambi na kisambu, sambu yandi “kele nene ti ngolo mingi, mayele na yandi mpila ya kutesa yo kele ve.” (Nkunga 147:5) Yandi mefwana mpenza na kusadisa beto na kununga kunwana ti bampasi na beto. Dyaka, Biblia kelomba beto na ‘kusonga yandi bampasi yonso ya ntima’ na beto. (Nkunga 62:9) Ebuna, sambu na nki bantu mingi kemonaka bonso nde Nzambi kewaka ve bisambu na bo? Keti yo ketendula nde Nzambi kekudibanzaka mpenza ve sambu na bo?

Na kisika ya kupesa nswalu foti na Nzambi sambu yo kemonana bonso nde yandi kesala ve ata kima mosi, yibuka ntete ntangu nge vandaka mwana ya fyoti. Ntangu bibuti na nge vandaka kupesa nge ve na mbala mosi konso kima ya nge vandaka kulomba bo, keti nge vandaka kutuba nde bo kezolaka nge ve? Bana mingi ketubaka mutindu yina. Kansi, ntangu nge yelaka, nge bakisaka nde zola kemonanaka na mitindu mingi mpi nde kupesa mwana konso kima ya yandi kelomba kele mpenza ve mutindu ya kumonisa zola.

Kiteso mosi, kana Yehowa kepesaka ve ntangu yonso mvutu na bisambu na beto na mutindu beto kezodila, yo ketendula ve nde yandi ketudila beto ve dikebi. Ya kyeleka, Nzambi kemonisaka nde yandi kekudibanzaka sambu na beto na mitindu mingi.

“Na Ngolo na Yandi Beto Ke na Moyo”

Ntetentete, Nzambi muntu kesalaka nde ‘beto vanda na moyo, beto mona mpila ya kutambula, mpi beto vanda na luzingu.’ (Bisalu 17:28) Ya kyeleka, luzingu ya yandi mepesaka beto kemonisaka nde yandi kekudibanzaka sambu na beto!

Dyaka, Yehowa kepesaka beto bima yonso ya beto ke na yo mfunu sambu na kubikala na luzingu. Beto ketanga nde: “Nge ke menisaka matiti sambu na bambisi, bandunda sambu na bantu. Mpidina muntu ke kunaka bima na yandi.” (Nkunga 104:14) Ya kyeleka, Ngangi na beto kepesaka beto ve kaka bima yina beto kevandaka na yo mfunu na luzingu. Na ntima na yandi ya mbote, yandi kepesaka beto ‘mvula yina kekatukaka na zulu, yandi kepesaka beto ntangu ya kukatula bima na bilanga. Yandi kepesaka beto madia; yo kepesaka beto kyese mingi.’​—Bisalu 14:17.

Kansi, bantu yankaka lenda kudiyula nde: ‘Kana Nzambi kezolaka beto mingi mpenza, sambu na nki yandi kepesaka nzila nde beto mona mpasi?’ Keti nge mezaba mvutu na ngyufula yina?

Keti Nzambi Muntu Kele na Kisina ya Mpasi na Beto?

Bantu mingi kevandaka na kisina ya bampasi na bo. Mu mbandu: Bigonsa ya kekatukaka na mambu mingi ya bantu kesalaka mezabanaka mbotembote. Ata mpidina, bantu kesala pite, kelauka malafu mpi kesadila bima yankaka ya kelausaka, kenwa makaya, kesala bansaka yina ketulaka luzingu na kigonsa, ketambusa bavwatire ntinu mingi, mpi buna na buna. Kana kikalulu mosi ya bigonsa ya mutindu yai kunatila muntu mpasi, foti tavanda ya nani? Ya Nzambi to ya muntu yina ketambula kukonda mayele? Ndinga ya kupemama ya Nzambi ketuba nde: “Beno kudikusa ve, sambu bo ke sekaka Nzambi ve. Muntu ke katulaka bambuma yina ya yandi ke kunaka.”​—Galatia 6:7.

