Beto nunga mpasi ya luswaswanu na luzingu ya bantu

Ntama mingi ve Ngangi tasala nde luzingu kuvanda mutindu mosi sambu na bantu yonso mutindu bo kezolaka. Kansi na ntwala ntangu yina kulunga, beto fwete sala ngolo na kununga mpasi yina luswaswanu na luzingu ya bantu lenda nata na luzingu na beto mpi na dibuta na beto. Mutindu Nelson Mandela, yina kuvandaka prezida ya Afrika ya Sudi kutubaka, “kima keswaswanisaka konso muntu na bantu yankaka kele mambu yina ya beto kesala na nsadisa ya bima yonso ya beto kele na yo, kansi kele ve bima ya bo mepesa beto.”

MAMBU yina kesalama na luzingu ya bantu kemonisa kyeleka ya bangogo yai. Babakala ti bankento mingi ya kuvandaka ve ti bima mingi na lubutuku, kansi sambu bo sadilaka mbote bima yina bo vandaka ti yo, bo mekumaka bantu ya nene na luzingu kuluta banduku na bo mingi yina kuvandaka ti bima mingi na bumwana. Kansi, kele dyaka ti bantu yankaka yina kevandaka ti bima mingi tuka lubutuku na bo, kansi bo kesadilaka yo ve mbote mpi yo sadisaka bo ve na kuzinga luzingu mosi ya kyese.

Sadila mbote bima yina nge kele na yo!

Bambangi ya Yehowa kevandaka na kyese mingi ya kusadisa bantu yina kesepelaka na kyeleka sambu bo baka nzayilu ya balukanu ya Nzambi na nsadisa ya kulonguka ya Biblia. Kansi, bo kemonaka nde sambu bantu kubakisa mpenza mbotembote mambu yina kele na Biblia, bantu fwete zaba kutanga. Kikuma yo yina Bambangi ya Yehowa melongaka mafunda ya bantu na kutanga mpi na kusonika, yika mpi bantu 23000 (ya bo melonga na katikati ya bamvu 1990) na insi mosi mpamba ya Afrika ya Westi. Zulunalu mosi (San Francisco Examiner) yina kutubilaka kisalu ya nene yina Bambangi ya Yehowa kesalaka, tubaka nde: “Beno lenda baka bo bonso basitwaye yina kele bambandu ya mbote ya kulanda. Bo kefutaka mpaku na luzolo mpenza, bo kesadisaka bantu yina kebela, mpi bo kenwanaka nde bantu ya kukonda kuzaba kutanga ti kusonika kuvanda ve na kati na bo.”

Na nsadisa ya malongi ya bo kelandaka malembemalembe, Bambangi ya Yehowa melongaka bantu mingi na kukuma mitubi ya kufwana kibeni, ya mekuka kutuba ti kikesa yonso na ntwala ya bantu. Na kati ya bantu yai mingi, kele ti bantu ya kuvandaka kuzaba ve kutuba mbote. Beto baka mbandu ya muntu ya Afrika ya Sudi yai ya kusonikaka nde: “Kukukama na mono vandaka ngolo mpenza na mpila nde mono vandaka kukuka ve kutuba, konso ntangu mono vandaka kulomba bantu yankaka na kutubila mono. . . . Ntangu mono sonikisaka na Nzo-Nkanda ya Kisalu ya Teokrasi, kilumbu mosi mono salaka lutangu ya Biblia na ntwala ya bantu fyoti . . . , kansi mono kukamaka mingi kibeni na mpila nde mono kukaka ve kumanisa lutangu na mono na baminuta yina bo pesaka mono. Na nima ya lukutakanu [longi] pesaka mono bandongisila na malembe yonso mutindu mono fwete sala sambu na kutomisa kutanga na mono. Yandi zabisaka mono nde mono fwete tangaka na ndinga ya ngolo mono mosi. Mono kumaka kusala mpidina. Mono vandaka kutanga konso kilumbu na ndinga ya ngolo Biblia na mono ti Nzozulu ya Nkengi.” Muntu yai kutomisaka kutanga na yandi na mpila nde bubu yai, yandi kesalaka badiskure na ntwala ya bantu mingi kibeni.

Luzingu ya mutindu mosi na kati ya bampangi

Na mambu metala kulonguka, kusansa nitu, kimvwama ti luzingu na bo ya konso kilumbu, Bambangi ya Yehowa yonso kevandaka ve ti luzingu ya mutindu mosi. Mambu yai yonso kemonisaka kibeni nde bo kezinga na kati ya inza ya kukonda kukuka. Ata mpidina, bo kevandaka dyaka ve ti bangindu ya mbi ya kumona mpamba bantu ya mpusu ya nitu yankaka, mutindu bantu kezingaka, mpi kimvwama, mutindu bantu ya mabundu yankaka kesalaka.

