Baka Kikesa na Bantangu ya Mpasi

BANSANGU ya bilumbu yai kepesaka ve kikesa ata fyoti. Muntu mosi kusonikaka nde: “Mbala mingi beto kekukaka ve na kubaka desizio kana beto tatala bansangu na TV na sizere ya suka to ve ,sambu nde makambu ya ke na kubwa bilumbu yai kele kaka mbi.” Inza mefuluka ti bitumba, mambu ya kepesaka bantu boma, mpasi, nku, mpi maladi. Ntama mingi ve mambi yai lenda simba luzingu na beto na mbala mosi kana yo mesimba beto ntete ve.

Biblia tubaka na ntwala na masonga yonso mambu ya mutindu yai. Na ntangu yandi tubilaka mambu yina tabwa na ntangu na beto, Yezu kutubaka nde bitumba ya nene, maladi, nzala, ti kunikana ya ntoto tavanda. (Luka 21:10, 11) Mutindu mosi mpi, ntumwa Polo kusonikaka mambu ya metala ‘bilumbu ya mpasi mingi,’ ntangu bantu tawaka makasi nswalu, tazolaka mbongo, mpi tazolaka ve mambu ya mbote. Yandi bingaka yo “bilumbu ya nsuka.”​—2 Timoteo 3:1-5.

Yo yina, na ntangu yo ketubilaka mambu ya keluta na inza, bansangu kevandaka na mambu mingi ya kewakanaka na yina Biblia tubaka na ntwala. Kansi bansangu yango kesukaka kaka na kutubila kuwakana yango. Biblia kepesa mabanza yina bansangu kepesaka ve. Na nsadisa ya Ndinga ya kupemama ya Nzambi, beto lenda bakisa ve kaka sambu na nki mambi kele mingi, kansi beto kebakisaka dyaka nki mutindu luzingu tavanda na bilumbu kekwisa.

 Inki Mutindu Nzambi Kemonaka Mambi

Biblia ketendula nki mutindu Nzambi kemonaka bampasi ya bilumbu na beto. Ata yandi zabaka mambu yai na ntwala, yandi kewilaka yo ve kyese mpi yandi kele ve ti dibanza ya kupesa nzila nde yo landa na kusalama tii kuna. Ntumwa Polo kusonikaka nde “Nzambi ke zolaka bantu.” (1 Yoane 4:8) Yehowa kekudibanzaka mingi sambu na bantu mpi yandi kebuyaka mambi yonso. Yo yina, beto lenda sosa kuzwa kikesa na Nzambi, sambu yandi kele muntu ya mbote mpi yandi kewilaka bantu mawa, mpi yandi kele na ngolo mpi luzolo ya kukatula mambi na ntoto. Muyimbi-bankunga kusonikaka nde: “[Ntotila ya zulu ya Nzambi meponaka] ta sadisaka bantu ya mawa yina ke didila yandi ti bantu ya kukonda muntu ya kusadisa bo. Bansukami ti bantu yina ke na ngolo ve, yandi ta wilaka bo mawa; yandi ta sadisaka bantu yina ke na mpasi. Yandi ta gulusaka bo na maboko ya bantu ya nku, na yandi luzingu na bo kele mfunu mingi.”​—Nkunga 72:12-14.

Keti nge kewaka mawa sambu na bantu yina kemona mpasi? Ntembe kele ve nde nge kewaka yo. Kuwa mawa sambu na bampangi kele kikalulu mosi ya Yehowa kutulaka na ntima na beto, sambu yandi salaka beto na kifwani na yandi. (Kuyantika 1:26, 27) Yo yina, beto lenda tula ntima nde Yehowa kewaka mpasi na ntima sambu na bampasi ya bantu kemonaka. Yezu, yina kuzabaka Yehowa mbote-mbote kuluta bantu yonso, kulongaka nde Yehowa kesepelaka na beto mingi mpenza mpi yandi mefulukaka ti kikalulu ya kuwilaka bantu mawa.​—Matayo 10:29, 31.

Bima yonso ya yandi mesalaka kesongaka nde Nzambi kekudibanzaka sambu na bantu. Yezu tubaka nde Nzambi “ke basisaka ntangu na yandi na zulu sambu na bantu ya mbi ti na bantu ya mbote, yandi ke nokisaka mvula na yandi na bantu yina ke salaka mambu ya mbote ti na bayina ke salaka mambu ya mbi.” (Matayo 5:45) Polo kusonikaka na bantu ya mbanza ya Listre nde: “[Nzambi] ke songaka beno mambu ya mbote ya yandi ke salaka. Yandi ke pesaka beno mvula yina ke katukaka na zulu, yandi ke pesaka beno ntangu ya kukatula bima na bilanga. Yandi ke pesaka beno madia; yo ke pesaka beno kiese mingi.”​—Bisalu 14:17.

Nani Kele Nto ya Mambi?

Mambu yina Polo kutubaka na bantu ya Listre kebenda mpenza dikebi na beto: “Na ntangu ya ntama, [Nzambi] bikisaka makanda yonso ya bantu na kulanda nzila na bo mosi.” Yo yina, makanda, to bantu bo mosi, kele na kisina ya makambu mingi ya mpasi ya bo kekutanaka na yo. Beto fwete pesa ve foti na Nzambi.​—Bisalu 14:16.

Sambu na nki Yehowa kebikaka nde mambu ya mbi kukumina bantu? Keti yandi tasala ve ata kima mosi sambu na yo? Beto lenda baka bamvutu na bangyufula yai kaka na Ndinga ya Nzambi, sambu bamvutu yango ketubila mpeve mosi mpi ngyufula yina yandi basisaka na kisika mosi ya kemonanaka ve.

[Bifwanisu ya kele na lutiti 4]

Bantu kewilaka bampangi na bo mawa. Keti Nzambi kewaka ve mpasi na ntima sambu na bampasi ya bantu kemonaka?

 [Bangogo ya kemonisa kisina ya bafoto ya kele na lutiti 2]

COVER: Tank: UN PHOTO 158181/J. Isaac; earthquake: San Hong R-C Picture Company

[Kifwanisu ya kele na lutiti 3]

Diboko ya kinkento na zulu, Croatie: UN PHOTO 159208/S. Maison Blanche; bana kenyokwama na nzala: UN PHOTO 146150 BY O. MONSEN