Katula bampasi yina bantu kekudisosilaka bo mosi, mbala mingi bantu kepesanaka mpasi bo na bo. Kana insi mosi mesosila insi yankaka bitumba, ntembe kele ve nde Nzambi ve muntu kele na kisina ya mpasi yina talanda. Kana muntu mosi ya nku kunwanisa muntu yankaka, keti Nzambi muntu tavanda na kisina ya mpasi to ya lufwa yina talanda? Ata fyoti ve! Ntangu mfumu mosi ya luyalu kepesa bantu ya yandi keyala mpasi, kenyokula bo, to kefwa bo, keti beto fwete pesa foti na Nzambi? Kuyindula mutindu yina kele kukonda mayele.​—Longi 8:9.

Ebuna, inki beto lenda tuba sambu na mafuku ya bantu ya kezinga na kinsukami to na nzala ya ngolo? Keti foti kele ya Nzambi? Ve. Ntoto na beto kebasisaka madya mingi mpenza yina mefwana na kudisa konso muntu. (Nkunga 10:2, 3; 145:16) Kima ya kekumisa nzala mpi kinsukami mingi kibeni kele nsadilu ya mbi yina bantu kesadila bima  mingi ya Nzambi mepesaka. Mpi bwimi ya bantu kepesa ve nzila nde mambu yango kubonga.

Kisika Mpasi Mekatukaka

Kansi, kana muntu mebela to mefwa sambu na kimununu, nani kele na kisina na yo? Keti nge tayituka na kuzaba nde Nzambi kele ve na kisina ya mambu yai? Nzambi kusalaka ve muntu sambu yandi kununa mpi kufwa.

Ntangu Yehowa kutulaka bantu ya ntete, Adami ti Eva na kilanga ya Edeni, yandi pesaka bo kivuvu ya kuzinga mvula na mvula na paladisu ya ntoto. Kansi, yandi monisaka pwelele nde yandi zolaka nde ntoto kufuluka ti bantu yina tabakisa mfunu ya kimvwama na bo. Yo yina, yandi tudilaka bo bansiku. Adami ti Eva zolaka kuzinga na Paladisu kaka kana bo landaka na kulemfukila Ngangi na bo ya zola.​—Kuyantika 2:17; 3:2, 3, 17-23.

Yo kele mawa mingi na kumona nde Adami ti Eva kukolamaka. Eva kulemfukilaka Satana Dyabulu. Satana kukusaka yandi, mpi na kutuba ya mbote, yandi monisaka yandi nde Nzambi kubumbilaka yandi kima mosi ya mbote. Ebuna yandi yantikaka luzingu mosi ya dipanda mpi yandi sosaka ‘kuvanda bonso Nzambi na kuzaba mambu ya mbote ti mambu ya mbi.’ Adami mpi kukolamaka bonso yandi.​—Kuyantika 3:5, 6.

Ntangu bo salaka masumu na mutindu yina, Adami ti Eva kumonisaka bo mosi nde bo fwanaka ve na kuzinga mvula na mvula. Bo monaka malanda ya mpasi ya disumu. Ngolo na bo kubandaka na kumana malembemalembe, mpi nsukansuka bo fwaka. (Kuyantika 5:5) Kansi, kukolama na bo kunataka bampasi ya kuluta ngolo. Bubu yai, beto kelanda kaka na kumona mpasi sambu na masumu ya Adami ti Eva. Ntumwa Polo kusonikaka nde: “Masumu me kotaka na nsi-ntoto sambu na mbi ya muntu mosi yai Adami, ebuna masumu me kwisaka kunata lufwa. Yo yina, bantu yonso ke fwaka sambu bo yonso ke salaka masumu.” (Roma 5:12) Ya kyeleka, sambu na kukolama ya Adami ti Eva, masumu mpi lufwa mepanzanaka na bantu yonso bonso maladi yina kenataka na lufwa.