Bo mekukaka kusala yo sambu bo kesalaka ngolo na kusadila mambu yina bo kelongukaka na Biblia. Bo kendimaka na ntima ya mvimba mpenza minsiku ya Biblia bonso yai: “Mono ke talaka ve yina ke monika na meso. Muntu ke talaka yina ke monika na meso, kansi Mfumu Nzambi ke talaka ntima.” (1 Samuele 16:⁠7) “Nzambi ke zolaka bantu yonso mutindu mosi. Na konso dikanda ya bantu yandi ke ndimaka bantu yina ke zitisaka yandi ti ke salaka mambu ya mbote.” (Bisalu 10:​34, 35) “Beno vutula . . . mbi na mbi ve. Kansi beno meka na kusala mambu yina kele ya mbote na meso ya bantu yonso. Beno tula ngolo mpenza na kuzinga na ngemba ti bantu yonso.”​—⁠Roma 12:​17, 18; tala mpi 1 Timoteo 6:​17-19; Yakobo 2:​5, 9.

Bambangi ya Yehowa mendimaka na ntima ya mvimba minsiku yai ya Biblia ya kekumisaka bumosi ngolo. Yo yina, bo kendimaka ve ata fyoti kumona na kati na bo mavanga ya metala kumona mpamba bantu ya mpusu ya nitu yankaka, mutindu bantu kezinga to kimvwama. Mambu yai kekotaka ve ata fyoti na ntangu ya kupona muntu ya fwete baka mikumba ya kisalu na dibundu ya Bukristu. Mikumba bonso kulonga ti kinkengi, bo kepesaka yo kaka na bantu yina kelungisa bikalulu ya kimpeve.​—⁠1 Timoteo 3:​1-13; Tito 1:​5-9.

Sambu na bantu yina menyokwamaka sambu luzingu kele ya kuswaswana na inza yai ya kekabisaka bantu, yo kevandaka kyese mingi sambu na bo na kuvanda ti bantu ya kebaka bo bonso bampangi na bo ya babakala mpi ya bankento ya kele kiteso mosi na ntwala ya Ngangi! Martina lenda pesa beto eksperiansi ya kendimisa mambu yai. Ntangu tata na yandi kutinaka nzo, mama na yandi kusansaka yandi yandi mosi, na bunsukami kibeni. Mbala mingi bantu vandaka kubaka yandi bonso muntu ya mpamba, bo vandaka kutudila yandi ntima ve, mpi yo vandaka mpasi nde yandi kuvanda kisika mosi ti banduku na yandi. Yandi kumaka mawamawa. Kansi, mambu kubalukaka, ntangu yandi yantikaka kulonguka Biblia mpi ntangu yandi kumaka Mbangi ya Yehowa. Yandi ketuba nde: “Tii bubu yai yo kelombaka nde mono kusala ngolo sambu na kukatula bangindu ya mbi, kansi bubu yai, yo kesalaka mono dyaka kima ve. Mono mekumaka kupesa nitu na mono kilo mingi, mpi mono ketubaka kukonda nsoni. Kyeleka mesadisaka mono na kubaka mikumba na mono mono mosi. Mono kezaba ntangu yai nde Yehowa kezolaka mono mpi nde luzingu kele kitoko.”

Bambangi ya Yehowa kele kimvuka ya Bakristu ya kele na inza ya mvimba. Na bansi 230 ya bo kezingaka, bo kevandaka na kyese ya kumona nde luzingu kele kiteso mosi sambu na bampangi yonso. Na inza ya mvimba, kele ve ti kisika yankaka bo kesalaka mambu ya mutindu yai. Keti kele dyaka ti kimvuka yankaka ya Bakristu ya lenda tuba mutindu yai mpi kumonisa yo na mambu ya kyeleka ya kesalama?

Ya kyeleka, Bambangi ya Yehowa kele kimvuka ya bantu ya ketalaka mambu mutindu yo fwete vanda. Bo kendimaka kukonda mpasi nde bo mebutukaka bantu ya kukonda kukuka. Na yau, bo lenda manisa ve kikalulu ya kesalaka nde luswaswanu kuvanda na kati ya luzingu. Sambu na nsungi ya bamvu-nkama mingi bantu yankaka mingi memekaka na kusala yo kansi bo mekukaka ve. Kansi, bo kele na kyese ya kumona nde na kati na bo, bo menungaka na kukatula kikuma yai ya mpasi ya kenataka lufwa. Bo kele ti lukwikilu ya ngolo na lusilu ya Nzambi. Yo yina, bo kekinga inza ya mpa ya lunungu yina kekwisa na ntwala, luswaswanu na kati ya luzingu.

Ya kyeleka, ntama mingi ve, bantu yonso ya bulemfu tazinga dyaka “na lukumu ti banswa” kiteso mosi mutindu Ngangi na bo zolaka nde bo vanda na yo na luyantiku. Yai kele dibanza mosi ya kitoko mpenza! Ebuna ntangu yai yo tavanda dyambu mosi ya kyeleka kibeni!

 [Kifwanisu ya kele na lutiti 7]

Bambangi ya Yehowa kesalaka ngolo na kulonga bantu mingi kutanga ti kusonika

 [Kifwanisu ya kele na lutiti 8]

Kyeleka ya Biblia kesadisaka na kumanisa bangindu ya mbi na yina metala kumona mpamba bantu ya mpusu ya nitu yankaka, mutindu ya kuzinga ti kimvwama