Nzikisa ya Kuluta Nene ya Zola ya Nzambi

Keti yo ketendula nde bantu yina Nzambi kusalaka lenda toma dyaka ve? Ve. Ngyufula yai kenata beto na kutadila nzikisa ya kuluta nene ya kemonisa nde Nzambi kekudibanzaka sambu na beto. Nzambi kusalaka kibansa ya nene kibeni ntangu yandi pesaka mwaye ya kukatula bantu na masumu mpi na lufwa. Ntalu ya nkudulu kuvandaka luzingu ya kukuka ya Yezu  kupesaka na luzolo yonso sambu na beto. (Roma 3:24) Yo yina, ntumwa Yoane kusonikaka nde: “Nzambi me lutaka kuzola bantu yonso; yo yina yandi pesaka bo mwana mosi yina kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda na moyo ya mvula na mvula.” (Yoane 3:16) Zola yai ya kuluta nene ya Nzambi memonisaka mepesaka beto dyaka kivuvu ya kuzinga mvula na mvula. Ntumwa Polo kusonikilaka Bakristu ya Roma nde: “Nzambi ke ndimaka bantu yonso, yandi ke pesaka bo mpi moyo sambu na mambu ya mbote ya muntu mosi yai Yesu Kristo salaka.”​—Roma 5:18.

Beto lenda kwikila mpenza nde na ntangu ya yandi metulaka, bampasi mpi lufwa tavanda dyaka ve na Ntoto ya mvimba. Kansi, mambu yina mukanda ya Kusonga kutubilaka na ntwala tasalama: “Ntangu yai Nzambi ke zinga na kati ya bantu! Yandi ta zinga ti bo, bo ta vanda bantu na yandi. Yandi mosi Nzambi ta vandaka ti bo, yandi ta vandaka Nzambi na bo. Yandi ta kusula mansanga yonso na meso na bo. Lufwa ta vandaka diaka ve, bantu ta lwataka mpidi diaka ve, bo ta dilaka diaka ve, bo mpi ta waka diaka mpasi ve. Na ntangu yina mambu ya ntama ta vanda me vila.” (Kusonga 21:3, 4) Nge lenda tuba nde: ‘Ntangu mambu yina tasalama, mono tavanda dyaka ve na luzingu!’ Kansi, na kutuba ya mbote, nge lenda zinga tii na ntangu yina. Nkutu, ata nge mefwa, Nzambi lenda futumuna nge na lufwa. (Yoane 5:28, 29) Yai kele mambu ya Nzambi kekana na kusala sambu na beto, mpi yo tasalama mpidina. Yo yina, yo kele mpenza masonga ve na kutuba nde Nzambi kekudibanzaka ve sambu na bantu!

“Kwenda Penepene na Nzambi”

Beto kebaka kikesa na kuzaba nde Nzambi mebakaka bangidika sambu na kumanisa mpasi ya bantu kimakulu. Ebuna, inki beto tatuba sambu na bilumbu na beto? Inki beto lenda sala kana mpangi mosi ya beto kezolaka mingi mefwa to kana mwana na beto kebela? Ntangu ya Nzambi takatula maladi mpi lufwa melunga ntete ve. Biblia kemonisa nde beto fwete kinga dyaka fyoti na ntwala nde mambu yina kusalama. Kansi Nzambi meyambulaka beto ve. Longoki Yakobo kutubaka nde: “Beno kwenda penepene na Nzambi, ebuna yandi ta kwisa penepene na beno.” (Yakobo 4:8) Ya kyeleka, Ngangi na beto kebinga beto na kusala kinduku ya ngolo ti yandi, mpi banduku na yandi ya ngolo kemonaka ntangu yonso mutindu yandi kesadisaka bo ata na bantangu ya kuluta mpasi.

Inki mutindu beto lenda kwenda penepene na Nzambi? Ntotila Davidi kuyulaka ngyufula ya mutindu mosi kiteso ya bamvula mafunda tatu meluta, nde: “Mfumu Nzambi, . . . nani lenda bikala na ngumba na nge [ya santu, NW]?” (Nkunga 15:1) Davidi kupesaka mvutu na ngyufula na yandi ntangu yandi landaka na kutuba nde: “Kele kaka muntu yina ke landaka luzolo ya Nzambi na mambu yonso, ke salaka mambu ya mbote ntangu yonso; yandi ke tubaka mambu ya kieleka, ke kusaka ve, yandi k[e] tongaka bantu ya nkaka ve. Yandi ke salaka bampangi na yandi mbi ve.” (Nkunga 15:2, 3) Na kutuba yankaka, Nzambi keyambaka bantu yina kelandaka nzila yina ya Adami ti Eva kubuyaka. Yandi kekwendaka penepene na bantu yina kesalaka luzolo na yandi.​—Kulonga 6:24, 25; 1 Yoane 5:3.

Inki mutindu beto lenda sala luzolo ya Nzambi? Beto fwete longuka mambu ya “mbote yina ke pesaka kiese na Ngulusi na beto Nzambi,” mpi kubaka lukanu ya kusadila mambu yango. (1 Timoteo 2:3) Yo kelombaka kulonguka sambu na kubaka nzayilu ya sikisiki ya Ndinga ya Nzambi, Biblia. (Yoane 17:3; 2 Timoteo 3:16, 17) Kutanga Biblia na zuluzulu mefwana ve. Beto fwete landa mbandu ya Bayuda ya Berea ya mvu-nkama ya ntete yina kuwaka malongi ya Polo. Beto ketanga mutindu yai sambu na bo: “Bo ndimaka nsangu ya Nzambi na luzolo yonso. Konso kilumbu bo vandaka kuzikisa mbote-mbote na Mukanda ya Nzambi sambu na kutala kana mambu yina ya Paulo vandaka kutuba vandaka kwenda kiteso mosi.”​—Bisalu 17:11.

Kiteso mosi bubu yai, kulonguka Biblia mbotembote takumisa lukwikilu na beto na Nzambi ngolo mpi yo tasadisa beto na kusala kinduku ya ngolo ti yandi. (Baebreo 11:6) Yo tasadisa beto mpi na kubakisa mbotembote mutindu Yehowa kekudibanzaka sambu na bantu​—sambu na mambote ya ntangu fyoti mpamba ve, kansi mingimingi sambu na mambote ya mvula na mvula ya bantu yonso yina mefwana mpenza.

Beto tadila fyoti mambu yina mwa ndambu ya Bakristu yina kele ti kinduku ya ngolo ti Nzambi ketuba. Danielle, mwana-nkento mosi ya bamvula 16 ketuba nde: “Mono kezolaka Yehowa mingi kibeni, mpi mono kele na mambu mingi ya kupesila yandi matondo. Yandi mepesaka mono bibuti ya zola yina kezolaka yandi na masonga yonso  mpi ya melongaka mono mambu yina kewakana ti Ndinga na yandi.” Mukristu mosi na Uruguay kesonika nde: “Ntima na mono kele ya kufuluka ti ntonda, mpi mono kewa mpusa ya kupesa Yehowa matondo sambu na mambote na yandi ya beto mefwana ve na kubaka mpi na kinduku ya mono mesalaka ti yandi.” Nzambi kendimaka ata bana ya fyoti. Gabriela, mwana-nkento mosi ya bamvula nsambwadi, ketuba nde: “Mono kezolaka Nzambi kuluta bima yonso yina kele na nsi-ntoto ya mvimba! Mono kele ti Biblia na mono mosi. Mono kezolaka kulonguka mambu ya Nzambi ti ya Mwana na yandi.”

Bubu yai, mafuku ya bantu na ntoto ya mvimba kendimaka na ntima na bo ya mvimba mambu yai ya Davidi kutubaka: “Mbote mpenza na kuvanda penepene na nge Nzambi!” (Nkunga 73:28) Bo ke na kubaka lusadisu sambu na kununga bampasi ya bo kekutana ti yo bubu yai, mpi bo ke na kivuvu ya ngolo ya kuzinga mvula na mvula na Paladisu ya ntoto. (1 Timoteo 4:8) Sambu na nki nge baka ve lukanu ya ‘kukwenda penepene na Nzambi’? Nkutu, Biblia kendimisa beto nde: “Yandi kele ntama ve na konso muntu awa na kati na beto.” (Bisalu 17:27) Ya kyeleka, Nzambi kekudibanzaka mpenza sambu na nge!

[Bifwanisu ya kele na lutiti 5]

Kudibanza ya Yehowa sambu na beto kemonanaka na mitindu mingi

[Kifwanisu ya kele na lutiti 7]

Ata bana ya fyoti lenda kwenda penepene na Nzambi

[Bifwanisu ya kele na lutiti 7]

Bubu yai, Yehowa kesadisaka beto na kukanga ntima. Na ntangu ya yandi metulaka, yandi takatula maladi ti lufwa